മുഖ്യമന്ത്രിയുടെ വാക്കുകള് അനുസരിച്ചതിന്റെ പേരില് തനിക്ക് നാട്ടില് ചീത്തപ്പേരായെന്ന് നടി ശ്രീവിദ്യമുല്ലച്ചേരി. മുഖ്യമന്ത്രിയുടെ വാക്ക് കേട്ട് കൂളിങ് ഗ്ലാസ് വെച്ച് തെയ്യം കാണാന് പോയ അനുഭവമാണ് രസകരമായൊരു വീഡിയോയിലൂടെ ശ്രീവിദ്യ പങ്കുവെച്ചത്. ‘പോയപ്പോ ആര്ക്ക് പോയി, കുഞ്ഞമ്പു നായരുടെ മോള്ക്ക് പോയി’ എന്ന കുറിപ്പോടെയാണ് ശ്രീവിദ്യ വീഡിയോ പങ്കുവെച്ചത്.
‘എത്രയും പ്രിയപ്പെട്ട കേരള മുഖ്യമന്ത്രി പിണറായി വിജയന് സര്, എനിക്ക് നിങ്ങളെ ഭയങ്കര ഇഷ്ടവും ബഹുമാനവുമാണ്. പക്ഷേ ഇന്ന് മുതല് നിങ്ങള് പറയുന്ന ഒരു കാര്യവും ഞാന് അനുസരിക്കില്ല. കാരണം കുറച്ച് ദിവസം മുമ്പ് നിങ്ങളൊരു ഫെയ്സ്ബുക്ക് പോസ്റ്റിട്ടിരുന്നു. ചൂട് കൂടി വരികയാണ്, എല്ലാവരും വെളളം കുടിക്കുക, രാവിലെ പത്ത് മുതല് മൂന്ന് മണി വരെ വെയിലത്ത് ഇറങ്ങാതിരിക്കുക എന്നൊക്കെ പോസ്റ്റിട്ടു. നിങ്ങളോടുളള ബഹുമാനം കാരണം ഞാനത് അനുസരിച്ചു.
അതുകൊണ്ട് നാട്ടിലെ തെയ്യത്തിന് ഞാന് പോയത് ആ പോസ്റ്റില് പറഞ്ഞത് പോലെ സണ് ഗ്ലാസ് ധരിച്ചായിരുന്നു. കാരണം എന്നോട് മുഖ്യമന്ത്രി പറഞ്ഞിട്ടാണ്. ഇപ്പോള് എന്നെപ്പറ്റി നാട്ടില് പറയുന്നത് എന്താണെന്ന് അറിയാമോ? ഓള് വല്യ മമ്മൂട്ടിയായെന്നാ വിചാരം, കണ്ടുവോ? കുഞ്ഞമ്പുവിന്റെ പെണ്ണ് എങ്ങനെ നടന്നിരുന്നതാ ഇപ്പോള് ഓള്ക്ക് ഇത് വച്ചാലെ തെയ്യത്തേ കാണൂ എന്നെല്ലാമാണ്. ഉച്ചയ്ക്ക് രണ്ട് മണിക്കായിരുന്നു തെയ്യം. അപ്പോള് ഇത് വെച്ച് തെയ്യത്തെ നന്നായി തൊഴാമെന്ന് ഞാന് വിചാരിച്ചു. മുഖ്യമന്ത്രി പറഞ്ഞതല്ലേ.
ആ ഫെയ്സ്ബുക്ക് ഇടുമ്പോള് അതിന്റെ താഴെ പറയണ്ടേ, കൂളിങ് ഗ്ലാസ് വച്ച് വരുന്ന പെമ്പിള്ളേരെ കുറ്റം പറയുന്ന നാട്ടുകാര്ക്ക് തക്കതായ ശിക്ഷ കിട്ടുമെന്ന്. അതെന്താ നിങ്ങള് ഇടാത്തത്. ഞാനിപ്പോള് അഹങ്കാരത്തിന് കയ്യും കാലും വച്ച വിത്താണ് എന്റെ നാട്ടില്. ഞാനുണ്ടാക്കിയ എല്ലാ സല്പ്പേരും നിങ്ങള് കളഞ്ഞില്ലേ?’ എന്നായിരുന്നു ശ്രീദേവിയുടെ വാക്കുകള്.
താരത്തിന്റെ പോസ്റ്റിന് താഴെ കമന്റുമായി ആരാധകരെത്തിയിട്ടുണ്ട്. കമന്റുകളും രസകരമാണ്. 'ആ സ്റ്റാര് മാജിക് നിര്ത്തിയപ്പോള് ഈ വര്ഷം ഇനി ചളിയുണ്ടാവില്ല എന്ന് കരുതിയതായിരുന്നു ദാ വീണ്ടും വന്നു, അടുത്ത മന്ത്രി സഭയില് ഇക്കാര്യത്തെ കുറിച്ചു ചര്ച്ച ചെയ്യും കേട്ടോ പേടിക്കണ്ട, മുഖ്യമന്ത്രി രാജിവെക്കണം, 10മണി മുതല് 3മണി വരെ പുറത്ത് ഇറങ്ങാതിരിക്കു എന്നും പറഞ്ഞില്ലേ, അത് അന്നുസരിച്ചാല് പോരായിരുന്നോ' എന്നിങ്ങനെ പോവുകയാണ് കമന്റുകള്. താരങ്ങളും കമന്റ് ചെയ്തിട്ടുണ്ട്.
