മെയ്, ചിരിയുടെ മാസമാണ്! കാരണം ലോക ചിരിദിനം ഈ മാസത്തിലാണ്. ചിരിയിലൂടെ ലോകമെമ്പാടും സന്തോഷം, സാഹോദര്യം, സമാധാനം എന്നിവ പ്രോത്സാഹിപ്പിക്കുക എന്നതാണ് ഈ ദിനത്തിന്റെ പ്രധാന ലക്ഷ്യം. എന്നാൽ, ഈ ദിനത്തിന് ഇന്ത്യയുമായി അടുത്ത ബന്ധമുണ്ട്.
മുംബൈയിലെ മദൻ കതാരിയ എന്ന ഡോക്ടറാണ് ചിരിദിനത്തിന് തുടക്കമിടുന്നത്. 1998 -ൽ ആയിരുന്നു ലോകത്ത് ആദ്യമായി ചിരിദിനം അരങ്ങേറിയത്. തുടർന്ന് മെയ് മാസത്തിലെ ആദ്യത്തെ ഞായറാഴ്ച ലോക ചിരിദിനമായി ആചരിച്ചുവരുന്നു.
ചിരി യോഗ എന്ന ശാഖ വികസിപ്പിച്ചെടുത്തത് ഡോ.കതാരിയ ആണ്. തമാശ കാരണമല്ലാതെ മന:പൂർവമുള്ള ചിരി ആരോഗ്യത്തെ പരിപാലിക്കും എന്നാണ് ചിരി യോഗ വിദഗ്ധർ അവകാശപ്പെടുന്നത്. ലോകമെമ്പാടുമുള്ള ചിരി ക്ലബ്ബുകളും ഈ ആശയം പിന്തുടരുന്നു. കൃത്രിമ ചിരി പരിശീലിച്ച് അത് സ്വാഭാവിക ചിരിയാക്കി മാറ്റാം എന്നാണ് ചിരിയോഗയുടെ പിന്തുടർച്ചക്കാർ അഭിപ്രായപ്പെടുന്നത്. അതിനാൽ, ചിരിക്കൂ, ചിരികൊണ്ട് ഒന്നും നഷ്ടപ്പെടാനില്ല, നേട്ടങ്ങളേ ഉള്ളൂ!
ചിരിക്കുന്നതിലൂടെ കോർട്ടിസോൾ അടക്കമുള്ള സ്ട്രെസ് ഹോർമോണുകളെ വരുതിയിലാക്കുകയും സമ്മർദം കുറയ്ക്കുകയും ചെയ്യാം. ചില ആന്റിബോഡികൾ ഉത്പാദിപ്പിക്കപ്പെടുന്നതിലൂടെ രോഗപ്രതിരോധശേഷി വർധിപ്പിക്കാം. എൻഡോർഫിനുകൾ പുറത്തുവിടുന്നതിലൂടെ വേദനയ്ക്ക് കുറവുണ്ടാകും. മൂഡ് മെച്ചപ്പെടുത്താനും ചിരി സഹായകമാവുന്നു.
