കഴിഞ്ഞ ദിവസമായിരുന്നു നടി ഹിന ഖാന്റെയും ഭർത്താവ് റോക്കി ജയ്സ്വാളിന്റെയും ഒന്നാം വിവാഹവാർഷികം. എന്നാൽ തീയതികൾ ഓർത്തുവെക്കുന്നതിൽ തങ്ങൾ രണ്ടുപേരും വളരെ പിന്നിലാണെന്നും, കുടുംബാംഗങ്ങളും സുഹൃത്തുക്കളും ഓർമ്മിപ്പിച്ചപ്പോഴാണ് വിവാഹവാർഷികത്തെക്കുറിച്ച് അറിഞ്ഞതെന്നും വെളിപ്പെടുത്തിയിരിക്കുകയാണ് താരം. സോഷ്യൽ മീഡിയയിൽ പങ്കുവെച്ച കുറിപ്പിലൂടെയാണ് ഹിന ഇക്കാര്യം വ്യക്തമാക്കിയത്. തീയതികൾക്കല്ല, നിമിഷങ്ങൾക്കാണ് പ്രാധാന്യമെന്നും താരം കൂട്ടിച്ചേര്ത്തു.
"ഇതൊരു പ്രത്യേക ദിവസമാണെന്ന് എല്ലാവരും പറയുന്നു, എന്നാൽ ഞങ്ങൾക്ക് ഓരോ ദിവസവും ഒരുപോലെ സവിശേഷമാണെന്ന് ഞാൻ കരുതുന്നു. തീയതികൾക്കല്ല, നിമിഷങ്ങൾക്കാണ് പ്രാധാന്യം. ഞങ്ങളുടെ ജന്മദിനങ്ങൾ ഒഴികെ ബാക്കിയൊന്നും ഞങ്ങൾ ഓർക്കാറില്ല. അത് എപ്പോഴും അങ്ങനെത്തന്നെയായിരുന്നു. ഇത് ഞങ്ങളുടെ ഒന്നാം വാർഷികം ആണെന്ന് ഓർമ്മിപ്പിച്ചതിന് ഞങ്ങളുടെ കുടുംബാംഗങ്ങൾക്കും ശുഭകാംക്ഷികൾക്കും നന്ദി," എന്നാണ് ആഘോഷങ്ങളുടെ ചിത്രങ്ങളും പൂച്ചെണ്ടുകളും പങ്കുവെച്ചുകൊണ്ട് ഹിന ഖാൻ കുറിച്ചത്.
നീണ്ടനാളത്തെ പ്രണയത്തിനൊടുവിൽ കഴിഞ്ഞ വർഷം ജൂൺ നാലിനായിരുന്നു ഹിന ഖാനും റോക്കി ജയ്സ്വാളും വിവാഹിതരായത്. സ്വകാര്യമായി നടന്ന ചടങ്ങിൽ അടുത്ത സുഹൃത്തുക്കളും ബന്ധുക്കളും മാത്രമാണ് പങ്കെടുത്തത്.
'യേ റിഷ്താ ക്യാ കെഹ്ലാത്ത ഹേ' എന്ന സീരിയലിന്റെ സെറ്റിൽ വെച്ചാണ് ഹിനയും റോക്കിയും ആദ്യമായി കണ്ടുമുട്ടുന്നത്. ഹിന അഭിനയിച്ച ഈ സീരിയലിലെ സൂപ്പർവൈസിങ് പ്രൊഡ്യൂസറായിരുന്നു റോക്കി. ഇരുവരും അടുത്ത സുഹൃത്തുക്കളാവുകയും പിന്നീട് പ്രണയത്തിലാവുകയുമായിരുന്നു.
