തിരുവനന്തപുരം: ആയുര്വേദമെന്ന പരമ്പരാഗത ഭാരതീയ വൈദ്യശാസ്ത്രത്തെ യാത്രയുമായി സംയോജിപ്പിച്ചുകൊണ്ടുള്ള ആയുര്വേദ ആരോഗ്യ വിനോദസഞ്ചാരത്തിന് കേരളത്തില് മാത്രമല്ല, രാജ്യത്താകമാനം പ്രാധാന്യമേറുന്നു. ഭാരതത്തില്, പ്രത്യേകിച്ച് പ്രകൃതിഭംഗിയാല് അനുഗൃഹീതമായ കേരളത്തില് ആയുര്വേദ ടൂറിസത്തിന് അനന്തസാധ്യതകളാണുള്ളത്. രാജ്യത്തിന് വന്തോതില് വിദേശനാണ്യം നേടിക്കൊടുക്കുന്നതില് മാത്രമല്ല, ഒട്ടേറെ സാധാരണക്കാര്ക്ക് തൊഴിലവസരങ്ങള് സൃഷ്ടിക്കപ്പെടുന്നതിനും സാധ്യതയുണ്ട്. ശാരീരികവും മാനസികവുമായ സുഖം തേടി എത്തുന്ന വിദേശ സഞ്ചാരികളുടെ എണ്ണത്തില് വലിയ വര്ദ്ധനവാണ് ഈ സീസണില് ഉണ്ടായിരിക്കുന്നത്.
മഴക്കാലമാണ് ആയുര്വേദ സുഖചികിത്സയ്ക്ക് ഏറ്റവും അനുയോജ്യമായ സമയമെന്ന് വൈദ്യശാസ്ത്രം അടിവരയിടുന്നു. കേരളത്തില് ഇത് പ്രധാനമായും ജൂണ് അല്ലെങ്കില് ജൂലൈ മാസം മുതല് സെപ്റ്റംബര് വരെയുള്ള കാലയളവാണ്. തണുത്തതും പൊടിപടലങ്ങള് ഇല്ലാത്തതുമായ അന്തരീക്ഷവും വായുവിലെ ഈര്പ്പവും മനുഷ്യശരീരത്തിലെ സൂക്ഷ്മ സുഷിരങ്ങള് തുറക്കാന് സഹായിക്കും. ഇതിലൂടെ ഔഷധ എണ്ണക്കൂട്ടുകളും കഷായങ്ങളും കൂടുതല് ഫലപ്രദമായി ശരീരത്തിലേക്ക് ആഗിരണം ചെയ്യപ്പെടുകയും കോശങ്ങളില് നേരിട്ട് ചെന്ന് പ്രവര്ത്തിക്കുകയും ചെയ്യും. പ്രകൃതി ഒരുക്കുന്ന ഈ അനുകൂല കാലാവസ്ഥയാണ് മഴക്കാല ചികിത്സയെയും യാത്രയെയും ഏറ്റവും ജനപ്രിയമാക്കുന്നത്.
മനുഷ്യശരീരത്തെ പൂര്ണ്ണമായി പുനരുജ്ജീവിപ്പിക്കുക, അടിഞ്ഞുകൂടിയ വിഷാംശങ്ങളെ പുറന്തള്ളി ശരീരം ശുദ്ധീകരിക്കുക, പരമ്പരാഗത കഷായങ്ങളിലൂടെയും തനത് ഔഷധക്കൂട്ടുകളിലൂടെയും ആയുസ്സ് വര്ദ്ധിപ്പിക്കുക എന്നിവയാണ് സുഖചികിത്സയുടെ പ്രധാന ലക്ഷ്യങ്ങള്. മനുഷ്യ മനസ്സിനെ ആകര്ഷിക്കുന്ന ശാന്തസുന്ദരമായ ബീച്ചുകള്, കായലുകള്, ഹരിതാഭമായ വനങ്ങള്, വെള്ളച്ചാട്ട പരിസരങ്ങള് എന്നിവയാണ് കേരളത്തിന്റെ പ്രധാന ആകര്ഷണം. ഒരാള്ക്ക് ഇഷ്ടപ്പെട്ട സ്ഥലം തിരഞ്ഞെടുത്ത് അവിടെ താമസിച്ച് ചികിത്സ തേടുമ്പോള് ശരീരത്തിന് മാത്രമല്ല മനസ്സിനും വലിയ ഉണര്വ് ഉണ്ടാകും.
കേരളത്തിന്റെ തനത് ആയുര്വേദ ചികിത്സാ സമ്പ്രദായം അനുസരിച്ച് മൂന്ന് മുതല് ഇരുപത്തിയൊന്ന് ദിവസം വരെയാണ് സാധാരണയായി ചികിത്സാ കാലയളവ് . സുഖചികിത്സാ കേന്ദ്രങ്ങളിലുള്ള പ്രഗത്ഭരായ ഡോക്ടര്മാര് ഓരോരുത്തരുടെയും ശാരീരിക സ്ഥിതിയും ദോഷങ്ങളും കൃത്യമായി പരിശോധിച്ച ശേഷമാണ് അനുയോജ്യമായ ചികിത്സാരീതികള് ഉപദേശിക്കുക. വിദേശികള്ക്കായി ഓരോ കേന്ദ്രങ്ങളിലും പ്രത്യേക താമസ സൗകര്യങ്ങളും ഒരുക്കിയിട്ടുണ്ട്.
ആയുര്വേദത്തിന്റെ ഈറ്റില്ലമെന്ന് വിശേഷിപ്പിക്കാവുന്ന കേരളത്തില് ഈ ആരോഗ്യ ടൂറിസത്തിന് അനുയോജ്യമായ ഒട്ടേറെ സ്ഥലങ്ങളുണ്ട്. തലസ്ഥാന ജില്ലയായ തിരുവനന്തപുരത്തെ കോവളം, വര്ക്കല, ചൊവ്വര എന്നീ തീരദേശ കേന്ദ്രങ്ങള് ആയുര്വേദ ചികിത്സയ്ക്ക് ലോകപ്രശസ്തമാണ്. ഇതിനുപുറമെ കൊച്ചി, ആലപ്പുഴ, പാലക്കാട്, തൃശൂര് എന്നീ ജില്ലകളും ഈ രംഗത്ത് മുന്പന്തിയിലാണ്. മലപ്പുറം ജില്ലയിലെ കോട്ടക്കലില് സ്ഥിതി ചെയ്യുന്ന ആര്യവൈദ്യശാലയ്ക്ക് കേരള സംസ്ഥാന രൂപീകരണത്തേക്കാള് പഴക്കമുണ്ട്. ആയുര്വേദ ടൂറിസത്തിന്റെ മാറ്റൊലി അന്താരാഷ്ട്ര തലത്തില് എത്തിക്കുന്നതില് കോട്ടയ്ക്കല് ആര്യവൈദ്യശാല വഹിച്ച പങ്ക് ചെറുതല്ല.
കേന്ദ്രത്തിലെ നരേന്ദ്ര മോദി സര്ക്കാര് ആയുര്വേദ ആരോഗ്യ വിനോദസഞ്ചാര മേഖലയ്ക്ക് വലിയ പ്രാധാന്യമാണ് നിലവില് നല്കിയിട്ടുള്ളത്. 'ഹീല് ഇന് ഇന്ത്യ' അഥവാ 'ഭാരതത്തില് സുഖപ്പെടാം' എന്ന പുതിയ പദ്ധതിയിലൂടെ രാജ്യത്തെ ഒട്ടാകെ ശാരീരിക-മാനസിക-ആത്മീയ ആരോഗ്യം വര്ദ്ധിപ്പിക്കുന്നതിനുള്ള ഒരു ആഗോള കേന്ദ്രമാക്കി മാറ്റാനാണ് കേന്ദ്രസര്ക്കാര് ലക്ഷ്യമിട്ടിട്ടുള്ളത്. വിനോദസഞ്ചാര മന്ത്രാലയവും പരമ്പരാഗത ചികിത്സാ മന്ത്രാലയമായ ആയുഷ് മന്ത്രാലയവും പരസ്പരം കൈകോര്ത്താണ് ഈ പദ്ധതി ലക്ഷ്യത്തില് എത്തിക്കുന്നത്.
ഭാരതത്തിന്റെ പരമ്പരാഗത ചികിത്സാ സമ്പ്രദായങ്ങളായ ആയുര്വേദം, യോഗ, പ്രകൃതിചികിത്സ എന്നിവ സമന്വയിപ്പിച്ച് ആഗോള ആരോഗ്യരംഗത്ത് രാജ്യത്തിന്റെ പഴയകാല പ്രതാപം വീണ്ടെടുക്കാനുള്ള ശ്രമംകൂടി ഇതിന് പിന്നിലുണ്ട്. കേന്ദ്രസര്ക്കാറിന്റെ ഈ ശക്തമായ ശ്രമങ്ങള്ക്ക് ഇപ്പോള് വലിയ തോതില് ഫലം കണ്ടുതുടങ്ങിയെന്നാണ് ഈ രംഗത്തെ പുതിയ ആഗോള കണക്കുകള് സൂചിപ്പിക്കുന്നത്. വിവിധ അന്താരാഷ്ട്ര സൂചികകളില് ഭാരതം മുന്നിര സ്ഥാനങ്ങള് കൈക്കലാക്കുന്നുണ്ട്.
രണ്ടായിരത്തി ഇരുപത്- ഇരുപത്തിയൊന്ന് വര്ഷത്തെ ആഗോള മെഡിക്കല് ടൂറിസം സൂചിക പ്രകാരം ലോകത്തെ ഏറ്റവും മികച്ച നാല്പ്പത്തിയാറ് ആരോഗ്യ വിനോദസഞ്ചാര കേന്ദ്രങ്ങളില് പത്താം സ്ഥാനം ഭാരതത്തിനാണ്. ലോകത്തിലെ തന്നെ ആദ്യത്തെ ഇരുപത് വിനോദസഞ്ചാര വിപണികളില് പന്ത്രണ്ടാം സ്ഥാനവും ഭാരതം സ്വന്തമാക്കിയിട്ടുണ്ട്. ഏഷ്യാ പസഫിക് മേഖലയിലെ ആദ്യത്തെ പത്ത് ശാരീരിക-മാനസിക ആരോഗ്യ കേന്ദ്രങ്ങളുടെ പട്ടികയെടുത്താല് ഋഷിവര്യന്മാരുടെ നാടായ ഭാരതത്തിന് അഞ്ചാം സ്ഥാനമാണുള്ളത്.
ആയുര്വേദ ആരോഗ്യ വിനോദസഞ്ചാരം കൂടുതല് പ്രോത്സാഹിപ്പിക്കുന്നതിനായി 'ആയുഷ് വിസ' എന്ന പേരില് പ്രത്യേക യാത്രാനുമതി പത്രം തന്നെ കേന്ദ്രസര്ക്കാര് പുതുതായി ആവിഷ്കരിച്ചിട്ടുണ്ട്. മറ്റ് വിദേശ രാജ്യങ്ങളില് നിന്നും ഭാരതത്തിലേക്ക് ചികിത്സയ്ക്കായി എത്തുന്നവര്ക്ക് വലിയ നിയമക്കുരുക്കുകളും നൂലാമാലകളും ഒഴിവാക്കി യാത്രാ അനുമതി വേഗത്തില് ലഭ്യമാക്കുന്നതിനായി രണ്ടായിരത്തി ഇരുപത്തിമൂന്നിലാണ് ഈ ആയുഷ് വിസ സംവിധാനം രാജ്യത്ത് നടപ്പിലാക്കിയത്. ഇത് വിദേശ രോഗികളുടെ വരവ് ഇരട്ടിയാക്കാന് സഹായിച്ചിട്ടുണ്ട്.
നിലവില് സ്വകാര്യ മേഖലയുടെ കൂടുതല് പങ്കാളിത്തത്തോടെയും നിക്ഷേപത്തോടെയും ആയുര്വേദ ആരോഗ്യ ടൂറിസം വലിയൊരു വ്യവസായമാക്കി മാറ്റാനുള്ള തീവ്രശ്രമത്തിലാണ് കേന്ദ്ര സര്ക്കാര്. ഗ്രാമീണ മേഖലകളിലെ ആയുര്വേദ കേന്ദ്രങ്ങള്ക്ക് പ്രത്യേക സഹായങ്ങളും സര്ക്കാര് നല്കുന്നുണ്ട്. വരും വര്ഷങ്ങളില് കേരളത്തിലെയും ഭാരതത്തിലെയും കായലോരങ്ങളും മലയോരങ്ങളും ലോകത്തിന്റെ പ്രധാന ആരോഗ്യ സുഖവാസ കേന്ദ്രങ്ങളായി മാറുമെന്നാണ് ഈ രംഗത്തെ വിദഗ്ദ്ധര് വിലയിരുത്തുന്നത്.
