മൂന്നാര്: മാങ്കുളത്തു കാണാതായ വാര്ഡ് മെമ്പറെ ആളൊഴിഞ്ഞ വീട്ടിലെ ശുചിമുറിയില് അവശനിലയില് കണ്ടെത്തി. മാങ്കുളം ഗ്രാമപഞ്ചായത്ത് നാലാം വാര്ഡ് അംഗം ധന്യ ഗണേശനെയാണ് ചിക്കനംകുടിക്കു സമീപത്തെ വീട്ടിലെ ശുചിമുറിയില്നിന്നു കണ്ടെത്തിയത്. ആരോഗ്യനില വഷളായതിനെ ത്തുടര്ന്ന് ഇവരെ അടിമാലി താലൂക്ക് ആശുപത്രിയില് പ്രവേശിപ്പിച്ചു.
കുടുംബപ്രശ്നങ്ങളെത്തുടര്ന്ന് കഴിഞ്ഞ ബുധനാഴ്ചയാണ് ധന്യ വീടുവിട്ടിറങ്ങിയത്. പിന്നീട് അന്പതേക്കറിലുള്ള സഹോദരിയുടെ വീട്ടില് ഇവര് എത്തിയിരുന്നു. അവിടെനിന്ന് വീട്ടിലേക്കു മടങ്ങുകയാണെന്നു പറഞ്ഞ് പുറപ്പെട്ടെങ്കിലും ധന്യ വീട്ടിലെത്തിയില്ല. രണ്ടു ദിവസത്തിനുശേഷം ഇവരെ കാണാനില്ലെന്ന് പറഞ്ഞ് ഭര്ത്താവ് അനീഷ് പോലീസില് പരാതി നല്കി. ഇതേത്തുടര്ന്ന് മാങ്കുളത്തും പരിസര പ്രദേശങ്ങളിലും ഡ്രോണ് ഉപയോഗിച്ചും ഡോഗ് സ്ക്വാഡിന്റെ സഹായത്തോടെയും പോലീസ് പരിശോധന നടത്തിയിരുന്നു.
ഇതിനിടയിലാണ് ചിക്കനാംകുടിക്കു സമീപമുള്ള ആളൊഴിഞ്ഞ വീട്ടിലെ ശുചിമുറിയില് ധന്യയെ കണ്ടെത്തിയത്. 2020 സെപ്റ്റംബറില് കൊല്ലപ്പെട്ട ആദിവാസിയായ ലക്ഷ്മണന്റെ വീടാണിത്. വീട്ടില്വച്ച് ലക്ഷ്മണനെ വെട്ടിക്കൊലപ്പെടുത്തുകയായിരുന്നു. അതിനുശേഷം ഈ വീട് അടഞ്ഞുകിടക്കുകയായിരുന്നു. വീടിനുപുറത്ത് പൊട്ടിപ്പൊളിഞ്ഞുകിടന്ന ശുചിമുറിക്കുള്ളിലാണ് പഞ്ചായത്തംഗത്തെ പോലീസ് ഡോഗ് സ്ക്വാഡ് കണ്ടെത്തിയത്. അതേസമയം സംഭവത്തില് ദുരൂഹത ആരോപിച്ച് മാങ്കുളം പഞ്ചായത്ത് പ്രസിഡന്റ് സാജു ജോസ് രംഗത്തെത്തി.
ധന്യ ഗണേശനെ കണ്ടെത്തിയ ശുചിമുറിയില് കഴിഞ്ഞദിവസം വൈകിട്ടും പരിശോധന നടത്തിയതാണെന്ന് അദ്ദേഹം പറഞ്ഞു. ഇതേസ്ഥലത്ത് പിറ്റേന്ന് യുവതിയെ കണ്ടെത്തിയതില് ദുരൂഹതയുണ്ട്. ഇതേക്കുറിച്ച് പോലീസ് അന്വേഷിക്കണമെന്നും പ്രസിഡന്റ് ആവശ്യപ്പെട്ടു.
