കൊല്ലം: മുഖ്യമന്ത്രിയെ കോണ്ഗ്രസ് തീരുമാനിക്കുമെന്നും എസ്എന്ഡിപിയ്ക്ക് അതില് ഒരു റോളുമില്ലെന്നും എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. മുഖ്യമന്ത്രിയായി ആരു വേണമെന്ന കാര്യം ഹൈക്കമാന്റ് തീരുമാനിക്കുമെന്ന് വ്യക്തമാക്കിയ വെള്ളാപ്പള്ളി എല്ലാ നേതാക്കളുടെയും ഗുണഗണങ്ങള് നിരത്തി.
വി.ഡി. സതീശന് നല്ല പ്രതിപക്ഷ നേതാവായിരുന്നു. എന്നാല് നിയമസഭാ തെരഞ്ഞെടുപ്പില് വിജയശില്പ്പി കെ.സി. വേണുഗോപാലാണ്. എംഎല്എ മാര് ഉള്ളത് കെ.സി.യ്ക്കൊപ്പമാണെന്നും പക്ഷേ കെ.സി. ഡല്ഹി വിട്ടു വരുന്ന കാര്യം സംശയമാണെന്നും പറഞ്ഞു. രമേശ് ചെന്നിത്തലയ്ക്ക് ഭരണപരിചയമുണ്ട്. പ്രവര്ത്തനപാരമ്പര്യവുമുണ്ട്. ഒരു സമുദായത്തോടും പ്രശ്നങ്ങളുമില്ല. അതേസമയം തന്നെ യുഡിഎഫ് എത്രയോ തെരഞ്ഞെടുപ്പിനെ അഭിമുഖീകരിച്ചവരാണ്.
താന് മുസ്ളീംവിരുദ്ധനല്ലെന്നും തന്നെ അങ്ങിനെയാക്കി കാണിക്കാന് ചിലര് ശ്രമിക്കുകയാണെന്നും പറഞ്ഞു. താന് സംസാരിച്ചത് വിവേചനങ്ങള്ക്ക് എതിരേയാണ്. അത് ശരിയാണോ എന്ന് പരിശോധിക്കുന്നതിന് പകരം തന്നെ മുസ്ളീം വിരുദ്ധനായി ക്രൂശിക്കാനാണ് ശ്രമം നടക്കുന്നത്. ലീഗ് എന്തെല്ലാം വിമര്ശനം ഉയര്ത്തിയവരാണ്. കുഞ്ഞാലിക്കുട്ടി മിതവാദിയാണെന്നും കെ.എം.ഷാജിയെ ആരും ഒന്നും പറയുന്നില്ലെന്നും വെള്ളാപ്പള്ളി പറഞ്ഞു. അതേസമയം തന്നെ ഓലപ്പാമ്പ് കാട്ടി ആരും പേടിപ്പിക്കാന് നോക്കേണ്ടെന്നും എസ്എന്ഡിപി യോഗത്തെ തകര്ക്കാന് ഒരു പാര്ട്ടിക്കും സാധിക്കില്ലെന്നും തങ്ങള് ഒറ്റക്കെട്ടാണെന്നും പറഞ്ഞു.
കായംകുളത്ത് തന്നെ തോല്പ്പിക്കാന് ശ്രമം നടന്നെന്നും വേണ്ട വിധം കീഴഘടകങ്ങള് പ്രവര്ത്തിച്ചില്ലെന്നുമുള്ള വിമര്ശനത്തില് പ്രതിഭയുടെ വിശ്വാസം അവരെ രക്ഷിക്കട്ടെയെന്നും പറഞ്ഞു. കായംകുളത്ത് യു പ്രതിഭയ്ക്ക് അര്ഹതയില്ലെന്ന് ജനം അറിഞ്ഞു. അവിടെ സിപിഐഎം പല തട്ടിലാണെന്നും വെള്ളാപ്പള്ളി പറഞ്ഞു. മുഖ്യമന്ത്രിയെ തീരുമാനിക്കുന്ന കാര്യത്തില് അഭിപ്രായം പറയാന് താനാരുമല്ലെന്നും പറഞ്ഞു.
