മലയാളത്തിൽ ഏറ്റവും അധികം പ്രതിഫലം വാങ്ങുന്ന നടിമാരിൽ ഒരാളാണ് മഞ്ജു വാര്യര്. ബാലതാരമായി സാക്ഷ്യം എന്ന സിനിമയിലൂടെ തുടക്കം പിന്നീട് നായികയായി കരുത്തുറ്റ കഥാപാത്രങ്ങള് ചെയ്ത മഞ്ജു, കരിയറിന്റെ പീക്ക് ടൈമിലാണ് ദിലീപിനെ വിവാഹം ചെയ്ത് കുടുംബിനിയായി ഒതുങ്ങിയത്. മകള് മീനാക്ഷിക്കും ദിലീപിനും ഉള്ളിലായിരുന്നു അന്ന് മഞ്ജുവിന്റെ ലോകം. പിന്നീട് വിവാഹജീവിതത്തില് അസ്വാരസ്യങ്ങള് വന്നതോടെ മഞ്ജുവും ദിലീപും വേര്പിരിഞ്ഞു, മകള് മീനാക്ഷി ദിലീപിനൊപ്പവുമായി.
14 വര്ഷത്തെ ഇടവേളയ്ക്ക് ശേഷം മഞ്ജു വാര്യര് മലയാള സിനിമയിലേക്ക് മടങ്ങിയെത്തിയപ്പോഴും ആരാധകര് ഇരുകൈയും നീട്ടി താരത്തെ സ്വീകരിച്ചു. മടങ്ങിവരവില് മലയാളത്തില് മാത്രമല്ല തമിഴിലും മഞ്ജു തിളങ്ങി, പുരസ്കാരങ്ങള് വാരിക്കൂട്ടി. ആ ജൈത്രയാത്ര ഇന്ന് തമിഴിലെയും മലയാളത്തിലെയും മുൻനിര നായകന്മാർക്കൊപ്പം തുല്യ പ്രാധാന്യമുള്ള വേഷങ്ങളിൽ എത്തിനിൽക്കുന്നു.
ഇപ്പോഴിതാ ജീവിതത്തിലെ പ്രതിസന്ധികളിലും വിമർശനങ്ങളിലും പതറാതെ, സമാധാനത്തിനും സ്വന്തം സന്തോഷത്തിനും മുൻഗണന നൽകുന്നതിനെക്കുറിച്ച് മനസ്സുതുറക്കുകയാണ് മഞ്ജു വാര്യര്. ചുറ്റുപാടും നെഗറ്റീവായ കാര്യങ്ങളോ പ്രശ്നങ്ങളോ നടക്കുമ്പോൾ അതിൽ പെട്ടുപോകാതെ മാറിനിൽക്കാൻ പഠിക്കുന്നതാണ് തന്റെ രീതിയെന്ന് മഞ്ജു പറയുന്നു.
‘‘ഒരു പ്രശ്നമുണ്ടാകുമ്പോൾ അതിൽ നിന്ന് ഒരു പടി പിന്നോട്ട് മാറിനിന്നു നോക്കിയാൽ, ആ വിഷയങ്ങൾ എത്രത്തോളം ബാലിശമാണെന്ന് നമുക്ക് എളുപ്പം മനസ്സിലാകും. സാഹചര്യങ്ങളിൽ നിന്ന് ഡിറ്റാച്ച് ചെയ്യാൻ (വികാരങ്ങളില്ലാതെ മാറിനിൽക്കാൻ) കഴിഞ്ഞാൽ ജീവിതം വളരെ ലളിതമാണ്.
ചില സമയങ്ങളിൽ ഞാനും അമിതമായി ചിന്തിക്കാറുണ്ട്. എന്നാൽ പെട്ടെന്ന് തന്നെ യാഥാർത്ഥ്യത്തിലേക്ക് മടങ്ങിവരും. ഓരോ വ്യക്തിയുടെയും സന്തോഷം വ്യത്യസ്തമാണെന്നും അത് കണ്ടെത്തുകയാണ് പ്രധാനം.
മറ്റുള്ളവർ എത്ര ഉപദേശിച്ചാലും സ്വന്തം അനുഭവങ്ങളിലൂടെ മാത്രമേ ഒരാൾക്ക് മാറാൻ സാധിക്കൂ. പ്രത്യേകിച്ചൊരു ധ്യാനമോ പരിശീലനമോ വഴിയല്ല ഞാന് ഇന്നത്തെ രീതിയിൽ എത്തിയത്, സാഹചര്യങ്ങൾ എന്നെ ഇങ്ങനെയാക്കി മാറ്റിയതാണ്. എന്റെ ഈ രീതി ശരിയല്ലെന്ന് കരുതുന്നവരുണ്ട്, എന്നെ വിമർശിക്കുന്നവരുണ്ടെങ്കിൽ അവരുടെ അഭിപ്രായങ്ങളെയും ഞാന് പൂർണ്ണമായി ബഹുമാനിക്കുന്നു...’’ എന്നാണ് മഞ്ജു വാര്യര് പറയുന്നത്. ‘സ്റ്റേ ട്യൂൺഡ് വിത്ത് രമ്യ' എന്ന യൂട്യൂബ് ചാനലിന് നൽകിയ ഏറ്റവും പുതിയ അഭിമുഖത്തിലാണ് ജീവിതത്തെക്കുറിച്ചുള്ള തന്റെ കാഴ്ചപ്പാടുകളെക്കുറിച്ച് വിശദമായി സംസാരിച്ചത്.
സുഹൃത്തുക്കള്ക്കൊപ്പമുള്ള യാത്രകളും ബൈക്ക് റൈഡിംഗും സിനിമയുമൊക്കെയായി ഇന്ന് ജീവിതം ആസ്വദിക്കുകയാണ് മഞ്ജു വാര്യര്. സിനിമകള് പോലെ പരസ്യചിത്രങ്ങളിലും സജീവമാണ് താരം. തെന്നിന്ത്യൻ സിനിമാ ലോകം ‘ലേഡി സൂപ്പർസ്റ്റാർ’ എന്ന് ആദരവോടെ വിളിക്കുന്ന മഞ്ജുവിന്റെ ജീവിതം ഏതൊരു സിനിമാക്കഥയെക്കാളും നാടകീയവും പ്രചോദനാത്മകവുമാണ്. വ്യക്തിജീവിതത്തിലെ വലിയ തകർച്ചകളിൽ നിന്നും വെറുംകൈയോടെ ജീവിതം നടന്നു കയറിയ മഞ്ജു പിന്നീട് ഒരു ഫിനിക്സ് പക്ഷിയെപ്പോലെയാണ് പറന്നു പൊങ്ങിയത്. മലയാളത്തിലെ ഏറ്റവും ഉയർന്ന പ്രതിഫലം വാങ്ങുന്ന താരമായി മഞ്ജു മാറിയത് കഠിനാധ്വാനവും ആത്മവിശ്വാസവും കൊണ്ടാണ്.
