ഇക്കഴിഞ്ഞ ഏപ്രില് 20-നാണ് സംവിധായകന് അറ്റ്ലിക്കും ഭാര്യ പ്രിയ അറ്റ്ലിക്കും പെണ്കുഞ്ഞ് പിറന്നത്. ഇപ്പോള് മകളുടെ പേര് ആരാധകരുമായി പങ്കുവച്ചിരിക്കുകയാണ് ഇരുവരും. മിയു എന്നാണ് കുഞ്ഞിന്റെ പേര്.
തങ്ങളുടെ കുഞ്ഞുമാലാഖയുടെ കുഞ്ഞിക്കൈ കാണിച്ചുകൊണ്ടുളള മനോഹരമായ ഒരു പോസ്റ്റാണ് ദമ്പതികള് പങ്കുവച്ചത്. ' ഞങ്ങളുടെ ഹൃദയത്തില് ഏറ്റവും വലിയ സ്ഥാനമുളള ഒരു കൊച്ചു വ്യക്തി'. ' ഞങ്ങളുടെ പ്രണയത്തിന്റെ കലയ്ക്ക് ഇപ്പോള് ഒരു പേരുണ്ട്.. ' MIYOU' - ഭംഗി, ശാന്തത പ്രണയം. സ്നേഹത്തോടെ മീര്, പ്രിയ, അറ്റ്ലി'', എന്നാണ് പോസ്റ്റില് ഇരുവരും കുറിച്ചത്.
2014-ല് ആണ് അറ്റ്ലിയും പ്രിയയും തമ്മിലുളള വിവാഹം നടന്നത്. ഏറെ നാളത്തെ പ്രണയത്തിനൊടുവിലാണ് ഇരുവരും ജീവിത്തതിലും ഒന്നിച്ചത്. 2023 ജനുവരി 31-നാണ് ദമ്പതികള്ക്ക് തങ്ങളുടെ ആദ്യത്തെ കണ്മണിയായ മകന് മീര് ജനിക്കുന്നത്.
അതേസമയം ' രാക' എന്ന ചിത്രമാണ് അറ്റ്ലിയുടേതായി ഇപ്പോള് അണിയറയില് ഒരുങ്ങുന്ന ചിത്രം. അല്ലു അര്ജുനും ദീപിക പദുക്കോണുമാണ് ചിത്രത്തില് പ്രധാന വേഷങ്ങളിലെത്തുന്നത്.
