മലയാളത്തിന്റെ മെഗാസ്റ്റാര് മമ്മൂട്ടിയുടെ മകളും യുവതലമുറയിലെ പാന് ഇന്ത്യന് താരമായ ദുല്ഖറിന്റെ സഹോദരിയുമായ സുറുമി പ്രേക്ഷകര്ക്ക് ഏറെയിഷ്ടമുള്ള താരപുത്രിയാണ്. ലൈംലൈറ്റില് നിന്നെല്ലാം അകന്ന് ചിത്രകലയിൽ സ്വന്തമായൊരു ഐഡന്റിറ്റി ഉണ്ടാക്കിയെടുത്ത ആള് കൂടിയാണ് സുറുമി. വാപ്പച്ചിയും അനിയൻ ദുൽഖറുമൊക്കെ അഭിനയത്തിൽ തിളങ്ങുമ്പോൾ സുറുമിയുടെ ലോകത്ത് നിറയുന്നത് നിറങ്ങളും ചിത്രങ്ങളുമാണ്. വരകളുടെ ലോകമാണ് സുറുമിയുടെ പാഷൻ.
ഇപ്പോഴിതാ സുറുമിക്ക് ഹൃദയത്തില് ചാലിച്ച ജന്മദിനാശംസകള് കുറിക്കുകയാണ് ദുല്ഖര് സല്മാന്. ഏറ്റവും മികച്ച ഇത്തയും തന്റെ മകള്ക്ക് ഏറ്റവും മികച്ച അമ്മായിയും ആയതിന് തങ്ങള് സ്നേഹിക്കുന്നുവെന്നാണ് ദുല്ഖര് കുറിച്ചിരിക്കുന്നത്. മാലാഖയായ ഇത്തയെന്നാണ് സുറുമിയെ ദുല്ഖര് വിശേഷിപ്പിച്ചിരിക്കുന്നത്.
‘‘എന്റെ ഏറ്റവും പ്രിയപ്പെട്ട കൂട്ടാളിക്ക് ജന്മദിനാശംസകൾ. ഏറ്റവും മികച്ച ഇത്തയും നല്ല അമ്മായിയും ആയതിന്, നിങ്ങൾ ആയിരിക്കുന്ന എല്ലാത്തിനും, ഞങ്ങളുടെ ജീവിതത്തിൽ നിങ്ങൾ ചെയ്യുന്ന എല്ലാ വേഷങ്ങൾക്കും ഞങ്ങൾ നിങ്ങളെ സ്നേഹിക്കുന്നു. എന്റെ മാലാഖ ഇത്തയ്ക്ക് വീണ്ടും പിറന്നാൾ ആശംസകൾ...’’ എന്നാണ് സുറുമിയുടെ ചിത്രം പങ്കിട്ട് ദുല്ഖര് കുറിച്ചിരിക്കുന്നത്. നിരവധി ആരാധകര് ദുല്ഖറിന്റെ പോസ്റ്റിനു താഴെ സുറുമിക്ക് ആശംസകളും സ്നേഹവും കുറിക്കുന്നുണ്ട്.
ചെന്നൈ സ്റ്റെല്ലാ മേരീസിൽ നിന്നും ഫൈൻ ആർട്സിൽ ബിരുദം നേടിയ സുറുമി ലണ്ടൻ ചെൽസി കോളജ് ഓഫ് ആർട്സിൽ നിന്നും ബിരുദാനന്തരബിരുദവും നേടിയിട്ടുണ്ട്. ഡോ. റെയ്ഹാൻ സയ്യദ് ആണ് സുറുമിയുടെ ഭർത്താവ്.
