ചെന്നൈ: നിരോധിതസംഘടനയായ എല്.ടി.ടി.ഇയുടെ സ്ഥാപകന് വേലുപ്പിള്ള പ്രഭാകരന് തമിഴ്നാട് മുഖ്യമന്ത്രി സി. ജോസഫ് വിജയ് ആദരാഞ്ജലിയര്പ്പിച്ചതു വന്വിവാദത്തില്. മുന്പ്രധാനമന്ത്രിയും രാഹുല് ഗാന്ധിയുടെ പിതാവുമായ രാജീവ് ഗാന്ധിയെ കൊലപ്പെടുത്തിയ സംഘടനയാണ് എല്.ടി.ടി.ഇയെന്ന് ഓര്മിപ്പിച്ച്, വിജയ് സര്ക്കാരിന്റെ ഭാഗമായ കോണ്ഗ്രസിനെ ബി.ജെ.പി. വെട്ടിലാക്കി.
ശ്രീലങ്കയിലെ തമിഴ് വംശഹത്യയെപ്പറ്റിയാണ് വിജയ് പരാമര്ശിച്ചതെന്നും പ്രഭാകരന്റെ മരണത്തെപ്പറ്റി മാത്രമല്ലെന്നും ഭരണകക്ഷിയായ ടി.വി.കെ. ന്യായീകരിച്ചു. 2009 മേയ് 18-നാണ് പ്രഭാകരനെ ശ്രീലങ്കന് സൈന്യം വധിച്ചത്. പ്രഭാകരന് കൊല്ലപ്പെട്ടതിന്റെ 17-ാം വാര്ഷികദിനത്തില് വിജയ് 'എക്സി'ല് പോസ്റ്റ് ചെയ്ത കുറിപ്പാണ് വിവാദമായത്. പ്രഭാകരന് വധിക്കപ്പെട്ട മുള്ളിവൈക്കല് എന്ന സ്ഥലം പരാമര്ശിച്ചായിരുന്നു കുറിപ്പ്. ''മുള്ളിവൈക്കലിന്റെ സ്മരണകള് നമ്മുടെ ഹൃദയങ്ങളിലുണ്ടാകണം. കടലിനപ്പുറം കഴിയുന്ന നമ്മുടെ തമിഴ് സഹോദരങ്ങളുടെ അവകാശങ്ങള്ക്കായി നമ്മള് ഐക്യദാര്ഢ്യത്തോടെ നിലകൊള്ളണം''- വിജയ് ആഹ്വാനം ചെയ്തു.
വിജയ്യുടെ കുറിപ്പ് ചൂണ്ടിക്കാട്ടി കോണ്ഗ്രസിനെതിരേ ബി.ജെ.പി. രംഗത്തുവന്നു. പ്രഭാകരന്റെ സംഘടനയാണ് രാജീവ് ഗാന്ധിയെ വധിച്ചതെന്നും അധികാരത്തിന്റെ അപ്പക്കഷണം കിട്ടിയാല് രാഹുല് ഗാന്ധിക്ക് അതൊന്നും പ്രശ്നമല്ലെന്നും ബി.ജെ.പി. മാധ്യമവിഭാഗം മേധാവി അമിത് മാളവ്യ പരിഹസിച്ചു. ഡി.എം.കെയും എല്.ടി.ടി.ഇ. അനുഭാവികളാണ്. എന്നിട്ടും അവരുമായി കോണ്ഗ്രസ് സഖ്യമുണ്ടാക്കി- മാളവ്യ ചൂണ്ടിക്കാട്ടി.
