തിരുവനന്തപുരം: നിയമസഭാ തെരഞ്ഞെടുപ്പിലെ അപ്രതീക്ഷിത തിരിച്ചടിക്കു പിന്നാലെ മുന് മുഖ്യമന്ത്രി പിണറായി വിജയന് തലസ്ഥാനത്തു പുതിയ വാടകവീട്ടിലേക്ക് മാറുന്നു. ക്ലിഫ് ഹൗസ് ഒഴിഞ്ഞതിനെത്തുടര്ന്നു താത്കാലികമായി 'ചിന്ത' ഫ്ളാറ്റിലായിരുന്നു അദ്ദേഹം കഴിഞ്ഞിരുന്നത്. കുടുംബസമേതം താമസിക്കുന്നതിനായി നഗരപരിധിയില്ത്തന്നെ സൗകര്യപ്രദമായ വീട് കണ്ടെത്തി. ബേക്കറി ജങ്ഷനു സമീപത്താണു വീട്.
പുതിയ വാടക വീടുണ്ടെങ്കിലും ചിന്ത ഫ്ളാറ്റും പിണറായിക്കായി ഒഴിച്ചിടും. പ്രതിപക്ഷ നേതൃസ്ഥാനം അദ്ദേഹം ഏറ്റെടുക്കുമോ എന്ന കാര്യത്തില് പാര്ട്ടിയില് ഇപ്പോഴും കൂടിയാലോചനകള് തുടരുകയാണ്. ഡല്ഹിയില് ചേര്ന്ന പി.ബി. യോഗത്തില് വിഷയം ചര്ച്ചയായെങ്കിലും അന്തിമ തീരുമാനമായിട്ടില്ല. പ്രതിപക്ഷ നേതാവായാല് സര്ക്കാര് ഔദ്യോഗിക വസതിയായ കന്റോണ്മെന്റ് ഹൗസ് കിട്ടും. അതിനിടെയാണ് ഈ വീടുമാറ്റം. ഇതോടെ പ്രതിപക്ഷ നേതൃസ്ഥാനം പിണറായി ഏറ്റെടുക്കില്ലെന്ന അഭ്യൂഹവും ഉയരുന്നുണ്ട്.
സംസ്ഥാനത്തു പുതിയ സര്ക്കാര് അധികാരമേല്ക്കുന്നതിലെ അനിശ്ചിതത്വം തുടരുന്നതിനാല് പിണറായി വിജയന് നിലവില് കാവല് മുഖ്യമന്ത്രിയായി തുടരുകയാണ്. തെരഞ്ഞെടുപ്പ് ഫലം പുറത്തുവന്നതിനു പിന്നാലെ അദ്ദേഹം ഔദ്യോഗിക വസതി ഒഴിഞ്ഞിരുന്നു. തെരഞ്ഞെടുപ്പ് തോല്വിയുടെ ഉത്തരവാദിത്വം മുഖ്യമന്ത്രിയില്മാത്രം കെട്ടിവയ്ക്കേണ്ടതില്ലെന്നാണു സി.പി.എം. കേന്ദ്രനേതൃത്വത്തിന്റെ നിലപാട്. പരാജയം പാര്ട്ടിയുടെയാകെ വീഴ്ചയാണെന്നു പി.ബി. വിലയിരുത്തിയിട്ടുണ്ട്.
