ബോളിവുഡിലെ ഏറ്റവും ആരാധകരുളള താരദമ്പതികളാണ് ആലിയ ഭട്ടും രണ്ബീര് കപൂറും. വെള്ളിത്തിരയിലെ മിന്നും പ്രകടനങ്ങൾ കൊണ്ട് ആരാധകരുടെ ഹൃദയം കീഴടക്കിയ ഇവർ, വ്യക്തിജീവിതത്തിലെ സുന്ദരമായ നിമിഷങ്ങൾ പങ്കുവെച്ചും വാർത്തകളിൽ നിറഞ്ഞുനിൽക്കാറുണ്ട്. അഭിനയമികവ് കൊണ്ടും ലളിതമായ പെരുമാറ്റം കൊണ്ടും ഇന്ത്യൻ സിനിമയിലെ പവർ കപ്പിൾ'എന്ന വിശേഷണം ഇവർ ഇതിനോടകം സ്വന്തമാക്കി കഴിഞ്ഞു.
വർഷങ്ങൾ നീണ്ട സൗഹൃദത്തിനും പ്രണയത്തിനുമൊടുവിൽ 2022 ഏപ്രിലിലാണ് ഇവർ വിവാഹിതരായത്. വളരെ ലളിതമായി നടന്ന വിവാഹചടങ്ങുകളുടെ ചിത്രങ്ങൾ സോഷ്യൽ മീഡിയയിൽ തരംഗമായിരുന്നു. 'ബ്രഹ്മാസ്ത്ര' എന്ന ചിത്രത്തിന്റെ സെറ്റിൽ വെച്ചാണ് ഇവരുടെ പ്രണയം പൂത്തുലഞ്ഞത്. ഇരുവർക്കും റാഹ എന്ന പേരിൽ ഒരു മകളുമുണ്ട്.
ഇപ്പോഴിതാ വിവാഹ വാർഷിക ദിനത്തിൽ ആലിയ ഭട്ട് സോഷ്യൽ മീഡിയയിൽ പങ്കുവച്ച കുറിപ്പാണ് ശ്രദ്ധേയമാകുന്നത്. "അതിവേഗം മുന്നോട്ടു കുതിക്കുന്നതിനും പതറുന്നതിനും ഇടയിൽ, ഒരുപാട് നടത്തങ്ങൾക്കും സംസാരങ്ങൾക്കും ഇടയിൽ... നമ്മൾ നമുക്കായി അതിമനോഹരമായ ഒരു ജീവിതം കെട്ടിപ്പടുത്തു... നീ കൂടെയുണ്ടെങ്കിൽ പകലും രാവും ഒന്നാണ്," എന്ന കുറിപ്പാണ് ആലിയ ഇൻസ്റ്റഗ്രാമിൽ പങ്കുവച്ചിരിക്കുന്നത്. രൺബീറിനൊപ്പമുള്ള ചിത്രങ്ങളും പോസ്റ്റ് ചെയ്തിട്ടുണ്ട്.
ആരാധകരും സെലിബ്രിറ്റികളുമുള്പ്പെടെ നിരവധിപ്പേരാണ് പോസ്റ്റിനു താഴെ ഇരുവര്ക്കും ആശംസകള് കമന്റായി കുറിക്കുന്നത്.രൺബീർ കപൂറിൻ്റെ അമ്മ നീതുവും താരദമ്പതികൾക്ക് ആശംസകൾ അറിയിച്ചുകൊണ്ടുള്ള ചിത്രം പോസ്റ്റ് ചെയ്തിരുന്നു.
