വിജയ് ആന്റണി, സ്വാസിക എന്നിവര് പ്രധാന കഥാപാത്രങ്ങളായി തിയേറ്ററുകളിലെത്തിയ പുതിയ ചിത്രമാണ് ' നൂറു സാമി'. ശശി സംവിധാനം ചെയ്ത ചിത്രത്തില് സെല്വി എന്ന കഥാപാത്രത്തെയാണ് സ്വാസിക അവതരിപ്പിക്കുന്നത്. ഇപ്പോഴിതാ സിനിമയിലെ സ്വാസികയുടെ പ്രകടനത്തെ പുകഴ്ത്തി രംഗത്തെത്തിയിരിക്കുകയാണ് സ്വാസികയുടെ ഭര്ത്താവും നടനുമായ പ്രേം ജേക്കബ്.
സ്വാസികയുടെ കരിയറിലെ ഏറ്റവും മികച്ച പ്രകടനമാണ് നൂറു സാമിയിലേതെന്ന് പ്രേം കുറിച്ചു. ഇനിയും ഇതിലും മികച്ച കഥാപാത്രങ്ങള് നിന്നെ തേടിയെത്തുമെന്നും അപ്പോള് നിന്റെ പ്രകടനം ഇതിലും വലിയൊരു തലത്തിലേക്ക് നീ ഉയര്ത്തുമെന്ന് എനിക്കറിയാമെന്നും പ്രേം പറഞ്ഞു.
'' നൂറു സാമി.
ശശി സാര് നിനക്ക് ഈ സിനിമയുടെ കഥ ആദ്യമായി വിവരിച്ചു തന്നപ്പോള് നീ എത്രമാത്രം ആവേശത്തോടെയാണ് എന്നെ വിളിച്ചതെന്നും, 'സെല്വി' എന്ന കഥാപാത്രത്തിന് തികച്ചും പുതിയൊരു രീതിയില് ജീവന് നല്കാന് നീ എത്രത്തോളം ആഗ്രഹിച്ചിരുന്നുവെന്നും എനിക്ക് ഇപ്പോഴും ഓര്മ്മയുണ്ട്.
അതിനായി നീ വിശ്രമമില്ലാതെ അധ്വാനിക്കുന്നത് ഞാന് കണ്ടിട്ടുണ്ട്. പുതിയ ഭാവങ്ങളും ശൈലികളും പരീക്ഷിച്ചും, ആളുകളെ സൂക്ഷ്മമായി നിരീക്ഷിച്ചും, ആ കഥാപാത്രം എത്രത്തോളം സ്വാഭാവികമാക്കാന് കഴിയുമോ അത്രത്തോളം സ്വാഭാവികമാക്കാന് നിന്റെ ദൈനംദിന ജീവിതത്തില് പോലും ബോധപൂര്വ്വം ചെറിയ മാറ്റങ്ങള് വരുത്തിയും നീ കഷ്ടപ്പെടുകയായിരുന്നു. ഞാന് അരികിലുള്ളപ്പോള് പോലും, വളരെ അനായാസമായി സാരിയുടുത്ത് യഥാര്ത്ഥ ജീവിതത്തില് നീ 'സെല്വി'യായി മാറിയ നിമിഷങ്ങള് ഞാന് ഓര്ക്കുന്നു. എന്നിട്ടും, ഇത്രയൊക്കെ കഠിനാധ്വാനം ചെയ്തിട്ടും അത് മതിയെന്ന് നിനക്ക് തോന്നിയില്ല, കൂടുതല് നന്നായി ചെയ്യാന് നീ നിന്നെത്തന്നെ വീണ്ടും വീണ്ടും പ്രേരിപ്പിച്ചുകൊണ്ടേയിരുന്നു.
കള്ളക്കുറിച്ചിയില് നിന്നുള്ള ആ അര്ദ്ധരാത്രി ഫോണ് കോളുകള് ഞാന് ഓര്ക്കുന്നു. നിന്റെ പ്രകടനത്തില് പൂര്ണ്ണ തൃപ്തി വരാതെ, ആ കഥാപാത്രത്തിന്റെ ഏറ്റവും മികച്ച രൂപമായി മാറണം എന്ന് നീ വീണ്ടും വീണ്ടും പറയുമായിരുന്നു. ആ സമര്പ്പണബോധം, സ്വയം മെച്ചപ്പെടാനുള്ള ആ ആഗ്രഹം അതാണ് എനിക്ക് നിന്നില് എപ്പോഴും ബഹുമാനം തോന്നിപ്പിച്ചിട്ടുള്ള കാര്യം.
എന്റെ പെണ്ണേ, ഞാന് ഇതുവരെ കണ്ടിട്ടുള്ളതില് വെച്ച് നിന്റെ ഏറ്റവും മികച്ച പ്രകടനങ്ങളില് ഒന്നാണിത്. ഈ യാത്രയിലുടനീളം നീ പ്രേക്ഷകരെ ചിരിപ്പിച്ചു, കരയിപ്പിച്ചു, പുഞ്ചിരിപ്പിച്ചു, ഒപ്പം ഓരോ വികാരങ്ങളും അവരെ അനുഭവിപ്പിച്ചു. അത് കാണുന്നത് തികച്ചും മനോഹരവും വികാരനിര്ഭരവുമായ ഒരു അനുഭവമായിരുന്നു.
നിന്റെ സിനിമാ ജീവിതത്തിലെ ഏറ്റവും മികച്ചതും അടയാളപ്പെടുത്തപ്പെട്ടതുമായ പ്രകടനങ്ങളില് ഒന്നായി ഇത് എക്കാലവും നിലനില്ക്കും. എന്നാല് ഇത് നിന്റെ കരിയറിന്റെ അവസാനത്തെ ഉയരമല്ല എന്ന് എനിക്ക് നൂറു ശതമാനം ഉറപ്പാണ്. നിന്നെ ഇതിലും കൂടുതല് പരീക്ഷിക്കുന്ന മറ്റൊരു കഥാപാത്രം നിന്നെ തേടിയെത്തും.അത് സംഭവിക്കുമ്പോള്, നിന്റെ പ്രകടനം നീ ഇതിലും വലിയൊരു തലത്തിലേക്ക് ഉയര്ത്തുമെന്ന് എനിക്കറിയാം.
കണ്ണുകളില് നിറഞ്ഞ കണ്ണീരോടെയും ചുണ്ടില് ഒരു പുഞ്ചിരിയോടെയും, നിന്നെയോര്ത്ത് എപ്പോഴും അഭിമാനിച്ചുകൊണ്ട് ഞാനിത് എഴുതുന്നു, എന്റെ സ്നേഹമേ. എന്ന് നിന്റെ കണവന് '' എന്നാണ് പ്രേം ജേക്കബ് കുറിച്ചത്. സ്വാസികയ്ക്കൊപ്പമുളള മനോഹര ചിത്രങ്ങളും പ്രേം പങ്കുവച്ചിട്ടുണ്ട്. പ്രിയതമന് നന്ദി അറിയിച്ച് പോസ്റ്റിന് താഴെ സ്വാസിക കമന്റുമായി എത്തി.
' പിച്ചൈക്കാരന്' എന്ന ചിത്രത്തിന് ശേഷം സംവിധായകന് ശശിയും വിജയ് ആന്റണിയും വീണ്ടും ഒന്നിക്കുന്ന ചിത്രമാണ് ' നൂറു സാമി' . മികച്ച പ്രതികരണങ്ങളാണ് സിനിമയ്ക്ക് ലഭിക്കുന്നത്.
