റാഞ്ചി: പണത്തിനോടും ആഡംബര ജീവിതത്തിനോടുമുള്ള അതിരില്ലാത്ത മോഹം മന:സാക്ഷിയെ ഞെട്ടിക്കുന്ന ഒരു കൊലപാതകത്തിനു കാരണമായ വാർത്തയാണ് ജാർഖണ്ഡിലെ റാഞ്ചിയിൽ നിന്നും പുറത്തുവരുന്നത്. 45 ലക്ഷം രൂപയും പിതാവിന്റെ ജോലിയും കൈക്കലാക്കാൻ വേണ്ടി 17 വയസ്സുകാരിയായ ദത്തുപുത്രിയും കാമുകനും ചേർന്ന് അമ്മയായ നഹീദ പർവീണിനെ ശ്വാസം മുട്ടിച്ചു കൊലപ്പെടുത്തി.
നഹീദ പർവീണിന്റെ ഭർത്താവ് വൈദ്യുതി വകുപ്പിലെ ജീവനക്കാരനായിരുന്നു. നാല് വർഷം മുൻപ് അദ്ദേഹം മരിച്ചപ്പോൾ ലഭിച്ച 45 ലക്ഷം രൂപയുടെ ഇൻഷുറൻസ് തുക നഹീദയുടെ പക്കലുണ്ടായിരുന്നു. ഇതിന്റെ നോമിനി മകളായിരുന്നു. തന്റെ 20-കാരനായ കാമുകൻ അർബാസ് ഖാന് മകൾ നിരന്തരം പണം നൽകിയിരുന്നു. ഇത് നഹീദ തടഞ്ഞതോടെയാണ് മകളും കാമുകനും ചേർന്ന് കൊലപാതകം ആസൂത്രണം ചെയ്തത്.
ഏപ്രിൽ 24-ന് രാത്രിയിലാണ് നാടിനെ നടുക്കിയ ഈ ക്രൂരകൃത്യം നടന്നത്. കാമുകനും മറ്റ് മൂന്ന് കൂട്ടുകാർക്കും കൊലപാതകം നടത്തുന്നതിനായി മകൾ 12 ലക്ഷം രൂപ വാഗ്ദാനം ചെയ്തു. നഹീദ ഉറങ്ങിക്കിടക്കുമ്പോൾ തലയിണ ഉപയോഗിച്ച് ശ്വാസം മുട്ടിച്ചായിരുന്നു കൊലപാതകം. മൃതദേഹം പിന്നീട് വീട്ടിലെ ഡീപ് ഫ്രീസറിലേക്ക് മാറ്റി. തെളിവ് നശിപ്പിക്കാനായി രക്തം പുരണ്ട കിടക്ക വീടിന് പുറത്ത് കാട്ടിൽ ഒളിപ്പിച്ചു.
പിറ്റേദിവസം രാവിലെ അമ്മ ബാത്ത്റൂമിൽ വീണു മരിച്ചുവെന്ന് പെൺകുട്ടി ബന്ധുക്കളെ അറിയിച്ചു. തുടർന്ന് മൃതദേഹം സംസ്കരിക്കുകയും ചെയ്തു. എന്നാൽ നഹീദയുടെ കഴുത്തിലെ മുറിവുകൾ കണ്ട് സംശയം തോന്നിയ സഹോദരൻ പോലീസിൽ പരാതി നൽകി. തുടർന്ന് പോലീസ് നടത്തിയ അന്വേഷണത്തിൽ ഞെട്ടിക്കുന്ന വിവരങ്ങൾ പുറത്തുവരികയായിരുന്നു.
കാമുകൻ അർബാസിനെയും കൂട്ടുകാരെയും ബീഹാറിലെ ഗയയിൽ നിന്ന് പോലീസ് പിടികൂടി. ചോദ്യം ചെയ്യലിൽ പെൺകുട്ടി കുറ്റം സമ്മതിച്ചു. പണത്തിനും ആഡംബര ജീവിതത്തിനുമായി അമ്മയെ ഒഴിവാക്കാൻ തങ്ങൾ തീരുമാനിച്ചതാണെന്ന് അവൾ വെളിപ്പെടുത്തി.
പണം മാത്രമല്ല, പിതാവ് മരിച്ചതിനെ തുടർന്ന് ലഭിക്കേണ്ട ജോലിയും മറ്റ് വസ്തുവകകളും തട്ടിയെടുക്കുകയായിരുന്നു ഇവരുടെ ലക്ഷ്യം. നിലവിൽ പെൺകുട്ടിയെ കസ്റ്റഡിയിലെടുക്കുകയും കാമുകനടക്കം രണ്ടുപേരെ പോലീസ് അറസ്റ്റ് ചെയ്യുകയും ചെയ്തിട്ടുണ്ട്. കൂടുതൽ അന്വേഷണം നടക്കുന്നു.
