മലയാളസിനിമയിലെ ആക്ഷന് ത്രില്ലറുകള്ക്ക് ഒരു ബെഞ്ച്മാര്ക്ക് നല്കിയ സിനിമയാണ് ദൃശ്യം. ജോര്ജുകുട്ടി എന്ന സാധാരണക്കാരനായ കുടുംബനാഥന്റെ ജീവിതത്തില് അപ്രതീക്ഷിതമായി കടന്നു വരുന്ന ട്വിസ്റ്റുകളാണ് ദൃശ്യത്തിലൂടെ സംവിധായകന് ജീത്തു ജോസഫ് പറഞ്ഞത്. ദൃശ്യത്തിന്റെ ആദ്യഭാഗം ബ്ലോക്ബസ്റ്റര് വിജയം നല്കിയാണ് പ്രേക്ഷകര് ഏറ്റെടുത്തത്. ആവേശത്തോടെ പ്രേക്ഷകര് കാത്തിരുന്ന രണ്ടാം ഭാഗവും ഗംഭീര വിജയം നേടി.
അതോടെ ഇന്ത്യന് സിനിമാ പ്രേക്ഷകർ ഏറ്റവും പ്രതീക്ഷയോടെ കാത്തിരിക്കുന്ന ചിത്രമായി മോഹൻലാൽ- ജീത്തു ജോസഫ് കൂട്ടുകെട്ടിലൊരുങ്ങുന്ന ദൃശ്യം 3 മാറി. ആദ്യ രണ്ട് ഭാഗത്തിന്റെയും വമ്പൻ വിജയത്തിന് ശേഷം മൂന്നാം ഭാഗമെത്തുമ്പോൾ ബോക്സ്ഓഫീസ് റെക്കോര്ഡുകള് തകര്ക്കുമെന്നാണ് ആരാധകരുടെ അഭിപ്രായം. മോഹന്ലാലിന്റെ ജന്മദിനമായ മെയ് 21 ന് പ്രേക്ഷകര്ക്ക് മുന്നിലെത്തുന്ന ഈ ചിത്രത്തിന്റെ പ്രൊമോഷന് തിരക്കിലാണ് സംവിധായകന് ജീത്തു ജോസഫും മോഹന്ലാല് അടക്കമുള്ള താരങ്ങളും.
ഇപ്പോഴിതാ തന്റെ പുതിയ അഭിമുഖത്തില് ഇലക്ട്രോണിക് ഗാഡ്ജെറ്റുകളുമായി തനിക്കുള്ള ബന്ധത്തെക്കുറിച്ച് പറയുകയാണ് മോഹന്ലാല്. താന് ഡിജിറ്റല് ഉപകരണങ്ങള് ഉപയോഗിച്ചാലുണ്ടാകുന്ന പ്രശ്നങ്ങളെക്കുറിച്ചാണ് മോഹന്ലാല് നര്മ്മരൂപത്തില് പറഞ്ഞത്. ആര്ട്ടിഫിഷ്യല് ഇന്റലിജന്സ് ഇഷ്ടമാണോ എന്ന ചോദ്യത്തിനാണ് താരം മറുപടി പറഞ്ഞത്.
‘‘ഇഷ്ടമൊന്നുമല്ല അത് ഈ പിള്ളേരുടെ കൂടെ എന്തെങ്കിലും കാണിക്കാൻ വേണ്ടിയാണ് ഓരോന്ന് ചെയ്യുന്നത്. അതൊക്കെ കാണിച്ചാൽ മാത്രമല്ലേ ഇവരുടെ കൈയിൽ നിന്നും എന്തെങ്കിലും മനസിലാക്കാൻ കഴിയുള്ളൂ. എനിക്കൊരു കുഴപ്പമുള്ളത് എന്താണെന്ന് വെച്ചാൽ ഏതെങ്കിലും ഇലക്ട്രോണിക് ഗാഡ്ജെറ്റ്സ് ഞാൻ തൊട്ടാൽ ചീത്തയായിപ്പോകും. സെറ്റിൽ സീനെല്ലാം നോക്കുന്ന മോണിറ്ററുണ്ടല്ലോ അതിനടുത്ത് കുറച്ച് സമയം പോയി നിന്നാൽ അദ്ദേഹം പറയും ‘സാറേ ഒന്ന് മാറി നിക്ക് സാറേ...’ എന്ന്. ഞാനടുത്ത് നിന്നാല് കീ എന്നുള്ള ശബ്ദത്തോടെ അത് കേടായി പോകും...’ കള്ളച്ചിരിയോടെ മോഹന്ലാല് പറഞ്ഞു.
‘ഓറയായിരിക്കുമോ ഇങ്ങനെ സംഭവിക്കുന്നതിന്റെ കാരണ’മെന്ന് അവതാരക ചോദിച്ചപ്പോള്, ‘‘എന്തോ സ്റ്റാറ്റിക് എലക്ട്രിക്സിറ്റിയുടെ കുഴപ്പമാണ്. എന്റെ ഫോണും ടെലിവിഷനും എല്ലാം ചീത്തയാകും. കുഴപ്പമായി മാറുമോ എന്ന് എനിക്ക് അറിയില്ല... ഞാന് പറഞ്ഞത് സത്യമല്ലേ...’’ എന്നും അവിടെ വന്നിരിക്കുന്ന തന്റെ സഹപ്രവര്ത്തകരോട് മോഹന്ലാല് ചോദിക്കുന്നുണ്ട്. ഒരു പ്രമുഖ മാധ്യമത്തിന് നല്കിയ അഭിമുഖത്തിലാണ് താരമിത് പറഞ്ഞത്. താരത്തിന്റെ ഈ മറുപടി ഏറ്റെടുക്കുകയാണ് ആരാധകര്. രസകരമായ കമന്റുകളും ആരാധകര് പോസ്റ്റിനു താഴെ കുറിക്കുന്നുണ്ട്. ‘ഇല്ലുമിനാണ്ടി ആയത് കൊണ്ടാകും, മിന്നൽ ലാലേട്ടന്, സത്യം പറ ലാലേട്ടാ ഇങ്ങള് ഏലീയനല്ലേ?...’ എന്നതടക്കമാണ് കമന്റുകള്.
അതേസമയം മോഹൻലാല്- ജീത്തു ജോസഫ് കൂട്ടുകെട്ടിലിറങ്ങുന്ന ദൃശ്യം 3യ്ക്കായി ദിവസങ്ങള് എണ്ണിക്കഴിയുകയാണ് ആരാധകര്. ആദ്യ ദിനം തന്നെ പോസിറ്റിവ് അഭിപ്രായങ്ങൾ ലഭിച്ചാൽ ബോക്സോഫീസിലും ചിത്രം ചരിത്രം സൃഷ്ടിക്കുമെന്നുറപ്പാണ്. ഏപ്രിൽ 2 ന് ആഗോള റിലീസ് നിശ്ചയിച്ചിരുന്ന ചിത്രം പശ്ചിമേഷ്യൻ യുദ്ധ പശ്ചാത്തലത്തിൽ മെയ് 21 ലേക്ക് നീട്ടുകയായിരുന്നു. ഇതിനോടകം ബുക്കിംഗ് ആരംഭിച്ച ചിത്രത്തിന് മികച്ച പ്രതികരണമാണ് പ്രേക്ഷകരില് നിന്ന് ലഭിക്കുന്നത്. ആദ്യ ഷോ മെയ് 21 ന് ഇന്ത്യന് സമയം രാവിലെ 8 മണിക്കാണെന്ന് മോഹന്ലാല് പങ്കിട്ടിരുന്നു.
മോഹൻലാലിന് പുറമേ മീന, അൻസിബ ഹസൻ, എസ്തര് അനില്, ആശാ ശരത്, സിദ്ധിഖ്, കലാഭവൻ ഷാജോണ്, ഇര്ഷാദ്, ഗണേഷ് കുമാർ തുടങ്ങിയ താരങ്ങളും സിനിമയിൽ ഉണ്ടാകും. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് സിനിമ നിർമിച്ചിരിക്കുന്നത്. ചിത്രത്തിന്റെ ഹിന്ദി പതിപ്പ് 2026 ഒക്ടോബര് രണ്ടിന് റിലീസ് ചെയ്യും.
