ന്യുഡല്ഹി: നിയമസഭാ തെരഞ്ഞെടുപ്പ് കഴിഞ്ഞ ഏഴുദിവസമായിട്ടും കേരളത്തിലെ മുഖ്യമന്ത്രിയെ തീരുമാനിക്കാനാകാതെ കോണ്ഗ്രസ്. ഡല്ഹിയില് തിരക്കിട്ട ചര്ച്ചകളും കൂടിക്കാഴ്ചകളും നടക്കുമ്പോള് കേരളാമുഖ്യമന്ത്രി പ്രഖ്യാപനം നാളെയുണ്ടായേക്കുമെന്ന് സൂചന. കെ.സി. വേണുഗോപാലിനാണ് കൂടുതല് സാധ്യതയെന്നും നാളെ വൈകിട്ടോടെ കോണ്ഗ്രസ് അദ്ധ്യക്ഷന് മല്ലികാര്ജ്ജുന ഖാര്ഗേ പ്രഖ്യാപനം നടത്തിയേക്കുമെന്നാണ് വിവരം.
ഹൈക്കമാന്റില് ഏകദേശ ധാരണ ആയിട്ടുണ്ട്. എന്നാല് സംസ്ഥാന കോണ്ഗ്രസിലെ പോര് അടങ്ങിയ ശേഷം കാര്യങ്ങള് ഒന്നു ശാന്തമായ ശേഷം പ്രഖ്യാപനം നടത്തിയാല് മതിയെന്നാണ് ഹൈക്കമാന്ഡിലെ ധാരണ. അച്ചടക്ക ലംഘനത്തിന്റെ അന്തരീക്ഷം ആവര്ത്തിക്കുന്നുണ്ടോയെന്നും നേതൃത്വം നിരീക്ഷിച്ചുവരികയാണ്. മത്സരത്തില് നിന്ന് പിന്മാറാന് മൂന്ന് നേതാക്കളും ഈ ഘട്ടത്തിലും തയ്യാറല്ലിട്ടില്ലെന്നാണ് വിവരം.
അതേസമയം കൂടുതല് ജനകീയതയുള്ള വി.ഡി. സതീശനും മുതിര്ന്ന നേതാവ് എന്ന നിലയില് രമേശ് ചെന്നിത്തലയും സമ്മര്ദ്ദം തുടരുന്നുണ്ട്. മുഖ്യമന്ത്രരി കാര്യത്തില് ഹൈക്കമാന്റ് ഏകദേശം തീരുമാനം എടുത്തിട്ടുള്ളതായും പ്രിയങ്കാഗാന്ധിയടക്കം വിഷയത്തില് ഇടപെട്ടെന്നും ഘടകകക്ഷികളുമായി സംസാരിച്ചെന്നും വിവരമുണ്ട്. പ്രധാനമന്ത്രിയടക്കം കേരളത്തിലെ പ്രതിസന്ധിയില് വലിയ പരിഹാസം ഉയര്ത്തിയിരിക്കെ ഇക്കാരയത്തില് അന്തിമ തീരുമാനത്തില് എത്രയും പെട്ടെന്ന് എത്തേണ്ട സാഹചര്യത്തിലാണ് കോണ്ഗ്രസ് ദേശീയനേതൃത്വം എത്തി നില്ക്കുന്നത്.
കോണ്ഗ്രസ് അദ്ധ്യക്ഷന് മല്ലികാര്ജ്ജുന ഖര്ഗേയും രാഹുല്ഗാന്ധിയും തമ്മിലുള്ള കുടിക്കാഴ്ചയ്ക്ക് ശേഷമായിരിക്കും അന്തിമ പ്രഖ്യാപനം വരിക. ഇപ്പോള് രണ്ടു പേരും ഡല്ഹിയില് ഇല്ല. ഇവര് ഡല്ഹിയില് എത്തിയ ശേഷമായിരിക്കും കൂടിക്കാഴ്ച. മല്ലികാര്ജ്ജുന ഖര്ഗേ ഇപ്പോള് ബംഗലുരുവിലാണ്. സോണിയാഗാന്ധിയുമായും ആശയവിനിമയം നടത്തും. കെ.സി. വേണുഗോപാലിനാണ് കുടുതല് സാധ്യത കല്പ്പിക്കുന്നത്.
