കണ്ണൂര്: സി.പി.എം. നേതൃത്വത്തിനെതിരേ കണ്ണൂര് ജില്ലാ സെക്രട്ടേറിയറ്റില് രൂക്ഷ വിമര്ശനം. നേതൃത്വത്തിന്റെ ശൈലി തിരിച്ചടിക്കു കാരണമായെന്ന് സെക്രട്ടേറിയറ്റ് അംഗങ്ങള് തുറന്നടിച്ചു. പാര്ട്ടിയുടെ ഉരുക്കുകോട്ടകളായ പയ്ന്നൂരിലും തളിപ്പറമ്പിലും യു.ഡി.എഫ്. നേടിയ ഞെട്ടിക്കുന്ന വിജയമാണു ചൂടേറിയ ചര്ച്ചയ്ക്കു വഴിയൊരുക്കിയത്.
രക്തസാക്ഷി ഫണ്ട് തട്ടിപ്പ് ആരോപിച്ചതിനു പിന്നാലെ പാര്ട്ടി വിട്ട വി. കുഞ്ഞിക്കൃഷ്ണനും ടി.കെ. ഗോവിന്ദനും ഉന്നയിച്ച വിഷയങ്ങള് നേതൃത്വം ഗൗരവത്തിലെടുത്തില്ലെന്ന് അവര് ചൂണ്ടിക്കാട്ടി. മുതിര്ന്ന അംഗം പാര്ട്ടി വിടുന്നതു തടയാന് നേതൃത്വത്തിന്റെ ഭാഗത്തുനിന്ന് ഇടപെടലുണ്ടായില്ലെന്നു തലശേരി മേഖലയില്നിന്നുള്ള സെക്രട്ടേറിയറ്റ് അംഗം കുറ്റപ്പെടുത്തി.
പയ്ന്നൂര്, തളിപ്പറമ്പ് വിഷയങ്ങളില് ജില്ലാ സെക്രട്ടറി കെ.കെ. രാഗേഷിനെ പ്രതിനിധികള് പ്രതിക്കൂട്ടിലാക്കി. ജില്ലാ സെക്രട്ടറിയുടെ നിലപാടുകള് പ്രശ്നം കൂടുതല് വഷളാക്കിയെന്നും ആരോപണമുണ്ടായി. സംസ്ഥാന സെക്രട്ടറി എം.വി. ഗോവിന്ദന്, ഇ.പി. ജയരാജന്, കെ.കെ. ശൈലജ, പി.കെ.ശ്രീമതി തുടങ്ങിയ മുതിര്ന്ന നേതാക്കളുടെ സാന്നിധ്യത്തിലായിരുന്നു അഴീക്കോടന് മന്ദിരത്തില് കണ്ണൂര് ജില്ലാ സെക്രട്ടേറിയറ്റ് യോഗം ചേര്ന്നത്.
എറണാകുളം
'ഏകാധിപത്യം പാര്ട്ടിയില് പിണറായി വക; ഇവിടെ രാജീവ് വക'
കൊച്ചി: സിറ്റിങ് സീറ്റുകള് ഉള്പ്പെടെ നഷ്ടപ്പെട്ട എറണാകുളം ജില്ലയില് സി.പി.എം. സ്ഥാനാര്ഥിപ്പട്ടിക നിര്ബന്ധിച്ച് അംഗീകരിപ്പിച്ചതാണ് തോല്വിക്കു കാരണമായതെന്നു ജില്ലാ സെക്രട്ടറിയേറ്റ് കുറ്റപ്പെടുത്തി. ജില്ലയിലെ സമ്പൂര്ണ തോല്വിക്കു കാരണം കേന്ദ്ര സെക്രട്ടേറിയറ്റ് അംഗം കൂടിയായ പി. രാജീവ് ആണെന്നും വിമര്ശനമുണ്ടായി.
മുഖ്യമന്ത്രിയുടെയും പാര്ട്ടി സെക്രട്ടറിയുടെയും ശൈലിക്കെതിരേയും എറണാകുളത്തു പ്രതിഷേധശബ്ദം ഉയര്ന്നു. പാര്ട്ടിയില് പിണറായിയുടെ ഏകാധിപത്യം എങ്കില് എറണാകുളത്ത് പി.രാജീവിന്റെ ഏകാധിപത്യമാണ് ഉണ്ടായതെന്ന് അദ്ദേഹംകൂടി പങ്കെടുത്ത സെക്രട്ടേറിയറ്റ് യോഗം കുറ്റപ്പെടുത്തി.
കൊല്ലം
'പിണറായി പ്രതിപക്ഷ നേതാവ് സ്ഥാനം
ഏറ്റെടുക്കാന് പാടില്ലായിരുന്നു'
കൊല്ലം: പിണറായി വിജയന് പ്രതിപക്ഷ നേതാവ് സ്ഥാനം ഏറ്റെടുക്കാന് പാടില്ലായിരുന്നുവെന്നു കൊല്ലം ജില്ലാ സെക്രട്ടേറിയറ്റ് യോഗത്തില് അഭിപ്രായമുയര്ന്നു. ജനവിധി മാനിച്ച് അദ്ദേഹം മാറിനില്ക്കണമായിരുന്നെന്ന് അംഗങ്ങള് തുറന്നടിച്ചു.
തെരഞ്ഞെടുപ്പു പരാജയം ചര്ച്ച ചെയ്യാന് കേന്ദ്ര കമ്മിറ്റിയംഗങ്ങളായ കെ.എന്. ബാലഗോപാല്, പുത്തലത്ത് ദിനേശന്, സംസ്ഥാന സെക്രട്ടേറിയറ്റ് അംഗം കെ.കെ. ജയചന്ദ്രന് എന്നിവരുടെ സാന്നിധ്യത്തില് ചേര്ന്ന ജില്ലാ സെക്രട്ടേറിയറ്റ് യോഗത്തിലാണ് അംഗങ്ങള് രൂക്ഷ വിമര്ശനം ഉന്നയിച്ചത്. പിണറായിക്കും പാര്ട്ടി സംസ്ഥാന സെക്രട്ടറി എം.വി. ഗോവിന്ദനും എതിരേ ശക്തമായ പ്രതിഷേധമാണുണ്ടായത്.
'പിണറായി ഭരണത്തില്നിന്നു ജനങ്ങള് മാറ്റം ആഗ്രഹിച്ചതാണ് പരാജയത്തിനു പ്രധാന കാരണം. പിണറായി വിജയന്റെ ഭാഷയും ശൈലിയും പ്രയോഗ രീതികളും ജനങ്ങളെ വെറുപ്പിച്ചു. ആറു ജില്ലകളില് പാര്ട്ടിക്ക് ഒരു സീറ്റ് പോലും ഇല്ല. ഭരണവിരുദ്ധ തരംഗം ഉണ്ടായിട്ടില്ലെങ്കില് എന്തുകൊണ്ടു തോറ്റു എന്നതിനു നേതൃത്വം മറുപടി പറയണം'-അംഗങ്ങള് ആവശ്യപ്പെട്ടു.
