ജപ്പാനിലെ സെറ്റോ ഉള്ക്കടലില് ഹിരോഷിമ പ്രവിശ്യയിലെ തകെഹാര നഗരത്തിന് സമീപം സ്ഥിതി ചെയ്യുന്ന ഓകുനോഷിമ ലോകത്തിലെ ഏറ്റവും സവിശേഷതകളുള്ള ദ്വീപുകളിലൊന്നാണ്. 'റാബിറ്റ് ഐലന്ഡ്' എന്ന് പരക്കെ അറിയപ്പെടുന്ന ഈ കൊച്ചുദ്വീപിലേക്ക് സഞ്ചാരികളെ ആകര്ഷിക്കുന്നത് ഇവിടുത്തെ കടല്ത്തീരങ്ങളിലും വനങ്ങളിലും നടപ്പാതകളിലുമെല്ലാം സ്വതന്ത്രമായി വിഹരിക്കുന്ന ഇണക്കമുള്ള കാട്ടുമുയലുകളാണ്. പ്രകൃതിഭംഗിയും കൗതുകമുണര്ത്തുന്ന കാഴ്ചകളും നിറഞ്ഞ ഈ ദ്വീപ് ഇന്ന് അന്താരാഷ്ട്ര തലത്തില് പ്രശസ്തമായ ഒരു ടൂറിസ്റ്റ് കേന്ദ്രമാണ്.
എന്നാല്, ഈ മനോഹര ദ്വീപിന് ഇരുണ്ടതും ഭീതിജനകവുമായ ഒരു ഭൂതകാലമുണ്ട്. ഇരുപതാം നൂറ്റാണ്ടിന്റെ തുടക്കത്തില് അതീവ രഹസ്യസ്വഭാവമുള്ള സ്ഥലമായിരുന്നതിനാല് ചില ജാപ്പനീസ് ഭൂപടങ്ങളില് നിന്ന് പോലും ഈ ദ്വീപിനെ ഒഴിവാക്കിയിരുന്നു. 1929 നും 1945 നും ഇടയില് ജാപ്പനീസ് സൈന്യം വിഷവാതകങ്ങള് നിര്മിക്കാനാണ് ഈ ദ്വീപ് ഉപയോഗിച്ചത്. അക്കാലത്ത് വിഷ രാസവസ്തുക്കളുമായുള്ള സമ്പര്ക്കം കാരണം ഇവിടുത്തെ തൊഴിലാളികള് ഗുരുതരമായ ആരോഗ്യപ്രശ്നങ്ങള് നേരിട്ടിരുന്നു. യുദ്ധകാലത്തെ രാസയുദ്ധങ്ങളുടെ ഭീകരതയെക്കുറിച്ച് സന്ദര്ശകരെ ഓര്മ്മിപ്പിക്കുന്നതിനായി ഉപേക്ഷിക്കപ്പെട്ട സൈനിക കെട്ടിടങ്ങളുടെ ശേഷിപ്പുകളും ഒരു 'പോയ്സണ് ഗ്യാസ് മ്യൂസിയവും' ഇന്നും ഇവിടെ സംരക്ഷിച്ചുപോരുന്നുണ്ട്.
ചരിത്രപരമായ പശ്ചാത്തലമുണ്ടെങ്കിലും ഓകുനോഷിമ ഇന്ന് അറിയപ്പെടുന്നത് മുയലുകളുടെ പേരിലാണ്. യുദ്ധകാലത്ത് രാസായുധ പരീക്ഷണങ്ങള്ക്ക് ഉപയോഗിച്ച മുയലുകളുടെ പിന്തലമുറക്കാരാണ് ഇവയെന്നൊരു വാദമുണ്ടെങ്കിലും പല ചരിത്രകാരന്മാരും ഇത് തള്ളിക്കളയുന്നു. 1970കളില് സ്കൂള് കുട്ടികള് ഏതാനും മുയലുകളെ ദ്വീപില് തുറന്നുവിട്ടതാണെന്നും സ്വാഭാവിക ശത്രുക്കള് ഇല്ലാത്തതിനാല് അവ അതിവേഗം പെരുകിയതാണെന്നുമാണ് മറ്റൊരു പ്രമുഖ സിദ്ധാന്തം. ദ്വീപിലെത്തുന്ന സഞ്ചാരികളുടെ പ്രധാന വിനോദം ഈ മുയലുകള്ക്ക് തീറ്റ നല്കുക എന്നതാണെങ്കിലും, മൃഗങ്ങളെയും പരിസ്ഥിതിയെയും സംരക്ഷിക്കുന്നതിനുള്ള കര്ശനമായ നിയമങ്ങള് പാലിക്കാന് സന്ദര്ശകര് ബാധ്യസ്ഥരാണ്.
