ഒരു തലമുറയുടെ ക്ഷുഭിതയൗവ്വനത്തിന്റെ പ്രതീകമായിരുന്നു സുകുമാരൻ. സ്വന്തം നിലപാടുകള് മുഖം നോക്കാതെ തുറന്നു പറയുന്ന സുകുമാരന്റെ കഥാപാത്രങ്ങളെ അന്നത്തെ യുവതലമുറ വളരെ പെട്ടെന്നാണ് നെഞ്ചിലേറ്റിയത്. ചടുലമായ സംഭാഷണങ്ങളിലൂടെ സുകുമാരന് പ്രേക്ഷകമനസ്സിലിടം നേടി. സുകുമാരന് എന്ന അനശ്വര നടന്റെ മകന് എന്ന ലേബലില് മലയാള സിനിമയിലേക്കെത്തിയ താരമാണ് ഇന്ദ്രജിത്ത് സുകുമാരന്. വില്ലന് വേഷങ്ങളിലൂടെ തുടക്കം കുറിച്ച ഇന്ദ്രജിത്ത് എന്ന താരത്തെ ആദ്യ സിനിമയിലൂടെ തന്നെ പ്രേക്ഷകര് ഹൃദയത്തോട് ചേര്ത്തു നിര്ത്തി. പിന്നീടിങ്ങോട്ട് നായക വേഷങ്ങളിലും ഹാസ്യവേഷങ്ങളിലൂടെയും ഇന്ദ്രജിത്ത് മലയാള സിനിമയില് തന്റെ സ്ഥാനം ഉറപ്പിച്ചു.
അഭിനേതാവ് എന്ന നിലയിലുള്ള താരത്തിന്റെ റേഞ്ച് പല കഥാപാത്രങ്ങളിലൂടെയും മലയാളികള് കണ്ടിട്ടുണ്ട്. എന്നാല് പലപ്പോഴും തന്റെ അഭിനയ മികവിനും കഴിവിനും ഒപ്പമെത്തുന്ന അവസരങ്ങള് താരത്തിന് ലഭിക്കുന്നില്ലെന്ന അഭിപ്രായമുള്ള സിനിമാപ്രേമികളുമുണ്ട്.
ഇപ്പോഴിതാ ഒരു മികച്ച ബോളിവുഡ് പ്രൊജക്ടിന്റെ ഭാഗമാകുന്ന സന്തോഷം പങ്കിടുകയാണ് ഇന്ദ്രജിത്ത്. പ്രമുഖ ബോളിവുഡ് സംവിധായകന് അനുരാഗ് കശ്യപിന്റെ ഹിന്ദി ചിത്രം ബന്ദറിലൂടെയാണ് താരം ഹിന്ദി പ്രേക്ഷകര്ക്ക് മുന്നിലെത്തുന്നത്. ചിത്രത്തിന്റെ ടീസര് താരം തന്നെ സോഷ്യല് മീഡിയയിലൂടെ പങ്കുവച്ചിട്ടുണ്ട്. ‘ബന്ദര് ടീസര് ഔട്ട് നൗ....’ എന്ന ക്യാപ്ഷന് നല്കിയാണ് താരം ടീസര് പങ്കുവച്ചിരിക്കുന്നത്. ടീസറില് ഇന്ദ്രജിത്തിന്റെ കഥാപാത്രത്തെയും കാണാം. താരത്തിന്റെ പുതിയ ഹിന്ദി പ്രൊജക്ടിനെ ഏറ്റെടുക്കുകയാണ് ആരാധകര്.
16 വര്ഷങ്ങള്ക്കിപ്പുറമാണ് ഇന്ദ്രജിത്ത് ഒരു ബോളിവുഡ് ചിത്രത്തില് അഭിനയിക്കുന്നത്. 2010 ല് പുറത്തിറങ്ങിയ ദി വെയ്റ്റിംഗ് റൂം എന്ന ചിത്രമാണ് ഇന്ദ്രജിത്ത് ഇതിന് മുന്പ് അഭിനയിച്ച ഒരേയൊരു ഹിന്ദി ചിത്രം. കെന്നഡിക്ക് ശേഷം അനുരാഗ് കശ്യപിന്റെ സംവിധാനത്തിലൊരുങ്ങുന്ന ചിത്രം യഥാർത്ഥ സംഭവങ്ങളില് നിന്ന് പ്രചോദനം ഉള്ക്കൊണ്ട് ഒരു സെൻസിറ്റീവ് വിഷയം കൈകാര്യം ചെയ്യുന്ന കഥയാണ്. ബോബി ഡിയോള്, സന്യ മല്ഹോത്ര, ഇന്ദ്രജിത്ത് എന്നിവർക്കൊപ്പം രാജ് ബി ഷെട്ടി, സപ്ന പബ്ബി, സബ ആസാദ്, റിദ്ധി സെൻ, ജിതേന്ദ്ര ജോഷി, നാഗേഷ് ഭോണ്സ്ലെ തുടങ്ങിയവരും ചിത്രത്തിലുണ്ട്.
സീ സ്റ്റുഡിയോസിനൊപ്പം സാഫ്രോണ് മാജിക് വർക്സിന്റെ ബാനറില് നിഖില് ദ്വിവേദി ആണ് ബന്ദറിന്റെ നിർമ്മാതാവ്. അടുത്തിടെ ഏറ്റവും വിമർശനാത്മകമായി ചർച്ച ചെയ്യപ്പെട്ട പാതാള് ലോക്, കൊഹ്റ, ഉഡ്ത പഞ്ചാബ് എന്നിവയ്ക്ക് പിന്നിലെ ജോഡികളായ സുദീപ് ശർമ്മയും അഭിഷേക് ബാനർജിയും ചേർന്നാണ് സിനിമയുടെ തിരക്കഥ എഴുതിയത്. ടൊറന്റോ ഇന്റർനാഷണല് ഫിലിം ഫെസ്റ്റിവലില് പ്രദർശിപ്പിച്ച ചിത്രം മികച്ച ചിത്രമായി തിരഞ്ഞെടുത്തിരുന്നു. ജൂണ് 5 ന് ബന്ദർ ലോകമെമ്പാടുമുള്ള തിയറ്ററുകളില് റിലീസ് ചെയ്യുമെന്നാണ് റിപ്പോര്ട്ട്.
