കൊച്ചി: താരസംഘടനയായ 'അമ്മ'യിലെ തമ്മില് തല്ലിന്റെ മൂലകാരണം പുറത്ത്. അമ്മയുടെ കുടുംബമേളയ്ക്കു ദല്ലാള് നന്ദകുമാര് പ്രസിഡന്റായ ക്ഷേത്രം 75 ലക്ഷം രൂപയുടെ സ്പോണ്സര്ഷിപ്പ് നല്കിയെന്ന് ആരോപണം. വിവാദമായ കരാര് വിവരം ഇന്നലെ പുറത്തുവന്നു.
കുടുംബസംഗമത്തിന്റെ ടൈറ്റില് സ്പോണ്സര്ഷിപ്പ് 75 ലക്ഷം രൂപയ്ക്ക് വെണ്ണല തൈക്കാട്ട് മഹാദേവ ക്ഷേത്രമാണ് ഏറ്റെടുത്തത്. ക്ഷേത്രം പ്രസിഡന്റ് ദല്ലാള് നന്ദകുമാര് ആണ്. 'അമ്മ' ജനറല് സെക്രട്ടറി കുക്കു പരമേശ്വരനും നന്ദകുമാറും ചേര്ന്നാണ് കരാര് ഉണ്ടാക്കിയതെന്നാണ് ആരോപണം. സംഘടനയെ ക്ഷേത്രവുമായി ബന്ധിപ്പിക്കാന് പ്രസിഡന്റ് ശ്വേതാ മേനോന് മുന്കൈ എടുത്തു.
ഈ കരാറിനെ അന്സിബ ഹസന് എതിര്ത്തിരുന്നു. മതേതര മൂല്യം ഉയര്ത്തിപ്പിടിക്കണമെന്നായിരുന്നു അന്സിബയുടെ വാദം. ഇതിനെച്ചൊല്ലിയാണ് അമ്മയില് വിവാദമുയര്ന്നത്. അന്സിബയുടെ എതിര്പ്പ് ശ്വേത മേനോന് തള്ളിക്കളഞ്ഞിരുന്നു. കഴിഞ്ഞ ഫെബ്രുവരി 14 നായിരുന്നു കുടുംബമേള. ക്ഷേത്രം 30 ലക്ഷം മുന്കൂര് നല്കുകയും ചെയ്തിരുന്നു. ഇനി 45 ലക്ഷം ബാക്കി നല്കാനുണ്ട്.
ഇതിനിടെ ടൈറ്റില് സ്പോണ്സര്ക്ക് മതിയായ പ്രാധാന്യം കിട്ടിയില്ലെന്നു കാട്ടി ക്ഷേത്രം ഭാരവാഹികള് പരാതിയുമായി 'അമ്മ'യെ സമീപിച്ചിരുന്നു. ബാക്കി തുക നല്കുമെന്നു തന്നെയാണ് ക്ഷേത്രം ഭാരവാഹികള് പറയുന്നത്.
ടൈറ്റില് സ്പോണ്സര് ആക്കാതെ സംഭാവന വാങ്ങിയാല് മതിയെന്നായിരുന്നു അന്സിബ വാദിച്ചത്്. ടൈറ്റില് സ്പോണ്സര് ആക്കിയാല് മറ്റു പലര്ക്കും അതിഷ്ടപ്പെടുകയില്ലെന്നും അന്സിബ അമ്മ യോഗത്തില് പറഞ്ഞിരുന്നു. എന്നാല്, ഈ വാദം പലര്ക്കും ഇഷ്ടമായില്ല. അന്സിബയെ അനുകൂലിക്കുന്നവര് ഒരുവശത്തും എതിര്ക്കുന്നവര് മറുപക്ഷത്തുമായി തര്ക്കം രൂക്ഷമായി.
