തമിഴില് നിരവധി ആരാധകരുളള നടനാണ് സൂര്യ. സൂര്യയുടെ ഏറ്റവും പുതിയ ചിത്രം കറുപ്പിന്റെ തെലുങ്ക് പതിപ്പ് വീരഭദ്രുഡുവിന്റെ പ്രീ റിലീസ് ഇവെന്റില് നിന്നുളള ഒരു വീഡിയോ ആണ് ഇപ്പോള് സമൂഹമാധ്യമങ്ങളില് വൈറലാകുന്നത്. സൂര്യയ്ക്കൊപ്പം ഒരു സെല്ഫി എടുക്കാനായി ഒരു ആരാധകന് ശ്രമിക്കുന്നതിന്റെ വീഡിയോ ആണിത്. ഇവെന്റ് വേദിയില് യുവാവായ ഒരു ആരാധകര് സൂര്യയുടെ കാലില് വിടാതെ പിടിക്കുന്ന വീഡിയോ ആണ് വൈറല് ആയിരിക്കുന്നത്. സൂര്യയ്ക്കൊപ്പം സഹോദരനും നടനുമായ കാര്ത്തിയും വേദിയില് ഉണ്ട്.
സൂര്യയുടെ കാലില് പിടിമുറുക്കിയ ആരാധകനെ സുരക്ഷാ ഉദ്യോഗസ്ഥര് എത്തി മാറ്റാന് ശ്രമിക്കുകയാണ്. എന്നാല് സുരക്ഷാ ഉദ്യോഗസ്ഥരെ മാറ്റിനിര്ത്തി യുവാവിന് സെല്ഫി എടുക്കാനുളള അവസരം കൊടുക്കുന്നുണ്ട് സൂര്യ. വീഡിയോ വളരെ പെട്ടന്നാണ് സമൂഹമാധ്യമങ്ങള് കീഴടക്കിയത്. ആരാധകന്റെ ആഗ്രഹം നിറവേറ്റിയ സൂര്യയ്ക്ക് കൈയ്യടിക്കുകയാണ് സോഷ്യല് മീഡിയ.
അതേസമയം ആര്ജെ ബാലാജി സംവിധാനം ചെയ്യുന്ന സൂര്യയുടെ പുതിയ ചിത്രമാണ് കറുപ്പ്. തൃഷയാണ് കറുപ്പില് നായികയായെത്തുന്നത്. ഇന്ദ്രന്സ്, നാട്ടി, സ്വാസിക, തുടങ്ങി നിരവധി താരങ്ങള് ചിത്രത്തില് അണിനിരക്കുന്നുണ്ട്. മെയ് 14 നാണ് ചിത്രത്തിന്റെ റിലീസ്.
