വിഖ്യാത സംവിധായകൻ ഭാരതിരാജയുടെ വിയോഗത്തിൽ അഗാധമായ ദുഃഖം രേഖപ്പെടുത്തി നടി രാധ. തനിക്കൊരു ഗുരു എന്നതിനപ്പുറം പുതിയൊരു ജീവിതം നൽകിയ വ്യക്തിയാണ് വിടപറഞ്ഞിരിക്കുന്നത് എന്ന് രാധ ഓർക്കുന്നു.
"ഇന്ന് എനിക്ക് നഷ്ടമായത് എന്റെ ഗുരുവിനെ മാത്രമല്ല, എനിക്ക് ഒരു പുതിയ ജീവിതം തന്ന മനുഷ്യനെ കൂടിയാണ്. അദ്ദേഹം കോണ്ടുവന്നതാണ് എന്നെ ഈ ഇൻഡസ്ട്രിയിലേക്ക്. ചന്ദ്രികയിൽ നിന്ന് 'രാധ'യ്ക്ക് ജന്മം നൽകിയതും അദ്ദേഹമാണ്. ഇന്ന് എനിക്കുള്ള എല്ലാ പ്രശസ്തിയും ആത്മവിശ്വാസവും വിജയവും അദ്ദേഹത്തിന്റെ സമ്മാനമാണ്. അദ്ദേഹം ഇനി നമ്മളോടൊപ്പം ശാരീരികമായി ഇല്ലെന്ന കാര്യം ഉൾക്കൊള്ളാൻ എന്റെ മനസ്സിന് കഴിയുന്നില്ല. എന്നാൽ അദ്ദേഹത്തിന്റെ അനുഗ്രഹങ്ങളും ആത്മാവും എപ്പോഴും എന്നെ നയിക്കുമെന്ന് എനിക്കറിയാം. എന്നും കൃതജ്ഞതയുള്ളവളായിരിക്കും... എന്നെന്നും അങ്ങയുടെ ശിഷ്യയായി..." രാധ കുറിച്ചു.
ഭാരതിരാജ സംവിധാനം ചെയ്ത 'അലൈകൾ ഓയ്വതില്ലൈ' (1981) എന്ന ചിത്രത്തിലൂടെയായിരുന്നു രാധയുടെ സിനിമാ അരങ്ങേറ്റം. ആദ്യ ചിത്രത്തിലൂടെ തന്നെ മികച്ച പുതുമുഖ നടിക്കുള്ള പുരസ്കാരവും രാധയെ തേടിയെത്തി. തൊട്ടുപിന്നാലെ കമൽ ഹാസൻ നായകനായ ഭാരതിരാജ ചിത്രം 'ടിക് ടിക് ടിക്'-ലും ശ്രദ്ധേയമായ വേഷം ചെയ്യാൻ രാധയ്ക്ക് സാധിച്ചു.
