.webp)
കമ്പാല: ആഫ്രിക്കന് ഭൂഖണ്ഡത്തില് പടരുന്ന എബോള വൈറസിനെ പ്രതിരോധിക്കാനും പൊതുജനാരോഗ്യ സംവിധാനങ്ങള് ശക്തിപ്പെടുത്താനുമുള്ള ശ്രമങ്ങള്ക്ക് വലിയ പിന്തുണയുമായി ഇന്ത്യ. ഇതിന്റെ ഭാഗമായി രണ്ടാമത്തെയും ഏറ്റവും വലിയതുമായ മെഡിക്കല് സഹായം ഇന്ത്യ ആഫ്രിക്കയ്ക്ക് കൈമാറി.
ഇന്ത്യന് വ്യോമസേനയുടെ സി-17 ഗ്ലോബ്മാസ്റ്റര് III (C-17 Globemaster III) വിമാനം 43 ടണ് അത്യാവശ്യ മെഡിക്കല് സാമഗ്രികളുമായി ഉഗാണ്ടയിലെ എന്റബെ അന്താരാഷ്ട്ര വിമാനത്താവളത്തിലിറങ്ങി. ആഫ്രിക്കാ സെന്റേഴ്സ് ഫോര് ഡിസീസ് കണ്ട്രോള് ആന്ഡ് പ്രിവന്ഷന് (Africa CDC) വേണ്ടിയുള്ള ഈ സഹായം ഉഗാണ്ടയിലെ ഇന്ത്യന് ഹൈക്കമ്മീഷണര് ഉപേന്ദര് സിംഗ് റാവത്ത് ഔദ്യോഗികമായി കൈമാറി. HOC അനന്ത എസ്.ആര്.ഐയ്യരും ചടങ്ങില് സന്നിഹിതനായിരുന്നു.
രോഗബാധ തടയുന്നതിനുള്ള പ്രതിരോധ സാമഗ്രികള്, രോഗനിര്ണ്ണയ-നിരീക്ഷണ ഉപകരണങ്ങള്, സാമ്പിള് കടത്താനുള്ള കിറ്റുകള്, അവശ്യ മരുന്നുകള്, പോഷകാഹാരങ്ങള്, മുന്നിര ആരോഗ്യപ്രവര്ത്തകര്ക്കുള്ള സുരക്ഷാ ഗിയറുകള് (PPE kits) എന്നിവയടക്കമുള്ള വിപുലമായ ശേഖരമാണ് ഈ ഷിപ്മെന്റിലുണ്ടായിരുന്നത്.ആഫ്രിക്കന് യൂണിയന് കമ്മീഷന്റെ അഭ്യര്ത്ഥന മാനിച്ചാണ് ഇന്ത്യ ഈ അടിയന്തര സഹായം എത്തിച്ചത്. ഡെമോക്രാറ്റിക് റിപ്പബ്ലിക് ഓഫ് കോംഗോയുടെ (DRC) കിഴക്കന് മേഖലകളില് നിലവില് തുടരുന്ന എബോള പ്രതിരോധ പ്രവര്ത്തനങ്ങള്ക്ക് ഇത് വലിയ കരുത്താകും. കഴിഞ്ഞ മെയ് 24-ന് 2.5 ടണ് വരുന്ന ആദ്യഘട്ട അടിയന്തര മെഡിക്കല് സഹായം ഇന്ത്യ കമ്പാലയില് എത്തിച്ചിരുന്നു. ഇതിന് പിന്നാലെയാണ് ഇപ്പോള് വന്തോതിലുള്ള സഹായം എത്തിച്ചിരിക്കുന്നത്.
ആഫ്രിക്കന് രാജ്യങ്ങളുമായുള്ള ഇന്ത്യയുടെ ദീര്ഘകാല പങ്കാളിത്തത്തിന്റെ തെളിവാണ് പ്രസ്തുത സഹായമെന്ന് ഇന്ത്യന് വിദേശകാര്യ മന്ത്രാലയം (MEA) വ്യക്തമാക്കി. എബോള വ്യാപനം തടയുന്നതിനും ഭാവിയിലെ ആരോഗ്യ അടിയന്തരാവസ്ഥകളെ നേരിടാന് ആഫ്രിക്കയെ സജ്ജമാക്കുന്നതിനും ഇന്ത്യയുടെ പിന്തുണ കൃത്യമായി വിനിയോഗിക്കപ്പെടുമെന്നും മന്ത്രാലയം അറിയിച്ചു.
ഇന്ത്യന് സര്ക്കാരിന്റെയും ജനങ്ങളുടെയും ഈ ഐക്യദാര്ഢ്യത്തിന് ആഫ്രിക്ക സിഡിസി നന്ദി അറിയിച്ചു. ഈ സാമഗ്രികള് ഉഗാണ്ടയിലെ റീജിയണല് കോര്ഡിനേറ്റിംഗ് സെന്റര് വഴി കോംഗോയിലെ എബോള ബാധിത പ്രദേശങ്ങളിലേക്ക് എത്തിക്കും. രോഗനിര്ണ്ണയം വേഗത്തിലാക്കാനും ആരോഗ്യപ്രവര്ത്തകരുടെ സുരക്ഷ ഉറപ്പാക്കാനും ഇത് സഹായിക്കുമെന്ന് അധികൃതര് വ്യക്തമാക്കി.
ആരോഗ്യമേഖലയില് ഇന്ത്യയും ആഫ്രിക്കയും തമ്മില് വളര്ന്നുവരുന്ന ശക്തമായ സഹകരണത്തിന്റെ പ്രതീകമാണ് ഈ ദൗത്യം. വരും ദിവസങ്ങളിലും ആഫ്രിക്കന് യൂണിയന് കമ്മീഷനുമായി ചേര്ന്ന് ആവശ്യമായ കൂടുതല് മെഡിക്കല്-ലോജിസ്റ്റിക്സ് സഹായങ്ങള് നല്കാന് ഇന്ത്യ തയ്യാറാണെന്ന് അധികൃതര് അറിയിച്ചു.
