തൃശ്ശൂര്: ജില്ലയിലെ വിവിധ പ്രദേശങ്ങളില് ആഞ്ഞടിച്ച ശക്തമായ മിന്നല്ച്ചുഴലിയില് സ്കൂള്മുറ്റത്തേക്ക് വന് മരങ്ങള് കടപുഴകി വീണു. നട്ടത്തറ പൂച്ചട്ടി ഭാരതീയ വിദ്യാഭവനിലാണ് മിന്നല് പ്രളയസമാനമായ കാറ്റ് വീശിയടിച്ചത്. ഇവിടെ നിര്ത്തിയിട്ടിരുന്ന ഒമിനി വാന് ഉള്പ്പെടെ നാല് വാഹനങ്ങള് തകര്ന്നു.
പൂച്ചട്ടി ഭാരതീയ വിദ്യാഭവന് സ്കൂള് അങ്കണത്തിലേക്ക് അഞ്ചോളം കൂറ്റന് തേക്ക് മരങ്ങളാണ് കടപുഴകി വീണത്. എല്.കെ.ജി ക്ലാസുകള് പ്രവര്ത്തിക്കുന്ന കെട്ടിടത്തിന്റെ മുകളില് മേഞ്ഞിരുന്ന ഷീറ്റുകളും തൂണുകളും കാറ്റില് തകര്ന്നു വീണിട്ടുണ്ട്. കുട്ടികള് സ്കൂളിലെത്തി കൃത്യസമയത്ത് ക്ലാസുകളില് പ്രവേശിച്ചതിനാല് വന് ദുരന്തം ഒഴിവാകുകയായിരുന്നെന്നാണ് സ്കൂള് അധികൃതര് വ്യക്തമാക്കിയത്.
ജില്ലയിലെ വിവിധ പ്രദേശങ്ങളില് ആഞ്ഞടിച്ച ശക്തമായ മിന്നല്ച്ചുഴലിയില് വ്യാപക നാശനഷ്ടം. വില്ലടം, ചേറൂര്, നട്ടത്തറ തുടങ്ങിയ മേഖലകളിലാണ് ചൊവ്വാഴ്ച രാവിലെ ഒമ്പത് മണിയോടെ കനത്ത കാറ്റ് വീശിയടിച്ചത്. നിരവധിയിടങ്ങളില് വന്മരങ്ങള് വേരോടെ പിഴുതുവീണു. വില്ലടം മില്മയുടെ മുന്വശത്തും വില്ലേജ് ഓഫീസിന് സമീപവും മരങ്ങള്വീണത് മണിക്കൂറുകളോളം ഗതാഗതതടസ്സത്തിന് കാരണമായി.
സ്കൂള് ബസ്സുകള് ഉള്പ്പെടെയുള്ള വാഹനങ്ങള് റോഡിലൂടെ കടന്നുപോകുന്ന സമയത്തായിരുന്നു അപകടം. ഭാഗ്യം കൊണ്ടാണ് വന് ദുരന്തം ഒഴിവായത്. വില്ലടത്തിലുണ്ടായ മരംവീഴ്ചയില് രണ്ട് വാഹനങ്ങള്ക്ക് കേടുപാടുകള് സംഭവിച്ചു. തുടര്ന്ന് അധികൃതരും നാട്ടുകാരും ചേര്ന്ന് യുദ്ധകാലാടിസ്ഥാനത്തില് മരങ്ങള് മുറിച്ചുമാറ്റിയാണ് ഗതാഗതം പുനഃസ്ഥാപിച്ചത്.
