ന്യൂഡൽഹി: ഹോർമുസ് കടലിടുക്കിന് സമീപം 18 ഇന്ത്യൻ ജീവനക്കാരുമായി സഞ്ചരിച്ച തടികൊണ്ടുണ്ടാക്കിയ ബോട്ട് തീപിടിച്ച് മുങ്ങി. അപകടത്തിൽ ഒരു ഇന്ത്യൻ നാവികൻ മരിക്കുകയും നാല് പേർക്ക് പരിക്കേൽക്കുകയും ചെയ്തതായി ഔദ്യോഗിക വൃത്തങ്ങൾ അറിയിച്ചു. ബോട്ടിലുണ്ടായിരുന്ന 17 ഇന്ത്യൻ ജീവനക്കാരെയും ആ വഴി കടന്നുപോയ മറ്റൊരു കപ്പൽ രക്ഷപ്പെടുത്തി.
തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. പരിക്കേറ്റ നാവികർ ദുബായിൽ ചികിത്സയിലാണെന്ന് റിപ്പോർട്ടുകൾ സൂചിപ്പിക്കുന്നു. രക്ഷപ്പെടുത്തിയ ഇന്ത്യൻ നാവികരെ ഉദ്യോഗസ്ഥർ സന്ദർശിച്ചതായി ദുബായിലെ ഇന്ത്യൻ കോൺസുലേറ്റ് എക്സിലൂടെ അറിയിച്ചു. ബോട്ട് ഉടമയുമായി ബന്ധപ്പെട്ടുവരികയാണെന്നും ആവശ്യമായ എല്ലാ സഹായങ്ങളും നൽകുന്നുണ്ടെന്നും കോൺസുലേറ്റ് വ്യക്തമാക്കി.
ലോകത്തിലെ എണ്ണ വിതരണത്തിന്റെ പ്രധാന ഭാഗം കടന്നുപോകുന്ന പേർഷ്യൻ ഗൾഫിനും ഒമാൻ ഉൾക്കടലിനും ഇടയിലുള്ള സുപ്രധാന സമുദ്രപാതയായ ഹോർമുസ് കടലിടുക്കിൽ ഇറാനും യുഎസും തമ്മിലുള്ള സംഘർഷം വർധിച്ചുവരുന്ന സാഹചര്യത്തിലാണ് ഈ സംഭവം.
