മികച്ച ഭൂരിപക്ഷത്തോടെയാണ് 2026 കേരള നിയമസഭ തെരഞ്ഞെടുപ്പില് കോണ്ഗ്രസ് പാര്ട്ടി ജനവിധി തേടി വിജയിച്ചത്. ഭരണമാറ്റം ആഗ്രഹിക്കുന്ന ജനത കേരളത്തിലുണ്ടെന്ന് തെളിയിക്കുന്നതായിരുന്നു ഇത്തവണത്തെ തെരഞ്ഞെടുപ്പ് ഫലം. എന്നാല് ഇലക്ഷന് റിസള്ട്ട് വന്ന് ഇത്ര ദിവസം കഴിഞ്ഞിട്ടും മുഖ്യമന്ത്രി കസേരയില് ആരിരിക്കും എന്നുള്ളതില് കോണ്ഗ്രസിന് അന്തിമ തീരുമാനമായിട്ടില്ല.
ഇപ്പോഴിതാ കേരളത്തിൽ തിരഞ്ഞെടുപ്പിനുശേഷം മുഖ്യമന്ത്രിയെ തിരഞ്ഞെടുക്കാത്തതിനെക്കുറിച്ച് തമാശ നിറഞ്ഞുള്ള പരാമര്ശം നടത്തുകയാണ് സംവിധായകൻ ആർ.ജെ ബാലാജി. ഏറെ നാളുകൾക്കുശേഷം സൂര്യ നായകനായി തിയേറ്ററുകളിലെത്തുന്ന ‘കറുപ്പ്’ എന്ന ചിത്രത്തിന്റെ കേരള പ്രീറിലീസ് ചടങ്ങിനിടെയാണ് ബാലാജി കേരളത്തിലെ മുഖ്യമന്ത്രി കസേരയ്ക്കുള്ള പോരിനെക്കുറിച്ച് സംസാരിച്ചത്.
‘‘കേരളവും തമിഴ്നാടും തമ്മിൽ ഒരുപാട് സാമ്യതകൾ ഉണ്ട്. പലതും ഒരു പോലെയാണ്. അടുത്തിടെ ഞങ്ങളുടെ നാട്ടിൽ ഒരുപാട് പാര്ട്ടിയില് നിന്ന് നിരവധി പേര് മുഖ്യമന്ത്രിയാന് ശ്രമിച്ചു. ഇവിടെ ഒരു പാര്ട്ടിയില് നിന്നും നിരവധി പേര് സിഎം ആകാന് ശ്രമിക്കുന്നു. ഞങ്ങൾക്ക് ഒരു നല്ല സിഎമ്മിനെ കിട്ടി. നിങ്ങൾക്കും വേഗം ഒരു നല്ല മുഖ്യമന്ത്രിയെ കിട്ടട്ടെ എന്ന് ആശംസിക്കുന്നു. രണ്ട് സംസ്ഥാനങ്ങൾക്കുമുള്ള മറ്റൊരു സാമ്യത സൂര്യ സാറിനോടുള്ള സ്നേഹമാണ്...’’ എന്നാണ് ബാലാജി തമാശ രൂപത്തില് പറഞ്ഞത്. സൂര്യയും കേരളവും തമ്മിലുള്ള ബന്ധം പറയുമ്പോഴാണ് ബാലാജി മുഖ്യമന്ത്രി ചര്ച്ച പരാമര്ശിച്ചത്. ബാലാജിയുടെ വാക്കുകള് ചടങ്ങിയെത്തിയവര് വലിയ ആരവത്തോടെയാണ് സ്വീകരിച്ചത്. അതിനു പിന്നാലെ ഇതിന്റെ വീഡിയോ സോഷ്യല് മീഡിയയില് വൈറലായി.
സിനിമയെക്കുറിച്ചും കേരളത്തെ ഇഷ്ടപ്പെടുന്നതിനെക്കുറിച്ചും ബാലാജി സംസാരിച്ചു. ‘‘എനിക്ക് മലയാളം വളരെ ഇഷ്ടമാണ്. ഇവിടുത്തെ അഭിനേതാക്കളെയും ഇഷ്ടമാണ്. കോളജിൽ പഠിക്കുമ്പോൾ സുഹൃത്തുക്കളെല്ലാം മലയാളികളായിരുന്നു. ഇന്ന് എന്റെ സിനിമയിൽ അഭിനയിക്കുന്ന മിക്ക താരങ്ങളും മലയാളികളാണ്. അതിൽ ഒരുപാട് സന്തോഷം.
സൂര്യ നായകനായി വന്ന സിനിമയിൽ എനിക്ക് ഒരേയൊരു താരം വേണമെന്നത് നിർബന്ധമായിരുന്നു. അത് മറ്റാരുമല്ല നമ്മുടെ സ്വന്തം ഇന്ദ്രൻസ് സർ ആണ്. ഇതിഹാസ താരമാണ് അദ്ദേഹം. അവരാണ് ഈ സിനിമയുടെ ആത്മാവ്. സാറിനെ കുറിച്ച് സംസാരിക്കാൻ സാധിക്കുന്നതു തന്നെ വലിയ ആദരമായി കാണുന്നു. ശിവദ, സ്വാസിക, ഉണ്ണിമായ പ്രസാദ്, കാശ് പോലും മേടിക്കാതെ വന്ന് അതിഥിവേഷം ചെയ്തുപോയ അജു വർഗീസ് എല്ലാവർക്കും നന്ദി പറയുന്നു...’’ എന്നാണ് ബാലാജി പറഞ്ഞത്.
സൂര്യയ്ക്കൊപ്പം തൃഷയും ഒന്നിക്കുന്ന ചിത്രമാണ് കറുപ്പ്. രണ്ട് പതിറ്റാണ്ടുകള്ക്ക് ശേഷമാണ് ഇരുവരും ഒന്നിക്കുന്നത്. സൂര്യക്കും തൃഷയ്ക്കും പുറമെ ഇന്ദ്രൻസ്, നട്ടി സുബ്രഹ്മണ്യം, സ്വാസിക, ശിവദ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. മേയ് 14നാണ് ചിത്രത്തിന്റെ റിലീസ്.
