എൽ നിനോയുടെ തിരിച്ചടി; സംസ്ഥാനത്ത് വീണ്ടും വൈദ്യുതി നിയന്ത്രണം

തിരുവനന്തപുരം: സംസ്ഥാനത്ത് വീണ്ടും വൈദ്യുതി നിയന്ത്രണം പ്രഖ്യാപിച്ചു. ജൂൺ 30 വരെയാണ് നിയന്ത്രണം ഏർപ്പെടുത്തിയിരിക്കുന്നത്. വൈകിട്ട് 6 മുതൽ രാത്രി 12 വരെ മിതമായ വൈദ്യുതി നിയന്ത്രണം ഏർപ്പെടുത്തുമെന്ന് കെഎസ്ഇബി അറിയിച്ചു.

പസഫിക് സമുദ്രത്തിലെ എൽനിനോ പ്രതിഭാസത്തെ തുടർന്നുണ്ടായ ഉയർന്ന താപനിലയും വൈദ്യുതി ആവശ്യകതയിലെ വർധനയും മൂലം വൈദ്യുതി ലഭ്യതയിൽ വലിയ കുറവുണ്ടായതായി കെഎസ്ഇബി വ്യക്തമാക്കി. നിലവിൽ 900 മെഗാവാട്ടിന്റെ കുറവാണ് രേഖപ്പെടുത്തിയിട്ടുള്ളത്. പവർ എക്സ്ചേഞ്ചിൽ നിന്ന് ലഭിക്കുന്ന വൈദ്യുതിയിലും കുറവ് അനുഭവപ്പെടുന്നുണ്ടെന്നും അധികൃതർ അറിയിച്ചു.

അതേസമയം, മാർച്ച്, ഏപ്രിൽ മാസങ്ങളിൽ ഇതര സംസ്ഥാനങ്ങളിൽ നിന്ന് വായ്പയായി വാങ്ങിയ വൈദ്യുതി ജൂൺ 16 മുതൽ തിരിച്ചുനൽകേണ്ട സാഹചര്യമുണ്ടായതും നിലവിലെ പ്രതിസന്ധിക്ക് കാരണമായതായി കെഎസ്ഇബി വിശദീകരിച്ചു.