തെന്നിന്ത്യൻ സിനിമാ പ്രേക്ഷകരുടെ പ്രിയപ്പെട്ട താരദമ്പതികളായ സ്നേഹയും പ്രസന്നയും തങ്ങളുടെ പതിനാലാം വിവാഹവാർഷികം ആഘോഷിക്കുകയാണ്. തന്റെ പ്രിയതമയ്ക്ക് ആശംസകൾ നേർന്നുകൊണ്ട് പ്രസന്ന ഇൻസ്റ്റഗ്രാമിൽ പങ്കുവെച്ച് ഹൃദ്യവും അതിലേറെ രസകരവുമായ കുറിപ്പാണ് ഇപ്പോൾ ശ്രദ്ധനേടുന്നത്.
വർഷങ്ങൾക്ക് മുമ്പ് ഒരുമിച്ച് തുടങ്ങിയ ഈ യാത്ര ഓരോ കൊച്ചു നിമിഷങ്ങളും ഞങ്ങളുടെ ജീവിതകഥയിലെ മനോഹരമായ ഭാഗങ്ങളായി മാറിയെന്ന് പ്രസന്ന കുറിച്ചു. സാധാരണമായ ദിവസങ്ങളെപ്പോലും അവിസ്മരണീയമായ ഓർമ്മകളാക്കി മാറ്റാനും പ്രതിസന്ധികളെ ഒരുമിച്ച് അതിജീവിക്കാനും തങ്ങൾക്ക് സാധിച്ചുവെന്നും നടൻ ഓർമ്മിപ്പിച്ചു. പരസ്പരം ഒരു ജീവിതം പടുത്തുയർത്തുക മാത്രമല്ല, ആത്മാവിൽ ഒരു അടയാളം കൂടി പതിപ്പിക്കുകയായിരുന്നു തങ്ങളെന്ന് പറഞ്ഞാണ് അദ്ദേഹം കുറിപ്പ് അവസാനിപ്പിച്ചത്
‘വർഷങ്ങൾക്ക് മുമ്പ് നമ്മൾ ഒരുമിച്ച് ആ അജ്ഞാത തീരങ്ങളിലേക്ക് കാലെടുത്തു വെച്ചു.എങ്ങനെയെന്നറിയില്ല, ഓരോ വഴിത്തിരിവുകളും പരീക്ഷണങ്ങളും കൊച്ചു കൊച്ചു നിമിഷങ്ങളും നമ്മുടെ ജീവിതകഥയിലെ മനോഹരമായ ഭാഗങ്ങളായി മാറി.വെറുതെയിരുന്ന ഓരോ നടത്തങ്ങളും ഭ്രാന്തമായ സംസാരങ്ങളും...പ്രണയത്തിന്റെ തിളക്കങ്ങൾ മുതൽ പ്രതിസന്ധികളുടെ കൊടുങ്കാറ്റുകൾ വരെ...സാധാരണ ദിവസങ്ങളിൽ നിന്ന് പോലും നമ്മൾ ഓർമ്മകൾ സൃഷ്ടിച്ചു, ജീവിതത്തിന്റെ ഓരോ ഘട്ടത്തിലൂടെയും നമ്മൾ കൂടുതൽ അടുത്തു.നമ്മൾ ഒരു ജീവിതം പടുത്തുയർത്തുക മാത്രമല്ല ചെയ്തത്...പരസ്പരം ആത്മാവിൽ ഒരു അടയാളം കൂടി പതിപ്പിക്കുകയായിരുന്നു.
പിന്നെ ഒരു കാര്യം കൂടി...കഴിഞ്ഞ 14 വർഷമായി നീ എപ്പോഴും എന്റെ 'വലതുവശത്താണ്' അതായത്, എന്റെ വലതുകൈയ്യിൽ പിടിച്ചുതന്നെയാണ് നിന്റെ നടത്തം. (കാരണം നിനക്ക് കൂടുതൽ ഇഷ്ടം നിന്റെ ഇടത് പ്രൊഫൈൽ ആണല്ലോ!)എനിക്ക് എപ്പോഴെങ്കിലും മോഹൻലാലിനെപ്പോലെ ആകാൻ കഴിയുമോ എന്ന് എനിക്കറിയില്ല...പക്ഷേ, എന്റെ കൂടെ നടക്കുമ്പോൾ നീ എപ്പോഴും എന്റെ വലതു തോളിൽ പിടിച്ചു താഴേക്ക് വലിക്കുന്നത് കണ്ടാൽ, ആ പ്രസിദ്ധമായ 'മോഹൻലാൽ ചെരിവ്' ഉടനെ തന്നെ എനിക്ക് കിട്ടുമെന്ന് ഉറപ്പാണ് .വിവാഹ വാർഷികാശംസകൾ പ്രിയേ’ പ്രസന്നയുടെ വാക്കുകൾ.
2012 മെയ് 11-നായിരുന്നു സ്നേഹയുടെയും പ്രസന്നയുടെയും വിവാഹം. വിഹാൻ, ആദ്യാന്ത എന്നിവരാണ് ഇവരുടെ മക്കൾ. നിരവധി ആരാധകരും സഹപ്രവർത്തകരുമാണ് താരദമ്പതികൾക്ക് ആശംസകളുമായി എത്തിയിരിക്കുന്നത്.
