സിനിമാ ലോകം ഏറെ ആകാംഷയോടെ കാത്തിരിക്കുന്ന സ്പൈ ആക്ഷൻ ത്രില്ലറാണ് 'ആൽഫ'. ശിവ് റവയിൽ സംവിധാനം ചെയ്യുന്ന ഈ ചിത്രം യഷ് രാജ് ഫിലിംസിന്റെ സ്പൈ യൂണിവേഴ്സിന്റെ ഭാഗമാണ്. 2012-ൽ 'ഏക് താ ടൈഗറി'ലൂടെ ആരംഭിച്ച വൈ.ആർ.എഫ് സ്പൈ യൂണിവേഴ്സിലെ ഏഴാമത്തെ ചിത്രമാണിത്. മാസ് ആക്ഷൻ റോളിലാണ് കേന്ദ്ര കഥാപാത്രമായ ആലിയ ഭട്ട് ചിത്രത്തിൽ എത്തുന്നത്. ആലിയയുടെ ഒരു പൂർണ്ണ ആക്ഷൻ പടം എന്നതുകൊണ്ട് തന്നെ പ്രഖ്യാപന സമയം മുതൽ ഈ ചിത്രം വലിയ പ്രേക്ഷക ശ്രദ്ധ നേടിയിരുന്നു.
കഴിഞ്ഞ ദിവസമായിരുന്നു ചിത്രത്തിന്റെ ട്രെയിലർ പുറത്തിറങ്ങിയത്. മികച്ച പ്രതികരണമാണ് ട്രെയിലറിന് സോഷ്യൽ മീഡിയയിൽ ലഭിക്കുന്നത്. ഇപ്പോഴിതാ ചിത്രത്തെയും അണിയറപ്രവർത്തകരെയും പ്രശംസിച്ച് രംഗത്തെത്തിയിരിക്കുകയാണ് നടി ജാൻവി കപൂർ. ഈ ചിത്രത്തിനായി താൻ ഏറെ കാത്തിരിക്കുന്നുവെന്നാണ് ജാൻവി കുറിച്ചത്.
ട്രെയിലർ തന്റെ ഇൻസ്റ്റാഗ്രാം സ്റ്റോറിയിലൂടെ പങ്കുവെച്ചുകൊണ്ടായിരുന്നു ജാൻവിയുടെ കുറിപ്പ്. "ഈ ചിത്രത്തിനായി ഞാൻ കാത്തിരിക്കുന്നു. ഈ സ്പൈ യൂണിവേഴ്സിൽ രണ്ട് കരുത്തരായ സ്ത്രീകൾ വില്ലന്മാരെ അടിച്ചുതകർക്കുന്നത് കാണാൻ വലിയ ആവേശമുണ്ട്. ആലിയ, ശർവരി, അനിൽ കപൂർ, ബോബി ഡിയോൾ..." എന്നാണ് ജാന്വി കുറിച്ചത്.
