ചെന്നൈ: മുഖ്യമന്ത്രി വിജയ്യുടെ വിശ്വാസ വോട്ടെടുപ്പിനിടെ ബുധനാഴ്ച തമിഴ്നാട് നിയമസഭയില് നാടകീയ രംഗങ്ങള്. തര്ക്കത്തില് പിളര്ന്ന എഐഎഡിഎംകെ എംഎല്എ മാര്ക്ക് വിജയ് പിന്തുണയ്ക്ക് പണം വാഗ്ദാനം ചെയതെന്ന് ആരോപിച്ച് പാര്ട്ടി ജനറല് സെക്രട്ടറി എടപ്പാടി കെ. പളനിസ്വാമി രംഗത്ത് വന്നു. ആരോപണം വിജയ് നിഷേധിച്ചിട്ടുണ്ട്.
47 എഐഎഡിഎംകെ എംഎല്എമാരും വിജയ്ക്കെതിരെ വോട്ട് ചെയ്യുമെന്ന് പളനിസ്വാമി പ്രഖ്യാപിച്ചപ്പോള്, പാര്ട്ടിയിലെ 'വിമത' വിഭാഗത്തെ നയിക്കുന്ന എസ്.പി. വേലുമണി വിജയ്ക്ക് പരസ്യമായി പിന്തുണ പ്രഖ്യാപിച്ചു. സത്യപ്രതിജ്ഞ ചെയ്ത് അധികാരമേറ്റ വിജയ്, സഭയില് ഭൂരിപക്ഷം തെളിയിക്കാനുള്ള വോട്ടെടുപ്പിനെ നേരിടുകയായിരുന്നു. എഐഎഡിഎംകെ എംഎല്എമാരുടെ പിന്തുണയില്ലാതെ തന്നെ വിജയ്ക്ക് നിലവില് 119 എംഎല്എമാരുടെ പിന്തുണയുണ്ട്.
വിശ്വാസ പ്രമേയത്തിന്മേലുള്ള ചര്ച്ചയ്ക്കിടെ എടപ്പാടി പളനിസ്വാമി ഉന്നയിച്ച ആരോപണങ്ങള് സഭയെ പ്രക്ഷുബ്ധമാക്കി. ടിവികെ അധ്യക്ഷന് വോട്ട് ചെയ്യാന് എഐഎഡിഎംകെ എംഎല്എമാരെ പണം നല്കി വശത്താക്കാന് ശ്രമം നടന്നതായി അദ്ദേഹം ആരോപിച്ചു. എസ്.പി. വേലുമണിയുടെ നേതൃത്വത്തിലുള്ള വിഭാഗം വിജയ്ക്ക് പിന്തുണ പ്രഖ്യാപിച്ചതോടെ എഐഎഡിഎംകെയിലെ പിളര്പ്പ് ഔദ്യോഗികമായി തന്നെ പുറത്തുവന്നിരിക്കുകയാണ്. ഇത് തമിഴ്നാട് രാഷ്ട്രീയത്തില് പുതിയ ചര്ച്ചകള്ക്ക് വഴിതെളിച്ചു.
അതിനിടയില് ഉദയനിധി സ്റ്റാലിന്റെ നേതൃത്വത്തില് ഡിഎംകെ സഭയില് നിന്ന് ഇറങ്ങിപ്പോയത് വിജയ്ക്ക് ഭൂരിപക്ഷം തെളിയിക്കാന് വഴി എളുപ്പമാക്കി. പ്രതിപക്ഷ നേതാവിന്റെ പ്രസംഗത്തിന് പിന്നാലെയാണ് ഡിഎംകെ എംഎല്എമാര് സഭയില് നിന്ന് പോയത്. 59 എംഎല്എമാരുള്ള ഡിഎംകെയുടെ ഈ നീക്കം മുഖ്യമന്ത്രി വിജയ്ക്ക് സഭയില് ഭൂരിപക്ഷം തെളിയിക്കാന് വലിയ മുന്തൂക്കം നല്കി.
232 അംഗങ്ങളുള്ള നിയമസഭയില് ഭൂരിപക്ഷം തെളിയിക്കാന് 117 പേരുടെ പിന്തുണയാണ് വേണ്ടിയിരുന്നത്. എന്നാല് ഡിഎംകെ അംഗങ്ങള് വിട്ടുനിന്നതോടെ സഭയിലെ അംഗബലം കുറയുകയും ഭൂരിപക്ഷത്തിന് വേണ്ട സംഖ്യ 88 ആയി താഴുകയും ചെയ്തു. വിശ്വാസ പ്രമേയ ചര്ച്ചയ്ക്കിടെ തമിഴ്നാടിന് വേണ്ടത് ഒരു 'റിയല്' ഗവണ്മെന്റാണെന്നും അല്ലാതെ സിനിമയിലേതുപോലെയുള്ള 'റീല്' ഗവണ്മെന്റല്ലെന്നും അദ്ദേഹം പരിഹസിച്ചു. പരസ്യമായ കുതിരക്കച്ചവടമാണ് സഭയില് നടക്കുന്നത്. എംഎല്എമാര് പാര്ട്ടി മാറുന്നതിന് മുന്പ് തന്നെ ഭരണകക്ഷി നേതാക്കള് അവരെ ചെന്ന് കണ്ട് ക്ഷണിക്കുന്നത് പുതിയ രീതിയാണെന്ന് അദ്ദേഹം പരിഹസിച്ചു.
സിപിഐ, സിപിഎം, വിസികെ, ഐയുഎംഎല് എന്നീ കക്ഷികള് വിജയ്യെ പിന്തുണയ്ക്കുന്നത് രാഷ്ട്രപതി ഭരണം ഒഴിവാക്കാനും ഒരു മതേതര സര്ക്കാര് രൂപീകരിക്കാനും വേണ്ടിയാണ്. എന്നാല് ബിജെപിക്കൊപ്പം ചേര്ന്ന് മത്സരിച്ചവരാണ് ഇപ്പോള് വിജയ്യെ പിന്തുണയ്ക്കുന്നതെന്ന് എഐഎഡിഎംകെയിലെ ഒരു വിഭാഗത്തിന്റെ പിന്തുണയെ സൂചിപ്പിച്ച് അദ്ദേഹം പറഞ്ഞു.
'നിങ്ങള് പറയുന്ന ഈ 'മാറ്റത്തിന്' പിന്നില് വലിയ പണമിടപാടുകള് നടന്നിട്ടുണ്ടോ എന്ന് ജനങ്ങള് സംശയിക്കുന്നു,' എന്നും ഉദയനിധി കൂട്ടിച്ചേര്ത്തു. ഇതിന് പിന്നാലെയാണ് ഡിഎംകെ സഭ ബഹിഷ്കരിച്ചത്.
