മലപ്പുറം: കേരളാ നിയമസഭാ തെരഞ്ഞെടുപ്പില് മുസ്ലിംലീഗിനിത് ചരിത്രത്തിലെ ഏറ്റവും വലിയ വിജയം. മുന്പ് ഉമ്മന്ചാണ്ടി സര്ക്കാറില് 20 നിയമസഭാ സമാജികരുണ്ടായിരുന്നു. ഇത്തവണ 22. കഴിഞ്ഞ സഭയില് 15 പേരായിരുന്നു. ഇതുവരെ വിജയം സ്വപ്നം കാണാന്പോലും കഴിയാതിരുന്ന പേരാമ്പ്രയില് ആദ്യമായാണു ലീഗ് സ്ഥാനാര്ഥി വിജയിക്കുന്നത്. ഇതിനു പുറമെ നേരത്തെ ലീഗ് സ്ഥാനാര്ഥികള് വിജയിക്കുകയും പിന്നീടു നഷ്ടമാകുകയും ചെയ്ത തിരുവമ്പാടി, കുറ്റ്യാടി, കുന്നമംഗലം, കോഴിക്കോട് സൗത്ത്, താനൂര്, കളമശേരി എന്നിവിടങ്ങള് ഇത്തവണ തിരിച്ചു പിടിച്ചു. ഇത്തവണ മുഴുവന് സ്ഥാനാര്ഥികളും ഭൂരിപക്ഷം ഉയര്ത്തുകയും ചെയ്തു.
അതേ സമയം സംസ്ഥാനത്തെ പ്രതിപക്ഷമില്ലാത്ത ഒരേ ഒരു ജില്ലാപഞ്ചായത്തായ മലപ്പുറത്ത് നിയമസഭയിലേക്കും എല്.ഡി.എഫ്. പ്രതിനിധികളില്ല. ആകെയുള്ള 16 നിയോജക മണ്ഡലങ്ങളും തൂത്തു വാരിയാണ് യു.ഡി.എഫ്. ചരിത്ര വിജയം കുറിച്ചത്. മുസ്്ലിംലീഗ് മലപ്പുറത്തു മത്സരിച്ച 12 മണ്ഡലങ്ങളിലും മികച്ച വിജയം നേടി. മുസ്്ലിംലീഗ് ദേശീയ ജനറല് സെക്രട്ടറി പി.കെ. കുഞ്ഞാലിക്കുട്ടി കേരള ചരിത്രത്തില് ഏറ്റവും വലിയ ഭൂരിപക്ഷം (85372) നേടി. യു.ഡി.എഫിന്റെ പച്ചക്കോട്ടയായി മലപ്പുറത്തെ വിശേഷിപ്പിക്കുമ്പോഴും സമ്പൂര്ണ ആധിപത്യം നേടാന് മുമ്പൊന്നും യു.ഡി.എഫിന് സാധിച്ചിരുന്നില്ല. പൊന്നാനിയും തവനൂരും കാലങ്ങളായി എല്.ഡി.എഫ് കൈയടക്കിയ മണ്ഡലങ്ങളായിരുന്നു.
പത്തുവര്ഷമായി എല്.ഡി.എഫ്. കൈയടക്കിയ താനൂര് മണ്ഡലം ഇത്തവണ എം.എസ്.എഫിന്റെ കരുത്തുറ്റ നേതാവ് പി.കെ. നവാസിലൂടെ യു.ഡി.എഫ്. തിരിച്ചു പിടിച്ചു. മുന് മന്ത്രി കെ.ടി. ജലീലിന് ഡി.സി.സി. പ്രസിഡന്റ് വി.എസ്. ജോയിയോട് പരാജയം ഏറ്റുവാങ്ങേണ്ടിവന്നു. പൊന്നാനിയില് മുന് വഖഫ് ബോര്ഡ് ചെയര്മാന് എം.കെ. സക്കീര് യു.ഡി.എഫ്. സ്ഥാനാര്ഥി കെ.പി. നൗഷാദിനോട് ദയനീയമായി പരാജയപെട്ടു. കുഞ്ഞാലിക്കുട്ടിയുടെ ഭുരിപക്ഷം കഴിഞ്ഞാല് തിരൂരങ്ങാടി നിയോജക മണ്ഡലത്തില് പി.എം.എ. സമീര് നേടിയ വിജയം മറ്റൊരു ചരിത്രം കൂടിയാണ്. 63387 വോട്ടിന്റെ ലീഡിലാണ് സമീര് വിജയരഥത്തിലേറിയത്.
ഇതിനു പുറമെ അഞ്ച് എം.എല്.എമാര് ജില്ലയില് അര ലക്ഷത്തിലധികം വോട്ടിന്റെ ഭൂരിപക്ഷത്തിന് വിജയം നേടി. മഞ്ചേരിയില് അഡ്വ. എം. റഹ്മത്തുല്ല (57887), കൊണ്ടോട്ടിയില് ടി.പി. അഷ്റഫലി (56017), കോട്ടക്കലില് പ്രഫ. കെ.കെ. ആബിദ് ഹുസൈന് തങ്ങള് (52216), വള്ളിക്കുന്നില് ടി.വി. ഇബ്രാഹീം (51289) എന്നിങ്ങനെയാണ് ഭൂരിപക്ഷ നില. നിലമ്പൂരില് ഉപതെരഞ്ഞെടുപ്പിലെ ഭൂരിപക്ഷം ഇരട്ടിയായുയര്ത്താന് (54851) ഇത്തവണ ആര്യാടന് ഷൗക്കത്തിനായതും ചരിത്ര മുന്നേറ്റമാണ്. 2021ലെ നിയമസഭാ തെരഞ്ഞെടുപ്പില് ഫോട്ടോഫിനിഷില് നൂറില് താഴെ വോട്ടിനായിരുന്നു നജീബ് കാന്തപുരത്തിന് പെരിന്തല്മണ്ണയില് ജയിക്കാനായതെങ്കില് ഈ തെരഞ്ഞെടുപ്പില് അദ്ദേഹം തന്റെ ഭൂരിപക്ഷം 32000 കടത്തി.
ഏറനാട്, മങ്കട, വേങ്ങര, വണ്ടൂര്, തുടങ്ങിയ മറ്റു മണ്ഡലങ്ങളിലെ വിജയം മണ്ഡലം കണ്ട ഏറ്റവും വലിയ മുന്നേറ്റമാണ്. കോഴിക്കോട് പേരാമ്പ്രയില് ഇടതുമുന്നണി കണ്വീനര് ടി.പി. രാമകൃഷ്ണനെ പിന്നിലാക്കിയാണു ലീഗ് സ്ഥാനാര്ഥി ഫാത്തിമ തഹലിയ വിജയിച്ചത്. മുസ്ലിംലീഗിന്റെ ആദ്യ വനിതാ എം.എല്.എ. കൂടിയായി ഇതോടെ ഫാത്തിമ മാറി. മുമ്പും വനിതാ സ്ഥാനാര്ഥികളെ ലീഗ് പരിഗണിച്ചിരുന്നെങ്കിലും വിജയം കണ്ടിരുന്നില്ല. കാസര്ഗോഡ്ജില്ലയില് മഞ്ചേശ്വരം മണ്ഡലത്തില് എ.കെ.എം. അഷ്റഫും കാസര്ഗോഡ് കല്ലട്ര മായിന് ഹാജിയും മികച്ച വിജയം നേടി.
