ബജാജ് ഓട്ടോ, ചേതക് ഇവിയെ പുതുക്കി പണിത് വിപണിയിലെത്തിച്ചിരിക്കുകയാണ് ഇപ്പോള്. പുതിയ ഫീച്ചറുകള്, പെര്ഫോമന്സ് അപ്ഗ്രേഡുകള്, വേരിയന്റ് നിരയ്ക്ക് പുതിയ പേര് എന്നിവ അവതരിപ്പിച്ചുകൊണ്ടുള്ള സമഗ്രമായ ഒരു അപ്ഡേറ്റാണ് പ്രഖ്യാപിച്ചിരിക്കുന്നത്. 2026 ബജാജ് ചേതക് ശ്രേണി ഇപ്പോള് C സീരീസ് വകഭേദങ്ങളിലാവും ലഭ്യമാവുക. അതായത് C 35, C 30, C 25 എന്നിങ്ങനെ മൂന്ന് നിരകളായാണ് ഇത് ക്രമീകരിച്ചിരിക്കുന്നത്.
ഇവിയിലെ C 35 01 ഫ്ലാഗ്ഷിപ്പ് മോഡലിലേക്ക് ഗൂഗിള് മാപ്സ് ഇന്റഗ്രേഷന് കൊണ്ടുവന്നും ശ്രദ്ധേയമാണ്. മുമ്പ് വാഗ്ദാനം ചെയ്തിരുന്ന പ്രൊപ്രൈറ്ററി മാപ്പിംഗ് സൊല്യൂഷന് പകരമായി കൂടുതല് പരിചിതമായ നാവിഗേഷന് എക്സ്പീരിയന്സിന് വേണ്ടിയാണ് ഈ ഫീച്ചര് അവതരിപ്പിച്ചിരിക്കുന്നത്. ഇതോടൊപ്പം ബജാജ് ഇലക്ട്രിക് സ്കൂട്ടറിന്റെ മുഴുവന് ശ്രേണിയുടെയും ടോപ്പ് സ്പീഡും മെച്ചപ്പെടുത്തിയിട്ടുണ്ടെന്നാണ് കമ്പനി അവകാശപ്പെടുന്നത്. ചേതക് ഇവിയിലെ C 35 01, C 35 02 വേരിയന്റുകള്ക്ക് ഇപ്പോള് പരമാവധി 80 കിലോമീറ്റര് വേഗത വരെ കൈയെത്തിപ്പിടിക്കാനാവും. മുമ്പ് ഇവയ്ക്ക് 73 കിലോമീറ്റര് ടോപ്പ് സ്പീഡായിരുന്നു ഉണ്ടായിരുന്നത്. C 35 03, C 30 01 പതിപ്പുകള്ക്ക് 63 കിലോമീറ്ററില് നിന്ന് 70 കിലോമീറ്ററായി ടോപ്പ് സ്പീഡ് ഉയര്ത്തിയിട്ടുമുണ്ട്. അതേസമയം ചേതക് ഇലക്ട്രിക് സ്കൂട്ടറിന്റെ C 25 01 ഇപ്പോള് മുമ്പത്തെ 55 കിലോമീറ്റര് വേഗതയില് നിന്ന് 60 കിലോമീറ്റര് വേഗതയും കൈവരിക്കാന് പാകമാക്കിയിട്ടുണ്ട്.
ഇവിയുടെ ചാര്ജിംഗ് സമയവും മെച്ചപ്പെട്ടിട്ടുണ്ട്. C 30 01 ഇപ്പോള് 2 മണിക്കൂര് 55 മിനിറ്റിനുള്ളില് പൂജ്യത്തില് നിന്ന് 80 ശതമാനമായി ചാര്ജ് ചെയ്യാന് സാധിക്കും. മുമ്പത്തെ 3 മണിക്കൂര് 50 മിനിറ്റുകളില് നിന്ന് ഗണ്യമായ കുറവാണിത്. മുമ്പത്തേതിനേക്കാള് ഏകദേശം ഒരു മണിക്കൂര് വേഗത്തില് ഇപ്പോള് മോഡല് ചാര്ജ് ചെയ്യാനാവുമെന്നത് ആശ്വാസകരമായ കാര്യമാണ്. സ്പോര്ട്സ്, ഇക്കോ ഫീച്ചര് എന്നിവ ഉള്പ്പെടുന്ന റൈഡ് മോഡുകള്, ഹില് ഹോള്ഡ് അസിസ്റ്റ് എന്നിവ മുമ്പ് തിരഞ്ഞെടുത്ത വേരിയന്റുകളില് പണമടച്ചുള്ള ആഡ്-ഓണുകളായി ലഭ്യമായിരുന്നു. എന്നാല് C 35, C 30 സീരീസുകളിലുടനീളം ഇവ സ്റ്റാന്ഡേര്ഡ് ഫീച്ചറുകളാക്കി മാറ്റിയിരിയ്ക്കുകയാണ് ബജാജ്.
ഇലക്ട്രിക് സ്കൂട്ടറിന്റെ ഓവര്-ദി-എയര് അപ്ഡേറ്റ് ശേഷിയും വികസിപ്പിച്ചിട്ടുണ്ട്. C 35 01, C 35 02 എന്നിവയ്ക്ക് ഇപ്പോള് സോഫ്റ്റ്വെയര് മെച്ചപ്പെടുത്തലുകള്, പെര്ഫോമന്സ് ഒപ്റ്റിമൈസേഷനുകള്, പുതിയ ഫീച്ചറുകള് എന്നിവ റിമോട്ടായി സ്വീകരിക്കാന് കഴിയും. പുതിയ അപ്ഡേറ്റുകള്ക്കൊപ്പം ബജാജ് C30, C35 വേരിയന്റുകളുടെ വില വേരിയന്റിനെ ആശ്രയിച്ച് ഏകദേശം 3,000 മുതല് 5,000 രൂപ വരെ വര്ധിപ്പിച്ചിട്ടുണ്ട്. 91.504 രൂപ മുതലാണ് 2026 മോഡല് ബജാജ് ചേതക് ഇവിയുടെ എക്സ്ഷോറൂം വില ആരംഭിക്കുന്നത്.
