നടനും മോഡലുമായ രാഹുല് ദേവ് പ്രേക്ഷകര്ക്ക് സുപരിചിതനാണ്. തന്റെ ജീവിതത്തിലെ ഏറ്റവും പ്രതിസന്ധി നിറഞ്ഞ ഒരു കാലഘട്ടത്തെക്കുറിച്ച് സംസാരിക്കുകയാണ് രാഹുലിപ്പോള്. 2009ല് ഭാര്യ റീന ദേവിന്റെ വേര്പാടിന് പിന്നാലെയാണ് രാഹുല് സിനിമാ ലോകത്ത് നിന്ന് താല്ക്കാലികമായി വിട്ടുനിന്നത്.
തന്റെ മകന് സിദ്ധാര്ഥിനെ ഒരു സിംഗിള് പാരന്റ് എന്ന നിലയില് വളര്ത്തുന്നതിനും അവനോടൊപ്പം സമയം ചെലവഴിക്കുന്നതിനുമായിരുന്നു അദ്ദേഹം അന്ന് മുന്ഗണന നല്കിയത്. എന്നാല് ഏകദേശം നാലര വര്ഷത്തെ ഇടവേളക്ക് ശേഷം വീണ്ടും വെളളിത്തിരയിലേക്ക് മടങ്ങിവരാന് ശ്രമിച്ചപ്പോള് ബോളിവുഡ് തന്നെ മറന്നുപോയതായി അദ്ദേഹത്തിന് തോന്നി.
സിനിമയില് നിന്ന് വിട്ടുനില്ക്കുന്നത് തന്റെ കരിയറിനെ ഇത്രത്തോളം ബാധിക്കുമെന്ന് ഒരിക്കലും പ്രതീക്ഷിച്ചിരുന്നില്ലെന്നും അദ്ദേഹം പറയുന്നു. ഒരു യൂട്യൂബ് ചാനലിന് നല്കിയ അഭിമുഖത്തില് സംസാരിക്കുകയായിരുന്നു താരം.
"ബിഗ് ബോസിൽ നിന്ന് കോൾ വന്നപ്പോൾ അത് ചെയ്യുമെന്ന് ഞാനൊരിക്കലും കരുതിയില്ല. പക്ഷേ ഗുരുജി എന്നോട് പറഞ്ഞു, 'പോകൂ, നീ എവിടെ നിന്നെങ്കിലും തുടങ്ങണം. അങ്ങനെ കാര്യങ്ങൾ പതുക്കെ വീണ്ടും ആരംഭിച്ചു. ഞാൻ തിരികെ വന്നപ്പോൾ എനിക്ക് സിനിമകളൊന്നും കിട്ടിയില്ല. ഞാൻ ഏകദേശം 80- 81 സിനിമകൾ ചെയ്തു. പക്ഷേ നാലര വർഷത്തിന് ശേഷം ഞാൻ തിരികെയെത്തിയപ്പോൾ എന്നെ ആർക്കും അറിയില്ലെന്ന് തോന്നി.
ആളുകൾ എന്നെ മറന്നു പോയിരുന്നു. ഇതിൽ ആരെയും കുറ്റം പറയാൻ പറ്റില്ല, കാരണം കാലം മാറും. ആളുകളെ കുറ്റപ്പെടുത്തുന്നതിനോട് എനിക്ക് ഒരിക്കലും ഇഷ്ടമല്ലായിരുന്നു. ഏറ്റവും പ്രധാനപ്പെട്ട കാര്യം അനുഭവങ്ങളിലൂടെ പഠിക്കുക എന്നതാണ്. എനിക്കതിൽ വലിയ പ്രശ്നമൊന്നുമില്ല. ഈ ഇൻഡസ്ട്രി എനിക്ക് ഒരുപാട് കാര്യങ്ങൾ തന്നിട്ടുണ്ട്.
സാഹചര്യങ്ങൾ കാരണം മാറി നിൽക്കുക എന്നത് എന്റെ തീരുമാനമായിരുന്നു. അതിൽ എനിക്ക് ഖേദമില്ല".- രാഹുൽ ദേവ് പറഞ്ഞു. ഒറ്റക്ക് ഒരു കുട്ടിയെ വളർത്തുന്നതിലെ വെല്ലുവിളികൾ തന്നെ മാനസികമായി തളർത്തിയെങ്കിലും, തന്റെ ആത്മീയ ഗുരുവിന്റെ പിന്തുണയാണ് ആ പ്രതിസന്ധികളെ മറികടക്കാൻ സഹായിച്ചതെന്നും അദ്ദേഹം വെളിപ്പെടുത്തി.
