ഹൈദരാബാദ്: 37-കാരിയായ ഐടി ജീവനക്കാരി ആറുമാസം പ്രായമുള്ള പിഞ്ചുകുഞ്ഞുമായി ആറാം നിലയില് നിന്ന് താഴേക്ക് ചാടി. സംഭവത്തില് കുഞ്ഞ് അത്ഭുതകരമായി രക്ഷപ്പെട്ടു. വീഴുന്നതിനിടയില് സുരക്ഷാ വേലിയില് തട്ടിയതിനാലാണ് കുഞ്ഞ് രക്ഷപ്പെട്ടതെന്ന് പോലീസ് പറഞ്ഞു. പരിസരവാസികള് ഉടന് തന്നെ കുഞ്ഞിനെ അടുത്തുള്ള ആശുപത്രിയില് എത്തിച്ചു. കുഞ്ഞ് ഇപ്പോള് ചികിത്സയിലാണ്.
ഹൈദരാബാദിലെ മിയാപൂര് പ്രദേശത്ത് നടന്ന സംഭവത്തില് മാതാവ് മരിച്ചു. ഈഷാ സാഹു എന്നാണ് മരിച്ച സ്ത്രീയെ തിരിച്ചറിഞ്ഞിട്ടുള്ളത്. വെള്ളിയാഴ്ചയാണ് ഇവര് കുഞ്ഞുമായി കെട്ടിടത്തില് നിന്ന് ചാടിയത്. സ്ത്രീ മരണപ്പെട്ടെങ്കിലും കുഞ്ഞ് ചെറിയ പരിക്കുകളോടെ രക്ഷപ്പെട്ടു.
മധ്യപ്രദേശ് സ്വദേശിനിയായ ഈഷയ്ക്ക് ഭര്ത്താവും വിധി (8 വയസ്സ്), വാണി (6 മാസം) എന്നീ രണ്ട് പെണ്മക്കളുമുണ്ട്. കഴിഞ്ഞ കുറച്ചു മാസങ്ങളായി ഇവര് കടുത്ത ഉറക്കമില്ലായ്മ, വിഷാദം, പ്രസവാനന്തര വിഷാദരോഗം എന്നിവയാല് ബുദ്ധിമുട്ടിയിരുന്നതായി പോലീസ് വൃത്തങ്ങള് അറിയിച്ചു. സംഭവം നടക്കുമ്പോള് കുടുംബത്തിലെ മറ്റ് അംഗങ്ങള് അപ്പാര്ട്ട്മെന്റിനുള്ളില് ഉണ്ടായിരുന്നു. വെള്ളിയാഴ്ച ഉച്ചയ്ക്ക് 3:45 നാണ് സംഭവം റിപ്പോര്ട്ട് ചെയ്തത്. ദമ്പതികളുടെ വിവാഹം കഴിഞ്ഞിട്ട് 11 വര്ഷമായിരുന്നു.
താഴേക്ക് വീഴുന്നതിനിടയില് ഭാഗ്യവശാല് ഒരു സുരക്ഷാ വേലിയിലേക്ക് വീണതിനാലാണ് കുഞ്ഞ് രക്ഷപ്പെട്ടത്. കുഞ്ഞിന് ആവശ്യമായ വൈദ്യസഹായം നല്കുന്നുണ്ട്, ആരോഗ്യാവസ്ഥ തൃപ്തികരമാണ്. കേസിന്റെ എല്ലാ വശങ്ങളും പരിശോധിച്ചുവരികയാണെന്നും കുടുംബാംഗങ്ങളില് നിന്നും മെഡിക്കല് രേഖകളില് നിന്നും കൂടുതല് വിവരങ്ങള് ശേഖരിക്കാന് കാത്തിരിക്കുകയാണെന്നും പോലീസ് അറിയിച്ചു.
ഈഷയും ഭര്ത്താവും സ്വകാര്യ മേഖലയില് ജോലി ചെയ്യുന്നവരായിരുന്നു. കുടുംബത്തോടൊപ്പം അപ്പാര്ട്ട്മെന്റ് കോംപ്ലക്സിലായിരുന്നു ഇവരുടെ താമസം. ഈ സംഭവം ബന്ധുക്കളെയും അയല്ക്കാരെയും നാട്ടുകാരെയും ഒരേപോലെ ഞെട്ടിച്ചിരിക്കുകയാണ്. വിവരമറിഞ്ഞ് മിയാപൂര് പോലീസ് സ്ഥലത്തെത്തി പ്രാഥമിക അന്വേഷണം നടത്തുകയും മൃതദേഹം പോസ്റ്റ്മോര്ട്ടത്തിനായി മാറ്റുകയും ചെയ്തു.
(ആത്മഹത്യ ഒന്നിനും പരിഹാരമല്ല. കടുത്ത മാനസീക സമ്മര്ദ്ദം ഉണ്ടാകുമ്പോള് മനശ്ശാസ്ത്ര വിദഗ്ദരെ സമീപിക്കുക. )
