മുംബൈ: അയര്ലണ്ടിനും ഇംഗ്ളണ്ടിനും ഏഷ്യാകപ്പിനും എതിരേയുള്ള ടി20 ടീമിനെ പ്രഖ്യാപിച്ചു. ഐപിഎല്ലിലെ വണ്ടര്കിഡ് 15 വയസ്സുകാരന് വൈഭവ് സൂര്യവംശി ആദ്യമായി ദേശീയടീമില് അരങ്ങേറുമ്പോള് സൂര്യകുമാര് യാദവിനെ മാറ്റി ശ്രേയസ് അയ്യരെ ക്യാപ്റ്റന്സ്ഥാനത്ത് നിയോഗിച്ചു. അയര്ലന്റ്, ഇംഗ്ളണ്ട് പര്യടനങ്ങള്ക്കും ഏഷ്യന്ഗെയിംസിനുമുള്ള ടീമിനെയാണ് സെലക്ഷന് കമ്മിറ്റി ചെയര്മാന് അജിത് അഗാര്ക്കറുടെ സാന്നിധ്യത്തില് ബിസിസിഐ സെക്രട്ടറി ദേവാജിത് സൈകിയ പ്രഖ്യാപിച്ചത്.
ലോകകപ്പില് ഇന്ത്യയ്ക്കായി മിന്നുംപോരാട്ടം പുറത്തെടുത്ത സഞ്ജുസാംസണ് എല്ലാ ടീമിലുമുണ്ട്. ഈ മാസം അവസാനവും ജൂലൈയിലുമായിട്ടാണ് ഇന്ത്യയുടെ അയര്ലന്ഡ്, ഇംഗ്ലണ്ട് പര്യടനങ്ങള്. പിന്നാലെ സെപ്റ്റംബറില് ഏഷ്യന് ഗെയിംസും നടക്കും.
ഐസിസി കിരീടം നേടിയിട്ടും ഒരു ഇന്ത്യന് ക്യാപ്റ്റനെ ചുമതലയില് നിന്ന് മാറ്റുന്നത് ഒരു വര്ഷത്തിനിടെ ഇത് രണ്ടാം തവണയാണ്. കഴിഞ്ഞ വര്ഷത്തെ ചാമ്പ്യന്സ് ട്രോഫി വിജയത്തിന് ശേഷം രോഹിത് ശര്മ്മയ്ക്ക് പകരം ശുഭ്മന് ഗില്ലിനെ ഇന്ത്യ ക്യാപ്റ്റനാക്കിയിരുന്നു. ഇതിന് പിന്നാലെയാണ് ക്യാപ്റ്റനായി ടി20 ലോകകപ്പ് ഉയര്ത്തിയ 35-കാരനായ സൂര്യകുമാറിനെ ഇന്ത്യന് ടീമില് നിന്ന് പൂര്ണ്ണമായി ഒഴിവാക്കിയത്.
വൈഭവ് സൂര്യവംശിക്ക് ഇന്ത്യന് ടീമിലേക്ക് വിളി ലഭിച്ചതോടെ ദേശീയ ടീമിലേക്ക് തിരഞ്ഞെടുക്കപ്പെടുന്ന ഏറ്റവും പ്രായം കുറഞ്ഞ ഇന്ത്യന് താരമെന്ന റെക്കോര്ഡ് സൂര്യവംശി സ്വന്തമാക്കി. ഇതിഹാസ താരം സച്ചിന് ടെണ്ടുല്ക്കര് 36 വര്ഷമായി കൈവശം വച്ചിരുന്ന റെക്കോര്ഡാണ് തകര്ന്നത്. 1989-ല് അന്താരാഷ്ട്ര അരങ്ങേറ്റം കുറിക്കുമ്പോള് സച്ചിന് 16 വയസ്സും 205 ദിവസവുമായിരുന്നു പ്രായം. എന്നാല് 15-ാം വയസ്സില് തന്നെ സൂര്യവംശി ആ റെക്കോര്ഡ് മറികടക്കാന് ഒരുങ്ങുകയാണ്.
ഐപിഎല് 2026-ല് 776 റണ്സ് അടിച്ചുകൂട്ടിയ ഈ ഇടംകൈയ്യന് യുവ ബാറ്റിംഗ് വിസ്മയം, ടൂര്ണമെന്റിലെ ഉയര്ന്ന റണ്വേട്ടക്കാരനാവുകയും ഓറഞ്ച് ക്യാപ് നേടുന്ന ഏറ്റവും പ്രായം കുറഞ്ഞ താരമാവുകയും ചെയ്തു. ഒരു ഐപിഎല് സീസണില് ഏറ്റവും കൂടുതല് സിക്സറുകള് നേടുന്ന ക്രിസ് ഗെയ്ലിന്റെ ദീര്ഘകാലത്തെ റെക്കോര്ഡും സൂര്യവംശി തകര്ത്തു. ഇന്ത്യ എ ടീമിനായി ശ്രീലങ്ക എ, അഫ്ഗാനിസ്ഥാന് എ ടീമുകള്ക്കെതിരെ കളിക്കാന് ഇരിക്കുന്ന താരം, ഇതേ മികച്ച ഫോം സീനിയര് ടീമിലും തുടരുമെന്നാണ് പ്രതീക്ഷിക്കുന്നത്. മലയാളിതാരം സഞ്ജുസാംസണെയും എല്ലാ ടീമിലും ഉള്പ്പെടുത്തിയിട്ടുണ്ട്. ലോകകപ്പിലും ഐപിഎല്ലില് ചെന്നൈ സൂപ്പര്കിംഗ്സിനുവേണ്ടിയും തകര്പ്പന് ബാറ്റിംഗ് സഞ്ജുവും നടത്തിയിരുന്നു.
കഴിഞ്ഞ വര്ഷം മുതല് മോശം ഫോമില് തുടരുന്ന സൂര്യകുമാര് യാദവ് ടീമിന് പുറത്തായി. ഐപിഎല്ലില് മുംബൈ ഇന്ത്യന്സിന് വേണ്ടിയുള്ള മോശം പ്രകടനം തിരിച്ചടിയായി. 2025-ല് ഇന്ത്യക്കായി ഒരൊറ്റ അര്ധസെഞ്ചുറി പോലും നേടാന് അദ്ദേഹത്തിന് കഴിഞ്ഞിരുന്നില്ല. മറുഭാഗത്ത്, ഐപിഎല് 2025-ല് 600-ലധികം റണ്സും ഐപിഎല് 2026-ല് അഞ്ഞൂറോളം റണ്സും നേടി ശ്രേയസ് അയ്യര് മികച്ച ഫോമിലാണ്. 2024-ല് കൊല്ക്കത്ത നൈറ്റ് റൈഡേഴ്സിനെ കിരീടത്തിലേക്കും തൊട്ടടുത്ത വര്ഷം പഞ്ചാബ് കിംഗ്സിനെ ഫൈനലിലേക്കും അദ്ദേഹം നയിച്ചു. ഇന്ത്യന് ടി20 നിരയില് നാലാം നമ്പരില് സൂര്യകുമാറിന് പകരക്കാരനായി ശ്രേയസ് എത്തുമെന്നാണ് കരുതുന്നത്.
അയര്ലന്ഡിനെതിരെയുള്ള രണ്ട് ടി20 മത്സരങ്ങള്ക്കുള്ള ഇന്ത്യന് ടീം:
ശ്രേയസ് അയ്യര് (ക്യാപ്റ്റന്), തിലക് വര്മ്മ (വൈസ് ക്യാപ്റ്റന്), രവി ബിഷ്ണോയ്, അഭിഷേക് ശര്മ്മ, നിതീഷ് കുമാര് റെഡ്ഡി, വൈഭവ് സൂര്യവംശി, മുഹമ്മദ് സിറാജ്, സഞ്ജു സാംസണ്, അക്സര് പട്ടേല്, ഹര്ഷിത് റാണ, ഇഷാന് കിഷന്, അര്ഷ്ദീപ് സിംഗ്, വാഷിംഗ്ടണ് സുന്ദര്, ശിവം ദുബെ, വരുണ് ചക്രവര്ത്തി, പ്രിന്സ് യാദവ്.
ഇംഗ്ലണ്ടിനെതിരെയുള്ള അഞ്ച് ടി20 മത്സരങ്ങള്ക്കുള്ള ഇന്ത്യന് ടീം:
ശ്രേയസ് അയ്യര് (ക്യാപ്റ്റന്), തിലക് വര്മ്മ (വൈസ് ക്യാപ്റ്റന്), രവി ബിഷ്ണോയ്, അഭിഷേക് ശര്മ്മ, നിതീഷ് കുമാര് റെഡ്ഡി, വൈഭവ് സൂര്യവംശി, മുഹമ്മദ് സിറാജ്, സഞ്ജു സാംസണ്, അക്സര് പട്ടേല്, ഹര്ഷിത് റാണ, ഇഷാന് കിഷന്, അര്ഷ്ദീപ് സിംഗ്, വാഷിംഗ്ടണ് സുന്ദര്, ശിവം ദുബെ, വരുണ് ചക്രവര്ത്തി, പ്രിന്സ് യാദവ്.
ഏഷ്യന് ഗെയിംസിനുള്ള ഇന്ത്യന് ടീം:
ശ്രേയസ് അയ്യര് (ക്യാപ്റ്റന്), തിലക് വര്മ്മ (വൈസ് ക്യാപ്റ്റന്), രവി ബിഷ്ണോയ്, അഭിഷേക് ശര്മ്മ, നിതീഷ് കുമാര് റെഡ്ഡി, ജസ്പ്രീത് ബുംറ, വൈഭവ് സൂര്യവംശി, സഞ്ജു സാംസണ്, അക്സര് പട്ടേല്, ഹര്ഷിത് റാണ, ഇഷാന് കിഷന്, അര്ഷ്ദീപ് സിംഗ്, വാഷിംഗ്ടണ് സുന്ദര്, ശിവം ദുബെ, വരുണ് ചക്രവര്ത്തി.
