മുപ്പത്തിയേഴാം പിറന്നാൾ ദിനത്തിൽ വികാരഭരിതമായ കുറിപ്പുമായി മലയാളികളുടെ പ്രിയനടി ഭാമ. തന്റെ പിറന്നാൾ ദിനത്തിൽ ജീവിതാനുഭവങ്ങളെയും ഈശ്വരവിശ്വാസത്തെയും കോർത്തിണക്കി താരം ഇൻസ്റ്റഗ്രാമിൽ പങ്കുവെച്ച വികാരഭരിതമായ കുറിപ്പാണ് ഇപ്പോൾ സോഷ്യൽ മീഡിയയിൽ ശ്രദ്ധനേടുന്നത്. ജീവിതത്തിലെ ഉയർച്ച താഴ്ചകളിൽ തനിക്ക് തണലായ പ്രപഞ്ചനാഥന് നന്ദി പറഞ്ഞുകൊണ്ടാണ് ഭാമയുടെ കുറിപ്പ് ആരംഭിക്കുന്നത്.
‘ഓരോ ഉയർച്ച താഴ്ചകളും എന്നെ മനോഹരമായ എന്തെങ്കിലുമൊക്കെ പഠിപ്പിച്ചു… എല്ലാറ്റിലും എന്നോടൊപ്പം കൂടെ നടന്നതിന് നന്ദി, വാസുധാ നാഥാ. ഇന്ന് ഞാൻ 37-ാം വയസ്സിലേക്ക് കടക്കുമ്പോൾ, എന്റെ ഹൃദയം നന്ദിയാൽ നിറയുന്നു. എന്റെ പ്രിയപ്പെട്ട എല്ലാ സുഹൃത്തുക്കൾക്കും സുഭകാംക്ഷികൾക്കും നിങ്ങളുടെ മനോഹരമായ ജന്മദിനാശംസകൾക്കും അനന്തമായ സ്നേഹത്തിനും ഹൃദയം നിറഞ്ഞ നന്ദി,’ ഭാമ കുറിച്ചു. പ്രിയതാരത്തിന് ആശംസകൾ നേർന്ന് നിരവധി ആരാധകരും സിനിമാ രംഗത്തെ സുഹൃത്തുക്കളുമാണ് കമന്റ് ബോക്സിൽ എത്തിയിരിക്കുന്നത്.
കോട്ടയം സ്വദേശിയായ രേഖിത ആർ. കുറുപ്പ് എന്ന പെൺകുട്ടി വെള്ളിത്തിരയിലെത്തിയപ്പോഴാണ് 'ഭാമ' എന്ന പേര് സ്വീകരിക്കുന്നത്. പ്രശസ്ത സംവിധായകൻ ലോഹിതദാസ് 2007-ൽ ഒരുക്കിയ 'നിവേദ്യം' എന്ന ചിത്രത്തിലൂടെയായിരുന്നു ഭാമയുടെ സിനിമാ അരങ്ങേറ്റം. ചിത്രത്തിലെ 'സത്യഭാമ' എന്ന നാട്ടിൻപുറത്തുകാരി പെൺകുട്ടി മലയാളി പ്രേക്ഷകരുടെ മനസ്സിൽ പെട്ടെന്ന് ഇടംനേടി.
തുടർന്ന് തനതായ അഭിനയശൈലി കൊണ്ട് മലയാള സിനിമയിലെ മുൻനിര നായികമാരുടെ പട്ടികയിലേക്ക് ഭാമ ഉയർന്നു. സൈക്കിൾ, ഇവർ വിവാഹിതരായാൽ, ജനകൻ, സെവൻസ്, ഹസ്ബൻഡ്സ് ഇൻ ഗോവ തുടങ്ങി നിരവധി ഹിറ്റ് ചിത്രങ്ങളിൽ താരം പ്രധാന വേഷങ്ങളിലെത്തി. മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളിലും ഭാമ തന്റെ സാന്നിധ്യമറിയിച്ചു. പ്രത്യേകിച്ച് കന്നഡ സിനിമാ ലോകത്ത് വലിയ ജനപ്രീതിയാണ് താരം നേടിയത്. 2017-ൽ പുറത്തിറങ്ങിയ കന്നഡ ചിത്രം 'രാഗ' ഏറെ ശ്രദ്ധിക്കപ്പെട്ടിരുന്നു.
വിജയകരമായ ബിസിനസ്സ് സംരംഭക കൂടിയാണ് താരം. സോഷ്യൽ മീഡിയയിൽ ഏറെ സജീവമായ ഭാമ, തന്റെ വിശേഷങ്ങളെല്ലാം ആരാധകരുമായി പങ്കുവെക്കാറുണ്ട്. ഏറെ നാളത്തെ ഇടവേളയ്ക്ക് ശേഷം തീയേറ്ററുകളിലെത്തിയ ഹൊറർ-ത്രില്ലർ ചിത്രം 'സുമതി വളവ്' എന്ന സിനിമയിലൂടെ ഭാമ വീണ്ടും വെള്ളിത്തിരയിൽ പ്രധാന വേഷത്തിലെത്തിയിരുന്നു.
