മലപ്പുറം: കോണ്ഗ്രസിലെ മുഖ്യമന്ത്രി ചര്ച്ചകള്ക്കിടെ മുസ്ലിം ലീഗിനെതിരെ മലപ്പുറം കോട്ടക്കലില് ഫ്ളക്സുകള്. ഉമ്മന് ചാണ്ടിയെ പുറകില് നിന്ന് കുത്തിയ വി ഡി സതീശന് പിആര് വര്ക്കിലൂടെ പാര്ട്ടിയെ മണ്ടന്മാര് ആക്കുകയാണെന്നും വിമര്ശനമുണ്ട്. 'മുഖ്യമന്ത്രിയെ കോണ്ഗ്രസ് ഹൈക്കമാന്ഡ് തീരുമാനിക്കട്ടെ, നമ്മുടെ നേതാക്കള് വി ഡി സതീശന്റെ പിആര് ചതിക്കുഴിയില് വീഴാതിരിക്കാന് ശ്രദ്ധിക്കണം' എന്നെഴുതിയാണ് ഫ്ളക്സ്.
പച്ചപ്പട മലപ്പുറം എന്ന പേരിലാണ് ഫ്ളക്സ് ബോര്ഡ് പ്രത്യക്ഷപ്പെട്ടത്. എറണാകുളം കങ്ങരപ്പടിയിലും , തൊടുപുഴ പട്ടയംകവലയ്ക്ക് സമീപവും കണ്ണൂര് ശ്രീകണ്ഠപുരത്തും 'പട നയിച്ചവന് നാട് നയിക്കും' എന്നാണ് ഫ്ളക്സിലെ വാചകം. വി ഡി സതീശന്റെ പൂര്ണ്ണകായ ചിത്രത്തോടൊപ്പം 'നിലപാടിന്റെ രാജകുമാരന് അഭിവാദ്യം' എന്നും വാചകമുണ്ട്.
കോണ്ഗ്രസിലെ മുഖ്യമന്ത്രി ചര്ച്ച വിവാദമായി പുരോഗമിക്കുന്നതിനിടെയാണ് വീണ്ടും ഫ്ളക്സ് ഉയര്ന്നത്. ഇതിനിടെയാണ് വി ഡി സതീശന് പിന്തുണയുമായി മുസ്ലിം ലീഗ് രംഗത്ത് വന്നത്. എക്സിറ്റ് പോളില് യുഡിഎഫിന്റെ മുഖ്യമന്ത്രി സ്ഥാനത്തേക്ക് ഏറ്റവുമധികം പിന്തുണ കിട്ടിയത് വി ഡി സതീശനാണെന്നും അതിന്റെ അടിസ്ഥാനത്തില് ജനങ്ങളുടെ അഭിപ്രായം പരിഗണിച്ചുവേണം മുഖ്യമന്ത്രി ആരാകണം എന്ന തീരുമാനം വരേണ്ടത് എന്നും ലീഗ് സംസ്ഥാന അധ്യക്ഷന് സാദിഖലി തങ്ങള് പറഞ്ഞിരുന്നു.
