ചെറുതോണി: കടുത്ത വൈദ്യുതി പ്രതിസന്ധിക്കിടെ ഇടുക്കി അണക്കെട്ടില് ജലനിരപ്പ് ആശങ്കാജനകമാംവിധം താഴേക്ക്. ഇന്നലെ 2332.62 അടിയാണു ജലനിരപ്പ്. കഴിഞ്ഞ വര്ഷത്തേതിലും 11.52 അടി കുറവ്. കഴിഞ്ഞ വര്ഷം ഇതേദിവസം 2343.14 അടിയായിരുന്നു ജലനിരപ്പ്. വേനല് കടുത്തതോടെ ഒരാഴ്ചയ്ക്കുള്ളില് ആറടിയോളം വെള്ളം കുറഞ്ഞു. വേനല്മഴയിലെ കുറവാണു ജലനിരപ്പ് താഴാന് പ്രധാനകാരണമെന്നു വിദഗ്ധര് പറയുന്നു. കഴിഞ്ഞ 17 ന് 2338.64 അടിയായിരുന്നു ജലനിരപ്പ്. ഒരുവര്ഷം മുമ്പ് ഇതേദിവസം 2347.56 അടി വെള്ളമുണ്ടായിരുന്ന സ്ഥാനത്താണിത്.
കഴിഞ്ഞയാഴ്ച കഴിഞ്ഞ വര്ഷത്തേതിലും ഒന്പതടി വെള്ളത്തിന്റെ കുറവു രേഖപ്പെടുത്തിയിരുന്നു. വരുംദിവസങ്ങളില് വേനല്മഴ കനിഞ്ഞില്ലെങ്കില് ജലനിരപ്പ് വീണ്ടും താഴേക്കുപോകുമെന്നാണ് ഉത്കണ്ഠ. സംസ്ഥാനത്ത് കഴിഞ്ഞ ദിവസങ്ങളില് പല ഭാഗങ്ങളിലും അനുഭവപ്പെട്ട വൈദ്യുതി മുടക്കം അപ്രഖ്യാപിത ലോഡ് ഷെഡ്ഡിങ്ങിന്റെ ഭാഗമായിരുന്നുവെന്നും കെ.എസ്.ഇ.ബി. സമ്മതിച്ചു.
ആവശ്യവും ലഭ്യതയും തമ്മിലുള്ള വലിയ അന്തരവും പ്രസരണ-വിതരണ ശൃംഖലയിലെ അമിത സമ്മര്ദവുമാണ് മുന്കൂട്ടി അറിയിക്കാതെയുള്ള വൈദ്യുതി നിയന്ത്രണത്തിനു കാരണമെന്നും വിശദീകരണം. വൈകിട്ട് ആറുമുതല് രാത്രി 11 വരെ വൈദ്യുതി ഉപയോഗം ഏറ്റവും കൂടുതലുള്ള സമയമാണ്. ഈ സമയങ്ങളില് ഉപയോക്താക്കളുടെ സഹകരണം നിര്ണായകമാണെന്നും കെ.എസ്.ഇ.ബി. അറിയിച്ചു.
പമ്പ് സെറ്റ്, ഇന്ഡക്ഷന് സ്റ്റൗ, വാട്ടര് ഹീറ്റര്, ഇസ്തിരിപ്പെട്ടി, വാഷിങ് മെഷീന്, എയര് കണ്ടീഷണര് തുടങ്ങിയവയുടെ ഉപയോഗം ഈ സമയം പരമാവധി ഒഴിവാക്കണം. വൈദ്യുത വാഹനങ്ങളുടെ ചാര്ജിങ്ങും ഒഴിവാക്കണം. എയര് കണ്ടീഷണറുകള് 24 മുതല് 26 ഡിഗ്രി സെല്ഷ്യസില് ക്രമീകരിക്കുക, ഉപയോഗത്തിലില്ലാത്ത ലൈറ്റുകളും മറ്റ് ഉപകരണങ്ങളും ഓഫ് ചെയ്യുക, ഉപയോഗ സമയം ക്രമീകരിക്കുക തുടങ്ങിയ ചെറിയ ശീലമാറ്റങ്ങള് പോലും പീക്ക് സമയത്തെ സമ്മര്ദം കുറയ്ക്കാന് സഹായിക്കും.
നിലവിലെ സാഹചര്യം മേയ് അവസാനം വരെ തുടരാനിടയുണ്ടെന്നാണ് സൂചന. മണ്സൂണ് ആരംഭിക്കുന്നതോടെ ചൂട് കുറയുകയും വൈദ്യുതി ആവശ്യകത താഴുകയും ചെയ്യുന്നതോടെ നിലവിലെ സമ്മര്ദം കുറയുമെന്നാണ് പ്രതീക്ഷ. വൈദ്യുതി പ്രതിസന്ധി തരണം ചെയ്യാന് പൊതുജനങ്ങളുടെ സഹകരണം അനിവാര്യമാണെന്നും, ഉത്തരവാദിത്വപരമായ വൈദ്യുതി ഉപയോഗത്തിലൂടെ ഈ അവസ്ഥ മറികടക്കാമെന്നുമാണ് കെ.എസ്.ഇ.ബിയുടെ നിലപാട്. വൈദ്യുതി ലഭ്യത സാധാരണ നിലയിലാകുന്നതോടെ നിലവിലുള്ള നിയന്ത്രണങ്ങള് ഘട്ടംഘട്ടമായി പിന്വലിക്കും.
