ഉറപ്പിച്ച വിവാഹത്തില്‍ നിന്നും പിന്മാറി ; പോലീസുകാരന്റെ പോര്‍ച്ചിലിരുന്ന ബൈക്ക് കത്തിച്ചു ; എന്‍ട്രന്‍സ് കോച്ചിംഗിന് പഠിക്കുന്ന യുവതികള്‍ പിടിയില്‍

കൊല്ലം: പോലീസുകാരന്റെ വീട്ടിന് മുന്നിലിരിക്കുന്ന ബൈക്ക് കത്തിച്ച സംഭവത്തില്‍ എന്‍ട്രന്‍സ് കോച്ചിംഗിന് പഠിക്കുന്ന രണ്ടുയുവതികള്‍ പിടിയില്‍. ശൂരനാട് സ്വദേശി ആരതിയും കൂട്ടുകാരിയും ഇടുക്കി സ്വദേശിയുമായ ഗായത്രിയുമാണ് പോലീസിന്റെ പിടിയിലായത്. ഇതില്‍ ആരതിയെ പിന്നീട് വിഷം കഴിച്ച നിലയില്‍ പാരിപ്പള്ളി മെഡിക്കല്‍ കോളേജില്‍ പ്രവേശിപ്പിച്ചു. ഗായത്രി പോലീസ് പിടിയിലാണ്.

സിസിടിവി കേന്ദ്രീകരിച്ച് നടത്തിയ പരിശോധനയിലാണ് യുവതികള്‍ പിടിയിലായത്. ബൈക്കിന്റെ ഉടമയായ അഞ്ചല്‍ സ്വദേശി പോലീസുകാരന്‍ വിവേകുമായുള്ള വ്യക്തിപരമായ പ്രശ്‌നമാണ് പിന്നിലെന്നാണ് പ്രാഥമിക നിഗമനം. ആരതിയെയും ഗായത്രിയെയും ചോദ്യം ചെയ്തു വരികയാണ്. പോലീസുകാരനെതിരേയും അന്വേഷണം നടക്കാനുള്ള നീക്കമുണ്ട്. നേരത്തേ ആരതിയും പോലീസുകാരനും തമ്മില്‍ വിവാഹലോചന നടക്കുകയും ഉറപ്പിച്ച ശേഷം വിവാഹം മാറിപ്പോകുകയുമായിരുന്നു. ഇതിന്റെ വൈരാഗ്യമാണ് എന്നാണ് സംശയിക്കുന്നത്.

ശനിയാഴ്ചയാണ് പോലീസുകാരന്റെ ബൈക്ക് കത്തുന്ന നിലയില്‍ വീട്ടുകാര്‍ കണ്ടെത്തിയത്. തീയും പുകയും കണ്ട് ഓടി വന്നു നോക്കുമ്പോള്‍ പോര്‍ച്ചില്‍ ഇരിക്കുന്ന ബൈക്ക് കത്തുന്നതാണ് കണ്ടത്. ഇറങ്ങി വന്ന് നോക്കിയിട്ട് ആരെയും കണ്ടതുമില്ല. സമീപത്ത് ഒരു ഭീഷണികത്തും കിടന്നിരുന്നു. മുമ്പ് പുനലൂരിലെ ഒരു കോളേജില്‍ നടന്ന പോലീസ് ആക്രമണത്തില്‍ പെട്ട വിദ്യാര്‍ത്ഥികളാണ് എന്ന് സൂചിപ്പിക്കുന്നതായിരുന്നു കത്ത്. എന്നാല്‍ പിന്നീട് കത്തും സമീപത്തെ സിസിടിവി ദൃശ്യങ്ങളും കേന്ദ്രീകരിച്ചുള്ള അന്വേഷണത്തില്‍ കത്ത് അന്വേഷണം വഴിതിരിച്ചു വിടുന്നതിനുള്ള ശ്രമമായിരുന്നെന്ന് പോലീസ് കണ്ടെത്തി. പ്രതികള്‍ പരിസരത്ത് കൂടി നടന്നു വരുന്നതിന്റെ ദൃശ്യങ്ങളും കിട്ടിയതോടെയാണ് ഇരുവരിലേക്ക് അന്വേഷണം നീണ്ടത്. ഒരാള്‍ ശൂരനാട് സ്വദേശിയും മറ്റേയാള്‍ ഇടുക്കി സ്വദേശിനിയുമാണെന്ന് തിരിച്ചറിഞ്ഞു.

ഇരുവരും തിരുവനന്തപുരത്ത് എന്‍ട്രന്‍സ് കോച്ചിംഗിന് പഠിക്കുന്നവരാണെന്നും ഒരാളുടെ വിവാഹം നേരത്തേ ഉറപ്പിച്ച് മാറിപ്പോയതായും പോലീസിന് വിവരം കിട്ടി. ഇതിന്റെ വൈരാഗ്യമാണോ എന്നത് ഉള്‍പ്പെടെയുള്ള കാര്യങ്ങള്‍ ചോദ്യം ചെയ്യലില്‍ നിന്നും അറിയാനാകും. ഇവര്‍ക്ക് പുറമേ പോലീസുകാരനെതിരേയും അന്വേഷണം നടത്തം. പോലീസ് പെണ്‍കുട്ടികളെ ചോദ്യം ചെയ്യുന്നതിനിടയില്‍ ആരതി വിഷം കഴിച്ചതായി കണ്ടെത്തിയതിനെ തുടര്‍ന്ന് പാരിപ്പള്ളി മെഡിക്കല്‍ കോളേജില്‍ പ്രവേശിപ്പിച്ചിരിക്കുകയാണ്. ഗായത്രിയെ ചോദ്യം ചെയ്തുവരികയുമാണ്.