തിരുവനന്തപുരം: ഈശ്വരവിശ്വാസവും ആത്മീയതയും അജണ്ഡയിലേ ഇല്ലാത്ത സിപിഐഎം അയ്യപ്പസംഗമം നടത്തിയത് തിരിച്ചടിയായെന്ന് സിപിഐഎം സംസ്ഥാനസമിതി. സ്വര്ണ്ണക്കൊളളക്കേസില് വിവാദത്തില് തലയിട്ടിട്ടും പ്രതിയായ എ.പത്മകുമാറിനെതിരെ നടപടി എടുക്കാത്തത് തെറ്റായെന്നും വിമര്ശനം. ഇക്കാര്യത്തില് സംസ്ഥാന സെക്രട്ടേറിയേറ്റ് നേരത്തേ എടുത്ത നിലപാട് തിരുത്തിയാണ് സംസ്ഥാന സമിതി രംഗത്ത് വന്നത്.
അയപ്പ സംഗമം പാര്ട്ടിയെ വലിയ രീതിയില് തെറ്റിദ്ധരിക്കാന് ഇടയാക്കിയെന്നും ഇത്തരമൊരു പരിപാടി ഇടത് സര്ക്കാരിന്റെ കാലത്ത് നടത്തരുതായിരുന്നു. അയ്യപ്പസംഗമം എന്ന പേര് തന്നെ പിഴവായിരുന്നെന്നും വികസനമായിരുന്നു പരിപാടിയിലൂടെ ലക്ഷ്യമിട്ടതെങ്കില് മറ്റൊരു പേര് നോക്കാമായിരുന്നു എന്നും പറഞ്ഞു.
ജനവിഭാഗങ്ങളിലേക്ക് കടന്നുചെല്ലാന് സമുദായ നേതാക്കളെ ആശ്രയിക്കുന്നത് അവസാനിപ്പിക്കണമെന്നും നേതാക്കള് ആവശ്യപ്പെട്ടു. ആഗോള അയ്യസംഗമത്തിനെതിരെ എതിര്പ്പ് വന്നു എന്ന ഒറ്റവരിയും ബാക്കി പരിപാടിയുടെ വിവരങ്ങളുമാണ് കരട് റിപ്പോര്ട്ടില് ഉണ്ടായിരുന്നത്. വിമര്ശനം ഒറ്റവരി പോരായെന്ന് സംസ്ഥാന സമിതി അംഗങ്ങള് ചൂണ്ടിക്കാട്ടുകയായിരുന്നു.
