വിജയ് ചിത്രം ജനനായകന് കേബിള് ടിവിയിലൂടെ സപ്രേക്ഷണം ചെയ്തതിന് ഒരാള് അറസ്റ്റില്. കേബിള് ടിവി ഓപ്പറേറ്ററായ എസ് പളനിസ്വാമിയാണ് അറസ്റ്റിലായത്. കരുമതംപട്ടി സ്വദേശിയായ ഇയാള് രാശി കേബിള് ടിവി ഓപ്പറേറ്ററാണ്. ടിവികെ നേതാവ് മോഹനപ്രിയ നല്കിയ പരാതിയിലാണ് അറസ്റ്റ്.
ഏപ്രില് 11 നായിരുന്നു ജനനായകന്റെ ലീക്കായ പതിപ്പ് പളനിസ്വാമി കേബിള് ടിവിയിലൂടെ സംപ്രേഷണം ചെയ്തത്. ചിത്രത്തിന്റെ എച്ച്ഡി പ്രിന്റ് ലീക്കായ സംഭവത്തിന്റെ ഞെട്ടല് മാറും മുമ്പാണ് കേബിള് ടിവിയിലൂടെ സംപ്രേക്ഷണം നടക്കുന്നതും അതില് ഒരാള് അകത്താകുന്നതും. അതേസമയം പളനിസ്വാമി ഒടിടിയില് സ്ട്രീം ചെയ്യുന്ന സിനിമകളും ചാനലിലൂടെ സംപ്രേഷണം ചെയ്യാറുണ്ടെന്ന് പരാതിയില് പറയുന്നുണ്ട്.
പളനിസ്വാമിയെ കോടതിയില് ഹാജരാക്കി റിമാന്ഡ് ചെയ്തു. ചാനലിന്റെ ഓഫീസില് നിന്നും കമ്പ്യൂട്ടറുകളും ഹാര്ഡ് ഡിസ്കുകളും മറ്റ് ഇലക്ട്രോണിക് ഉപകരണങ്ങളും പൊലീസ് പിടിച്ചെടുത്തിട്ടുണ്ട്. ചാനലിന്റെ ലൈസന്സ് റദ്ദാക്കാന് നിര്ദ്ദേശം നല്കിയതായും പോലീസ് അറിയിച്ചു.
വിജയ് ആരാധകര് നാളുകളായി കാത്തിരിക്കുന്ന ചിത്രമാണ് ജനനായകന്. ജനുവരിയിലായിരുന്നു ചിത്രം റിലീസ് ചെയ്യേണ്ടിയിരുന്നത്. എന്നാല് സെന്സര് ബോര്ഡ് പ്രദര്ശനാനുമതി നല്കാത്തതിനെ തുടര്ന്ന് റിലീസ് നീണ്ടു പോവുകയാണ്. ഈ സാഹചര്യത്തിലാണ് ചിത്രം സോഷ്യല് മീഡിയ വഴി ലീക്കായത്. സംഭവത്തില് ആറ് പേരെ കഴിഞ്ഞ ദിവസം അറസ്റ്റ് ചെയ്തിരുന്നു.
