മലയാളത്തിന്റെ സ്വന്തം താരരാജാവായ മോഹന്ലാലിന്റെ സിനിമാവിശേഷങ്ങള് മാത്രമല്ല കുടുംബവിശേഷങ്ങളും ആരാധകര് ആഘോഷമാക്കാറുണ്ട്. താരത്തിന്റെ ഭാര്യ സുചിത്രയും മക്കളായ പ്രണവും വിസ്മയയുമൊക്കെ സ്വന്തം കുടുംബാംഗങ്ങളാണെന്ന തരത്തിലാണ് ആരാധകര് സ്നേഹിക്കാറുള്ളത്. സുഖത്തിലും ദുഃഖത്തിലുമടക്കം പങ്കുചേര്ന്ന് മോഹന്ലാലിന്റെ ഭാര്യയായി സുചിത്ര ജീവിതം തുടങ്ങിയിട്ട് 38 വര്ഷം പൂര്ത്തിയാക്കിയിരിക്കുകയാണ്. എല്ലാവര്ഷവും തന്റെ സ്വന്തം സുചിക്ക് ഹൃദയത്തില് നിന്നുള്ള ആശംസകളാണ് മോഹന്ലാല് കുറിക്കാറുള്ളത്.
ഇപ്പോഴിതാ ഇത്തവണയും പതിവുപോലെ ഹൃദ്യമായ ഒരു കുറിപ്പിലൂടെയാണ് ലാലേട്ടൻ സുചിത്രയ്ക്ക് ആശംസകള് പങ്കിടുന്നത്. തങ്ങളുടെ ദാമ്പത്യ ജീവിതം 38-ാം വര്ഷത്തിലേക്ക് കടക്കുന്ന സന്തോഷം ന്യൂയോർക്കിലെ സ്റ്റാച്യു ഓഫ് ലിബർട്ടിയുടെ മുന്നിൽ സുചിയെ ചേര്ത്തുപിടിച്ചു നില്ക്കുന്ന ചിത്രം പങ്കുവെച്ചുകൊണ്ടാണ് മോഹന്ലാല് പങ്കുവച്ചിരിക്കുന്നത്.
‘‘38 വര്ഷങ്ങളുടെ സ്നേഹയാത്ര... ഇന്നും ഓരോ നിമിഷവും ഒരു പുതിയ തുടക്കം പോലെ സുന്ദരം...’’ എന്ന ക്യാപ്ഷനൊപ്പം ഒരു ബോട്ടിൽ ഇരുവരും ചേർന്നുനിൽക്കുന്ന മനോഹരമായ ചിത്രവും മോഹന്ലാല് പങ്കുവച്ചിട്ടുണ്ട്. നിരവധി ആരാധകരും സഹപ്രവര്ത്തകരം താരത്തിന് ആശംസകളും സ്നേഹവും കമന്റുകളിലൂടെ പങ്കുവയ്ക്കുന്നുണ്ട്. പതിറ്റാണ്ടുകൾ നീണ്ട ദാമ്പത്യത്തെ ‘ഒരു തുടക്കം പോലെ ...’ എന്ന് മോഹന്ലാല് വിശേഷിപ്പിച്ചിരിക്കുന്നതാണ് ആരാധകര് ഏറ്റെടുക്കുന്നത്.
1988 ഏപ്രിൽ 28-നായിരുന്നു ഇരുവരുടെയും വിവാഹം. തമിഴിലെ പ്രശസ്ത നിര്മാതാവ് കെ.ബാലാജിയുടെ മകളാണ് സുചിത്ര. മോഹൻലാലിന്റെ കടുത്ത ആരാധികയായിരുന്ന സുചിത്രക്ക് താരത്തോട് പ്രണയം തോന്നുകയായിരുന്നു. അഭിനയിച്ച സിനിമകള് കണ്ടും മോഹന്ലാലിന് കത്തുകൾ അയച്ചും തുടങ്ങിയ ആ ഇഷ്ടം പിന്നീട് പ്രണയത്തിലേക്ക് എത്തുകയായിരുന്നു. മോഹൻലാലിന്റെ കരിയറിലെ വലിയ വിജയങ്ങളിലും പ്രതിസന്ധികളിലും കരുത്തായി സുചിത്ര എന്നും കൂടെയുണ്ടായിരുന്നു. രണ്ടാളും ഇപ്പോള് അമേരിക്കയില് അവധിക്കാലം ആസ്വദിക്കുകയാണ്.
ലാലിന്റെ സിനിമകള് പോലെ വിവാഹവും ആരാധകര് ആഘോഷമാക്കിയിരുന്നു. അന്ന് തിരുവനന്തപുരത്തെ ആ വിവാഹവേദിയിലേക്ക് ഒഴുകിയെത്തിയ ജനക്കൂട്ടം ഇപ്പോഴും സോഷ്യല് മീഡിയ റീല്സില് നിറയാറുണ്ട്. വിവാഹത്തിന്റെ ചിത്രങ്ങളും വീഡിയോയും സോഷ്യല്മീഡിയ ആഘോഷിക്കാറുണ്ട്. തനിക്കെപ്പോഴും കരുത്തായി നില്ക്കുന്ന സുചിത്ര തന്റെ ഭാഗ്യമാണെന്ന് മോഹന്ലാല് പലപ്പോഴും പറഞ്ഞിട്ടുണ്ട്.
