അയല്വാസികള് തമ്മില് അതിരൂക്ഷമായ സംഘര്ഷം നടക്കുന്നു എന്ന സന്ദേശം ലഭിച്ചയുടനെ സ്ഥലത്തെത്തിയ പോലീസ് സംഘം കണ്ടത് തികച്ചും വിചിത്രമായ ഒരു കാഴ്ചയായിരുന്നു. മനുഷ്യര് തമ്മിലുള്ള അതിര്ത്തി തര്ക്കമോ മറ്റ് തര്ക്കങ്ങളോ ആയിരിക്കും പ്രശ്നമെന്ന് കരുതിയ പോലീസിന് മുന്നിലെത്തിയത് 'പൂച്ചകള്' തമ്മിലുള്ള പ്രശ്നമായിരുന്നു. ഒരു വീട്ടിലെ വളര്ത്തുപൂച്ചയായ ആണ്പൂച്ച അയല്വാസിയുടെ പെണ്പൂച്ചയെ ഗര്ഭിണിയാക്കിയതും, തുടര്ന്ന് നാല് കുഞ്ഞുങ്ങള് ജനിച്ചതുമാണ് എല്ലാത്തിനും തുടക്കമിട്ടത്.
തന്റെ പെണ്പൂച്ച പ്രസവിച്ച കുഞ്ഞുങ്ങളുടെ അച്ഛന് ഉത്തരവാദിത്തം ഏറ്റെടുക്കണമെന്നും കുഞ്ഞുങ്ങളെ സ്വീകരിക്കണമെന്നുമായിരുന്നു പെണ്പൂച്ചയുടെ വീട്ടുകാരുടെ വാദം. എന്നാല് ആണ്പൂച്ചയുടെ ഉടമസ്ഥര് ഇതിന് തയ്യാറാവാതെ വന്നതോടെ തര്ക്കം കയ്യാങ്കളിയിലേക്ക് നീങ്ങി. ഒടുവില് പോലീസ് ഇടപെട്ട് രണ്ട് കുടുംബങ്ങളും കുഞ്ഞുങ്ങളെ വളര്ത്താന് നിര്ബന്ധിതരാകേണ്ടതില്ലെന്ന് നിര്ദ്ദേശിക്കുകയും, പകരം പൂച്ചക്കുഞ്ഞുങ്ങളെ സംരക്ഷിക്കാന് മറ്റ് സംവിധാനങ്ങള് ഒരുക്കി പ്രശ്നം പരിഹരിക്കുകയുമായിരുന്നു.
യാസിര് മുസ്താക് എന്ന വ്യക്തി തന്റെ എക്സ് അക്കൗണ്ടിലൂടെ പങ്കുവെച്ച ഈ സംഭവം സോഷ്യല് മീഡിയയില് വലിയ ചര്ച്ചകള്ക്കാണ് വഴിവെച്ചിരിക്കുന്നത്. കുഞ്ഞുങ്ങളെ അമ്മയില് നിന്ന് അകറ്റുന്നത് ക്രൂരതയാണെന്നും, ഇരു വീട്ടുകാരും ചേര്ന്ന് കുഞ്ഞുങ്ങളെ നോക്കണമായിരുന്നു എന്നും ചിലര് അഭിപ്രായപ്പെടുമ്പോള്, പോലീസിന്റെ സമയവും അധ്വാനവും ഇത്തരം നിസ്സാര കാര്യങ്ങള്ക്കായി നഷ്ടപ്പെടുത്തിയതിനെ മറ്റു ചിലര് വിമര്ശിക്കുന്നു. വിദേശ രാജ്യങ്ങളില് ഇന്ത്യക്കാര്ക്ക് നാണക്കേടുണ്ടാക്കുന്ന പെരുമാറ്റങ്ങള് റിപ്പോര്ട്ട് ചെയ്യപ്പെടുന്നതിനിടെ, നാട്ടിലെ ഇത്തരം രസകരമായ കേസുകള് ചിരിക്കും ചിന്തയ്ക്കും വകനല്കുന്നവയാണ്.
