തമിഴ്നാട് നിയമസഭ തിരഞ്ഞെടുപ്പില് നടന് വിജയ് നേതൃത്വം നല്കുന്ന പാര്ട്ടി ടിവികെ വലിയ വിജയമാണ് നേടിയത്. എന്നാല് 108 സീറ്റുകളുളള ടിവികെയ്ക്ക് സര്ക്കാര് രൂപീകരിക്കാനായിട്ടില്ല. ഈ വിഷയത്തില് വിജയ്ക്ക് പിന്തുണയുമായെത്തിയിരിക്കുകയാണ് സംവിധായകന് വിനയന്.
രാഷ്ട്രീയ ചരിത്രത്തിലും സിനിമാ രംഗത്തു നിന്ന് രാഷ്ട്രീയ രംഗത്തേക്കു വന്നവരുടെ ചരിത്രത്തിലും വിജയ് എന്ന നടന് കാണിച്ച ധീരതയും തന്റേടവും എക്കാലവും സ്മരിക്കപ്പെടുമെന്ന് വിനയന് ഫേസ്ബുക്കില് കുറിച്ചു. രജനികാന്ത്, കമല്ഹാസന് തുടങ്ങിയ താരങ്ങള് പരാജയപ്പെട്ടിടത്ത് തന്റെ ആത്മവിശ്വാസം കൈമുതലാക്കി വിജയ് നേടിയെടുത്തത് ഐതിഹാസിക വിജയമാണെന്നാണ് വിനയന് പറയുന്നത്.
വിനയന്റെ കുറിപ്പ്:
രാഷ്ട്രീയ ചരിത്രത്തിലും സിനിമാ രംഗത്തു നിന്ന് രാഷ്ട്രീയ രംഗത്തേക്കു വന്നവരുടെ ചരിത്രത്തിലും വിജയ് എന്ന നടന് കാണിച്ച ധീരതയും തന്റേടവും എക്കാലവും സ്മരിക്കപ്പെടും. തമിഴ് രാഷ്ട്രീയത്തില് സിനിമാക്കാര്ക്ക് എന്നും പ്രസക്തിയുണ്ട്. പക്ഷെ രജനീകാന്ത് ഉള്പ്പടെ പലരും ഭയന്നു നിന്നിടത്ത് , കമലഹാസനെ പോലുള്ള ഇതിഹാസ നായകര് പരാജയ പെട്ടിടത്ത് അത്രയൊന്നും സീനിയറല്ലാത്ത ഒരു നടന് എല്ലാ പ്രതിസന്ധികളെയും നേരിട്ടു കൊണ്ട് തന്റെ ആത്മ വിശ്വാസം മാത്രം കൈമുതലാക്കി നേടിയെടുത്ത വിജയം ഐതിഹാസികം തന്നെയാണ്. അതും രണ്ടു വര്ഷം മാത്രം പ്രായമുള്ള രാഷ്ട്രീയ പ്രവര്ത്തനത്തിലൂടെ.
അധികാരത്തില് എത്തിയാല് വിജയ് എന്തു മാറ്റമുണ്ടാക്കും, വികസനമുണ്ടാക്കും എന്നൊക്കെ ഇനിയും കണ്ട് അറിയേണ്ടിയിരിക്കുന്നു. ഭരണാധികാരി എന്ന രീതിയിലുള്ള മികവും നമുക്കറിയില്ല. പക്ഷെ ഒരു സിനിമയ്ക് നൂറു കോടിയിലേറെ പ്രതിഫലം കിട്ടുന്ന ,കരിയറിലെ നല്ല അവസരം ത്യജിച്ചുകൊണ്ട് വിജയ് നടത്തിയ ഈ ഒറ്റയാള് പോരാട്ടം അസാമാന്യ ആത്മ ധൈര്യം തന്നെയാണ്. അഴിമതി ഇല്ലാത്ത ഒരു ഭരണം നല്കിയാല് തന്നെ തമിഴ്നാട്ടില് അത് അത്ഭുതമാണ്.രാഷ്ട്രീയ കുതന്ത്രജ്ഞന്മാര് വളഞ്ഞിട്ട് ആക്രമിച്ച് ഒതുക്കാതെ ഒരവസരം വിജയ്ക്ക് നല്കണം. അതിനുള്ള സാഹചര്യം ഇല്ലാതാക്കരുത് എന്നാണ് എന്റെ അഭിപ്രായം.
118 പേരുടെ പിന്തുണ കത്ത് ലഭിക്കാതെ മന്ത്രിസഭാ രൂപീകരണത്തിന് ടിവികെയെ ക്ഷണിക്കില്ലെന്നാണ് ഗവര്ണറുടെ നിലപാട്. 118 പേരുടെ പട്ടിക വേണമെന്ന നിലപാടിലാണ് ഗവര്ണര് ഉളളത്. ഇത് ഭരണഘടന വിരുദ്ധമാണെന്നാണ് രാഷ്ട്രീയ നിരീക്ഷകര് ഉയറത്തുന്ന വാദം.
