‘അയ്യോ അച്ഛാ പോകല്ലേ...’ എന്ന ഒറ്റ ഡയലോഗ് മാത്രം മതി ഷഫ്ന നിസാം എന്ന താരത്തെ മലയാള സിനിമാപ്രേക്ഷകര് ഓര്ത്തെടുക്കാന്. ‘ചിന്താവിഷ്ടയായ ശ്യാമള’ എന്ന ചിത്രത്തിലൂടെ ബാലതാരമായി ബിഗ്സ്ക്രീനില് അരങ്ങേറ്റം കുറിച്ച താരം, പിന്നീട് കഥ പറയുമ്പോൾ, പ്ലസ്ടു എന്നീ ചിത്രങ്ങളിലൂടെ പ്രേക്ഷകഹൃദയം കീഴടക്കി. പ്ലസ്ടു സിനിമയുടെ സെറ്റിൽ വെച്ചുണ്ടായ സജിനുമായുള്ള സൗഹൃദം പിന്നീട് പ്രണയത്തിലേക്കും പിന്നീട് വിവാഹത്തിലേക്കും വഴിമാറുകയായിരുന്നു. തുടക്കത്തിൽ വീട്ടുകാരുടെ എതിർപ്പുകൾ മറികടന്ന് ഒന്നായ ഇവർ ഇന്ന് മിനിസ്ക്രീൻ പ്രേക്ഷകരുടെ പ്രിയപ്പെട്ട ദമ്പതികളാണ്.
ഇപ്പോഴിതാ, ഷഫ്നയുടെ ജന്മദിനത്തല് ഏറെ ശ്രദ്ധിക്കപ്പെടുന്നത് സഹതാരമായിരുന്ന അച്ചു സുഗന്ത് സോഷ്യൽ മീഡിയയിൽ പങ്കുവച്ച ആശംസ കുറിപ്പാണ്. ജനപ്രിയ പരമ്പരയായിരുന്ന ‘സാന്ത്വന’ത്തിലെ ‘കണ്ണന്’ എന്ന കഥാപാത്രമായി പ്രേക്ഷകമനസ്സിലിടം നേടിയ താരമാണ് അച്ചു. പരമ്പരയില് കണ്ണന്റെ ചേട്ടന് കഥാപാത്രമായ ‘ശിവനെ’ അവതരിപ്പിച്ചത് ഷഫ്നയുടെ ഭർത്താവായ സജിനാണ്. സീരിയലിലെ ആ സഹോദരബന്ധം ജീവിതത്തിലും വലിയൊരു കൂട്ടായി മാറിയെന്ന് ഈ പോസ്റ്റിലൂടെ ആരാധകര്ക്ക് മനസ്സിലാകും. അച്ചുവിന് ഷഫ്ന വെറുമൊരു സുഹൃത്തല്ല, സ്വന്തം സഹോദരി തന്നെയാണ്. അച്ചുവിന്റെ ആശംസയിലും ആ സ്നേഹം നിറഞ്ഞു നില്ക്കുന്നുണ്ട്.
‘‘ഡീ ചേച്ചീ... ഇന്നത്തെ ദിവസം നീ ജനിച്ചില്ലാരുന്നെങ്കിലോ..? എങ്കിൽ ആര് തേങ്ങയിൽ വെള്ളം നിറയ്ക്കും..?
( ഓ.. സോറി.. അത് താങ്കളുടെ ഡ്യൂട്ടി അല്ലല്ലേ! )
എങ്കിൽ ആര് ചെടികൾക്ക് വെയിൽ കൊടുക്കും..? ആര് എന്നെക്കൊണ്ട് എഡിറ്റ് ചെയ്യിപ്പിക്കും..? ആരെന്റെ ചെരുപ്പുകൾ അളന്നുമുറിച്ച് കൃത്യമായി ഒപ്പത്തിനൊപ്പം വെക്കും..? ആരെന്നെക്കൊണ്ട് ചളികൾ പറയാൻ പ്രോത്സാഹിപ്പിക്കും..? ആരെനിക്ക് പൈസ കടം തരും..? എന്തായാലും വിധിയെ തടുക്കാൻ ആർക്കും പറ്റില്ലല്ലോ....ഹാപ്പി ജനിച്ചോസം...
( പിന്നെ എന്റെ സഹോദരിയായതിൽ നീ ഒരുപാട് അഭിമാനിക്കുന്നുണ്ടെന്ന് എനിക്കറിയാം...എന്നെപ്പോലെ സുന്ദരനും സുമുകനുമായ ഒരു അനിയനെ കിട്ടിയതിൽ അഭിമാനിക്ക്....)’’ എന്ന് കുറിച്ചാണ് അച്ചു സുഗന്ത് രസകരമായി കുറിച്ച് ഷഫ്നയ്ക്ക് ജന്മദിനാശംസകള് പങ്കുവച്ചിരിക്കുന്നത്. സീരിയലിലൂടെ തുടങ്ങിയ സ്നേഹബന്ധം ഷഫ്നയ്ക്ക് എല്ലാ താരങ്ങളോടുമുണ്ട്. അച്ചുവിന്റെ ജീവിതത്തിലെ എല്ലാ കുസൃതികൾക്കും കൂട്ടായി നിൽക്കുന്ന ഒരു ചേച്ചി കൂടിയാണ് ഷഫ്ന എന്ന് ഈ കുറിപ്പിൽ നിന്ന് വ്യക്തമാണ്. സീരിയലില് സജിന്റെ ഭാര്യകഥാപാത്രമായി എത്തിയ ഗോപിക അനിലുമായും ഒരു സഹോദര ബന്ധം ഷഫ്നയ്ക്കുണ്ട്. ഷഫ്നയുടെ ഏറ്റവും അടുത്ത സുഹൃത്താണ് ഗോപിക. ഗോപികയും ഷഫ്നയ്ക്ക് ഹൃദയത്തില് ചാലിച്ച ആശംസകള് കുറിച്ചിട്ടുണ്ട്.
