ആദിത്യ ധര് -രണ്വീര് സിങ് ടീമിന്റെ ധുരന്ധര്, ആദിത്യ സുഹാസ് ജാംഭലെ സംവിധാനം ചെയ്ത ഹൊറര് ചിത്രം ബാരമുളള എന്നീ ബോളിവുഡ് ചിത്രങ്ങളെ അഭിനന്ദിച്ച് നടനും ആന്ധ്രാപ്രദേശ് ഉപമുഖ്യമന്ത്രിയുമായ പവന് കല്യാണ്. വാര്ത്താ ഏജന്സിയായ എഎന്ഐയോട് സംസാരിക്കുകയായിരുന്നു അദ്ദേഹം.
ധുരന്ധര് എന്ന ചിത്രത്തിന്റെ ബോള്ഡായ കഥപറച്ചിലിനെയും നിര്മാതാക്കളുടെ ധീരമായ ശ്രമത്തെയും പവന് കല്യാണ് അഭിനന്ദിച്ചു. ധുരന്ധര് വളരെയധികം ഇഷ്ടമായി. സമയം ലഭിക്കാത്തതുകൊണ്ട് രണ്ടാം ഭാഗം തിയറ്ററില് പോയി കാണാന് സാധിച്ചില്ലെന്നും അദ്ദേഹം പറഞ്ഞു.
ഹിന്ദി, തെലുങ്ക് സിനിമകള് തമ്മിലുളള താരതമ്യത്തെക്കുറിച്ചും പവന് കല്യാണ് സംസാരിച്ചു. ഒരു സിനിമയെ പ്രാദേശിക കണ്ണാടിയിലൂടെ കാണുന്നത് തനിക്ക് ഇഷ്ടമല്ലെന്ന് അദ്ദേഹം പറഞ്ഞു. ഒരു സിനിമ ഏത് ഭാഷയില് നിര്മിക്കപ്പെടുന്നു എന്നതിലുപരി, ശക്തമായ കഥപറിച്ചിലിനെ അഭിനന്ദിക്കേണ്ടതാണെന്നും അദ്ദേഹം കൂട്ടിച്ചേര്ത്തു.
2025 ലെ സൂപ്പര് നാച്ചുറല് ഹൊറര് ത്രില്ലറായ ബാരമുളള എന്ന സിനിമയോടുളള തന്റെ ഇഷ്ടത്തെക്കുറിച്ചും നടന് വ്യക്തമാക്കി. എനിക്ക് ഹൊറര് സിനിമകള് ഇഷ്ടമാണ്, കാരണം അവ എന്നെ ആകര്ഷിക്കുന്നു. അവ നമ്മെ ചിന്തിക്കാന് അനുവദിക്കുന്നില്ല. അവ നമ്മുടെ മനസ്സിനെ കീഴ്പ്പെടുത്തുന്നു. അല്ലെങ്കില് നമ്മുടെ മനസ്സ് പാടെ മാറും. എനിക്ക് ഉറക്കം വരാതിരിക്കുമ്പോള് ഞാന് ഒരു ഹൊറര് സിനിമ കാണും, പെട്ടെന്ന് എന്റെ മനസ്സ് ശാന്തമാകും -പവന് കല്യാണ് പറഞ്ഞു.
'ബാരാമുള്ള'യെക്കുറിച്ച് കൂടുതല് സംസാരിക്കവെ, 1980-കളുടെ അവസാനത്തില് കശ്മീരിലെ ശ്രീനഗറിലേക്കുള്ള തന്റെ സന്ദര്ശനങ്ങളെക്കുറിച്ച് ചിത്രം തന്നെ ഓര്മിപ്പിച്ചതായി പവന് കല്യാണ് പറഞ്ഞു. കശ്മീരി പണ്ഡിറ്റുകളുടെ അനുഭവങ്ങളെക്കുറിച്ച് ഈ ചിത്രം വ്യത്യസ്തമായൊരു കാഴ്ചപ്പാട് നല്കുന്നുവെന്നും അദ്ദേഹം അഭിപ്രായപ്പെട്ടു.
