കണ്ണൂര്: കോളയാട് പഞ്ചായത്തിലെ ഈരായിക്കൊല്ലിയില് പിണറായി വിജയനും എം.വി.ഗോവിന്ദനുമെതിരെ ഫ്ളക്സ് ബോര്ഡ്. പിണറായി വിജയന്റെയും എം.വി. ഗോവിന്ദന്റെയും ചിത്രത്തില് തെറ്റ് എന്ന് അടയാളപ്പെടുത്തുകയും പാര്ട്ടിയാണ് വലുത് നേതാക്കളല്ല എന്ന് എഴുതുകയും ചെയ്തിട്ടുണ്ട്.എം. സ്വരാജിന്റെയും പി. ജയരാജന്റെയും ചിത്രം വച്ച് ഇനി നയിക്കാന് ഇവരുണ്ടെങ്കില്, കൂടെ ഞങ്ങളുമുണ്ട് എന്നും എഴുതിയിട്ടുണ്ട്. ചെങ്കോട്ടമുക്ക് ഈരായിക്കൊല്ലി എന്ന പേരിലാണ് ബോര്ഡ് സ്ഥാപിച്ചിരിക്കുന്നത്.
പാര്ട്ടിയില് പിണറായിക്കെതിരെയും ഗോവിന്ദനെതിരെയും പ്രതിഷേധം പൊട്ടിപ്പുറപ്പെടുന്നതിന്റെ സൂചനയായാണിത്. ഇരായിക്കൊല്ലിയില് കഴിഞ്ഞ ദിവസം രാത്രിയാണ് ബോര്ഡ് പ്രത്യക്ഷപ്പെട്ടത്. മലയോരത്തെ സി.പി.എം കോട്ടയെന്ന് അറിയപ്പെടുന്ന പ്രദേശമാണ് ഈരായിക്കൊല്ലി.
അതിനിടെ, തിരുത്തല് നടപടികള് ആവശ്യമാണെന്ന് പറഞ്ഞ് പി. ജയരാജന് ഉള്പ്പെടെയുള്ള നേതാക്കളും രംഗത്തെത്തിയിട്ടുണ്ട്.
കമ്യൂണിസ്റ്റുകാര് പാര്ലമെന്ററി വ്യവസ്ഥയില് ഏര്പ്പെടുമ്പോള് പലതരം ജീര്ണതകളും കടന്നുവരുമെന്ന് ജയരാജന് ഫെയ്സ്ബുക്കില് കുറിച്ചു. അത്തരം ജീര്ണതകള് ചര്ച്ച ചെയ്ത് തിരുത്താതിരുന്നാല് ജനങ്ങള്ക്കിടയില് പാര്ട്ടിയെക്കുറിച്ചുള്ള വിശ്വാസ്യതയ്ക്കു മങ്ങലേല്ക്കും. മൂര്ത്തമായ അത്തരം പ്രശ്നങ്ങള് പരിശോധിക്കാതെ പാര്ട്ടിക്കു മുന്നോട്ടുപോകാനാവില്ല. അങ്ങനെ കമ്മ്യൂണിസ്റ്റ് പാര്ട്ടിയുടെ അന്തഃസത്ത ഉയര്ത്തിപ്പിടിച്ചു മുന്നോട്ട് പോകാമെന്നും ജയരാജന് പറഞ്ഞു.
സി.പി.എമ്മിന്റെ കോട്ടയായ കണ്ണൂര് ജില്ലയിലുള്പ്പെടെ വലിയ തിരിച്ചടിയാണ് പാര്ട്ടിക്കു നേരിടേണ്ടി വന്നത്. നേതൃത്വത്തിനെതിരേ അണികള്ക്കിടയില് വലിയ അമര്ഷം ഉയര്ന്ന സാഹചര്യത്തിലാണ് തിരുത്തല് നടപടികള് വേണമെന്ന ആവശ്യവുമായി പി. ജയരാജന് രംഗത്തെത്തിയത്.
ഭരണവിരുദ്ധവികാരമില്ലെന്ന് സിപിഐ
പരാജയത്തിനു മുഖ്യകാരണം ഭരണവിരുദ്ധ വികാരമാണെന്നു സി.പി.ഐ. ഭരണവിരുദ്ധവികാരമില്ലെന്ന സി.പി.എം നേതാക്കള് ആവര്ത്തിക്കുന്നതിനിടെയാണ് സി.പി.ഐ തങ്ങളുടെ നിലപാട് മുഖപത്രത്തിലൂടെ വ്യക്തമാക്കിയിരിക്കുന്നത്. തെരഞ്ഞെടുപ്പില് സി.പി.ഐയുടെ ഒരു മന്ത്രി ഉള്പ്പെടെ 13 മന്ത്രിമാര് പരാജയപ്പെട്ടിരുന്നു.
'10 വര്ഷം നീണ്ട എല്.ഡി.എഫ്. ഭരണത്തില് എവിടെയാണ് പാളിച്ചകള് സംഭവിച്ചതെന്നു മുന്നണിയും ഘടകകക്ഷികളും വിശദമായി പരിശോധിക്കണം. ഭരണവും അതിന് നേതൃത്വം നല്കിയ രാഷ്ട്രീയ പ്രസ്ഥാനങ്ങളും എങ്ങനെ ജനങ്ങളില്നിന്നും അകന്നെന്ന് ആത്മപരിശോധന ആവശ്യമാണ്. മുന്നണിക്ക് നേതൃത്വം നല്കിയ സി.പി.എമ്മിലെ പ്രമുഖരായ ചില നേതാക്കള് പാര്ട്ടി വിട്ട് യു.ഡി.എഫില് ചേക്കേറിയതും പാര്ട്ടിയെയും മുന്നണിയെയും വെല്ലുവിളിച്ച് വിജയിച്ചതും ഇരുത്തിച്ചിന്തിപ്പിക്കാന് മതിയായ രാഷ്ട്രീയ പ്രതിഭാസമാണ്.
സി.പി.എമ്മിന്റെയും ഇടതുപക്ഷ മുന്നണിയുടെയും പരമ്പരാഗത അടിത്തറയ്ക്ക് ഇളക്കം തട്ടുകയും വോട്ടുചോര്ച്ച സംഭവിക്കുകയും ചെയ്തെന്നു കരുതേണ്ടിവരും. അത് എന്തുകൊണ്ട്, എങ്ങനെ സംഭവിച്ചുവെന്ന് കണ്ടെത്തണം. കാര്യകാരണങ്ങള് വിലയിരുത്തി പരിഹാരമാര്ഗങ്ങള് ആരായുകയും തിരുത്തലുകള്ക്ക് തയാറാവുകയും വേണം.'-സി.പി.ഐ. മുഖപത്രം ജനയുഗത്തിന്റെ മുഖപ്രസംഗത്തില് പറയുന്നു.
