പിതൃദിനത്തിൽ തന്റെ ജീവിതത്തിലെ ഏറ്റവും പ്രധാനപ്പെട്ട രണ്ട് വ്യക്തികൾക്ക് ആശംസകള് നേര്ന്ന് നടി രകുല് പ്രീത് സിംഗ്. സ്വന്തം അച്ഛനും ഭർത്താവിന്റെ അച്ഛനും തനിക്ക് നൽകുന്ന സ്നേഹത്തെയും പിന്തുണയെയും കുറിച്ചാണ് താരം വാചാലയായത്. സോഷ്യൽ മീഡിയയിലൂടെയാണ് താരം കുടുംബചിത്രങ്ങൾക്കൊപ്പം ഹൃദയസ്പർശിയായ കുറിപ്പ് പങ്കുവെച്ചത്.
രണ്ട് അസാധാരണരായ പിതാക്കന്മാർ, രണ്ട് വ്യത്യസ്തമായ ജീവിതയാത്രകൾ, സ്നേഹത്തിന്റെയും കരുത്തിന്റെയും പിന്തുണയുടെയും അനന്തമായ ഒരു ഉറവിടം. ഞങ്ങളുടെ കുടുംബത്തെ പൂർണ്ണമാക്കുന്ന ഈ മനുഷ്യർക്ക് ഫാദേഴ്സ് ഡേ ആശംസകൾ.
അച്ഛന്മാർ നമ്മുടെ ഹൃദയത്തിൽ എത്രമാത്രം പ്രത്യേകതയുള്ളവരാണെന്ന് ഓർമ്മിപ്പിക്കുന്ന നിമിഷങ്ങളുടെയും ഓർമ്മകളുടെയും ചിരികളുടെയും ഒരു ശേഖരം. അണിയറയിലെ യഥാർത്ഥ നായകന്മാർക്ക് ഫാദേഴ്സ് ഡേ ആശംസകൾ.
എന്റെ അച്ഛന്, അങ്ങയുടെ അചഞ്ചലമായ സ്നേഹത്തിനും വിവേകത്തിനും താങ്കൾ ചെയ്ത എണ്ണമറ്റ ത്യാഗങ്ങൾക്കും നന്ദി. ഇന്ന് ഞാൻ എന്തായിരിക്കുന്നുവോ, അതിലെല്ലാം അങ്ങയുടെ ഒരു ഭാഗമുണ്ട്. ഫാദേഴ്സ് ഡേ ആശംസകൾ.
ദയവോടെയും വഴികാട്ടലോടെയും ഊഷ്മളതയോടെയും എന്നെ സ്വീകരിച്ച ഭർത്താവിന്റെ പിതാവിനെ ലഭിച്ചതിൽ ഞാൻ നന്ദിയുള്ളവളാണ്. ഞങ്ങളുടെ ജീവിതത്തിന്റെ ഇത്രയും പ്രധാനപ്പെട്ട ഭാഗമായതിന് നന്ദി. ഫാദേഴ്സ് ഡേ ആശംസകൾ!
സ്നേഹത്തോടെ നയിക്കുകയും പ്രവൃത്തികളിലൂടെ പ്രചോദിപ്പിക്കുകയും ഓരോ നിമിഷവും കൂടുതൽ പ്രകാശപൂർണ്ണമാക്കുകയും ചെയ്യുന്ന പിതാക്കന്മാരെ ഞങ്ങൾ ഇന്ന് ആഘോഷിക്കുന്നു. ഇന്നും എന്നും ഞങ്ങൾ നിങ്ങളെ വിലമതിക്കുന്നു. ഹാപ്പി ഫാദേഴ്സ് ഡേ! രാകുല് കുറിച്ചു.
അച്ഛന്മാർക്കൊപ്പം വിവിധ യാത്രകളിലും കുടുംബ ചടങ്ങുകളിലും പങ്കെടുത്ത ചിത്രങ്ങളുടെ ഒരു പരമ്പരയും നടി ഇൻസ്റ്റാഗ്രാമിൽ പങ്കുവെച്ചിട്ടുണ്ട്. അച്ഛനൊപ്പം അതീവ സന്തോഷവതിയായി നിൽക്കുന്ന രാകുലിന്റെ ചിത്രങ്ങൾ ഇതിനോടകം ആരാധകർ ഏറ്റെടുത്തു കഴിഞ്ഞു.
