ന്യൂഡൽഹി: നാഷണൽ ക്രൈം റെക്കോർഡ്സ് ബ്യൂറോയുടെ (എൻസിആർബി) കണക്കുകൾ പ്രകാരം 2024-ൽ ഇന്ത്യയിൽ രേഖപ്പെടുത്തിയത് 5,737 സ്ത്രീധന മരണങ്ങൾ. മുൻവർഷങ്ങളെ അപേക്ഷിച്ച് ഇതിൽ നേരിയ കുറവുണ്ടായിട്ടുണ്ടെങ്കിലും, ഈ കണക്കുകൾ രാജ്യത്ത് നിലനിൽക്കുന്ന പ്രശ്നത്തിന്റെ വ്യാപ്തി എത്രത്തോളമാണെന്ന് വ്യക്തമാക്കുന്നു.
കഴിഞ്ഞ ദശകത്തിലെ കണക്കുകൾ പരിശോധിച്ചാൽ സ്ത്രീധന മരണങ്ങൾ 2015-ലെ 7,634-ൽ നിന്ന് 2024-ൽ 5,737 ആയി ക്രമേണ കുറഞ്ഞിട്ടുണ്ട്. ഏതാണ്ട് 1,900 കേസുകളുടെ ഈ കുറവ് ചില പുരോഗതികളെ സൂചിപ്പിക്കുന്നുണ്ടെങ്കിലും, രാജ്യമൊട്ടാകെ പ്രതിദിനം 15-ലധികം സ്ത്രീധന മരണങ്ങൾ ഇപ്പോഴും നടക്കുന്നുണ്ടെന്നാണ് ഈ കണക്കുകൾ വ്യക്തമാക്കുന്നത്.
എന്നാൽ, ഈ കേസുകളുടെ വിതരണം എല്ലാ സംസ്ഥാനങ്ങളിലും ഒരുപോലെയല്ല. ചില സംസ്ഥാനങ്ങളിലാണ് രാജ്യത്തെ സ്ത്രീധന മരണങ്ങളിൽ ഭൂരിഭാഗവും റിപ്പോർട്ട് ചെയ്യപ്പെടുന്നത്. ഉത്തർപ്രദേശിൽ മാത്രം 2024-ൽ 2,038 കേസുകൾ റിപ്പോർട്ട് ചെയ്തു, ഇത് രാജ്യത്തെ ആകെ കേസുകളുടെ മൂന്നിലൊന്നിൽ അധികമാണ്. തൊട്ടുപിന്നാലെയുള്ള ബിഹാറിൽ 1,078 കേസുകളും മധ്യപ്രദേശിൽ 450 കേസുകളും റിപ്പോർട്ട് ചെയ്യപ്പെട്ടു. രാജസ്ഥാനിലും പശ്ചിമ ബംഗാളിലും യഥാക്രമം 386-ഉം 337-ഉം കേസുകൾ വീതം രേഖപ്പെടുത്തിയിട്ടുണ്ട്. ഈ സംസ്ഥാനങ്ങളിലെ ഉയർന്ന നിരക്ക്, സ്ത്രീധനവുമായി ബന്ധപ്പെട്ട അതിക്രമങ്ങൾ ചില പ്രദേശങ്ങളിൽ എത്രത്തോളം ആഴത്തിൽ വേരൂന്നിയതാണെന്ന് ചൂണ്ടിക്കാണിക്കുന്നു.
മാനസിക-ശാരീരിക പീഡനങ്ങളെത്തുടർന്നുള്ള ആത്മഹത്യകളും മറ്റ് അസ്വാഭാവിക മരണങ്ങളും സ്ത്രീധന മരണങ്ങളുടെ പരിധിയിൽ വരുന്നുണ്ട്. എങ്കിലും, നേരിട്ടുള്ള അതിക്രമങ്ങൾ കാരണം സംഭവിക്കുന്ന 'സ്ത്രീധന കൊലപാതകങ്ങളുടെ' കണക്കുകളും എൻ.സി.ആർ.ബി ശേഖരിക്കുന്നുണ്ട്. 2024-ൽ പശ്ചിമ ബംഗാളിൽ ഇത്തരം 163 കേസുകൾ റിപ്പോർട്ട് ചെയ്യപ്പെട്ടു, തൊട്ടുപിന്നാലെ ഒഡീഷയിൽ 161 കേസുകളും ഉണ്ടായി. രാജസ്ഥാനിൽ 75 കേസുകളും ബിഹാറിലും ഉത്തർപ്രദേശിലും യഥാക്രമം 66-ഉം 58-ഉം കേസുകളും രേഖപ്പെടുത്തിയിട്ടുണ്ട്. സ്ത്രീധന തർക്കങ്ങൾ പലപ്പോഴും ക്രൂരമായ കൊലപാതകങ്ങളിലേക്ക് വരെ വഴിമാറുന്നു എന്നാണ് ഈ കണക്കുകൾ വ്യക്തമാക്കുന്നത്.
ഭർത്താവിൽ നിന്നോ ഭർതൃബന്ധുക്കളിൽ നിന്നോ ഉള്ള ക്രൂരതകൾക്ക് എതിരെ രജിസ്റ്റർ ചെയ്യുന്ന കേസുകളുടെ വലിയ എണ്ണം ഈ മരണങ്ങളുടെ പശ്ചാത്തലത്തിലേക്ക് വെളിച്ചം വീശുന്നതാണ്. 2024-ൽ ഇന്ത്യയിൽ ഇത്തരത്തിലുള്ള 1.20 ലക്ഷത്തിലധികം കേസുകൾ രജിസ്റ്റർ ചെയ്തിട്ടുണ്ട്. കഴിഞ്ഞ ഒരു ദശകമായി ഈ വാർഷിക കണക്കുകൾ ഒരു ലക്ഷത്തിന് മുകളിൽ തന്നെ തുടരുകയാണ് ചെയ്യുന്നത്.
ഉയർന്ന സ്ത്രീധന മരണങ്ങൾ റിപ്പോർട്ട് ചെയ്യുന്ന സംസ്ഥാനങ്ങളിൽ തന്നെയാണ് ഗാർഹിക പീഡനക്കേസുകളും കൂടുതൽ. 2024-ൽ ഉത്തർപ്രദേശിൽ 21,000-ത്തിലധികം കേസുകളും പശ്ചിമ ബംഗാളിൽ 19,000-ത്തിലധികം കേസുകളും റിപ്പോർട്ട് ചെയ്യപ്പെട്ടു. രാജസ്ഥാൻ, മഹാരാഷ്ട്ര, തെലങ്കാന എന്നീ സംസ്ഥാനങ്ങളിലും പതിനായിരത്തിലധികം കേസുകൾ വീതം രേഖപ്പെടുത്തിയിട്ടുണ്ട്. തീർപ്പാക്കാതെ കിടക്കുന്ന കേസുകൾ നിയമസംവിധാനത്തിലെ കാലതാമസത്തെയാണ് ചൂണ്ടിക്കാണിക്കുന്നത്. പോലീസിൽ ഫയൽ ചെയ്യുന്ന കേസുകളിൽ ഗണ്യമായ ഒരു പങ്ക് ഇപ്പോഴും പരിഹരിക്കപ്പെടാതെ കിടക്കുകയാണെന്ന് എൻ.സി.ആർ.ബി കണക്കുകൾ കാണിക്കുന്നു. ഇത് എപ്പോഴും 30% മുതൽ 40% വരെയാണ്. 2024-ൽ മാത്രം രജിസ്റ്റർ ചെയ്ത കേസുകളിൽ 37 ശതമാനത്തോളം ഇനിയും തീർപ്പാക്കാനുണ്ട്.
