വാടകക്കയറ്റവും വിചിത്രമായ റിയല് എസ്റ്റേറ്റ് ട്രെന്ഡുകളും കൊണ്ട് പലപ്പോഴും വാര്ത്തകളില് നിറയാറുള്ള നഗരമാണ് ബെംഗളൂരു. എന്നാല് ഇപ്പോള് ബെംഗളൂരുവിലെ ഒരു വീട്ടിലെ വിചിത്രമായ നിര്മ്മിതി കണ്ട് സോഷ്യല് മീഡിയ ഒന്നടങ്കം പൊട്ടിച്ചിരിക്കുകയാണ്. വീടിന്റെ ബാല്ക്കണിയില് പൂര്ണ്ണമായും പ്രവര്ത്തനസജ്ജമായ ഒരു വെസ്റ്റേണ് ടോയ്ലറ്റ് സ്ഥാപിച്ചിരിക്കുന്ന ദൃശ്യങ്ങളാണ് ഇപ്പോള് ഇന്റര്നെറ്റില് വലിയ രീതിയില് തരംഗമാകുന്നത്. ഒരു മെറ്റല് സ്ക്രീന് കൊണ്ട് ഭാഗികമായി മറച്ച രീതിയിലാണ് ബാല്ക്കണിയിലെ ഈ ടോയ്ലറ്റ് ഒരുക്കിയിരിക്കുന്നത്.
'ശ്രീസത്യ' എന്ന എക്സ് ഉപയോക്താവാണ് ഈ വിചിത്രമായ വീടിന്റെ വീഡിയോ സോഷ്യല് മീഡിയയില് പങ്കുവെച്ചത്. ആദ്യ നോട്ടത്തില് വളരെ സാധാരണമായ ഒരു ബാല്ക്കണി എന്ന് തോന്നുമെങ്കിലും, പെട്ടെന്നാണ് പുറത്തെ കാഴ്ചകളിലേക്ക് തുറന്നിരിക്കുന്ന രീതിയില് അവിടെ വെച്ചിരിക്കുന്ന കമ്മോട് ആളുകളുടെ ശ്രദ്ധയില്പ്പെടുന്നത്. വീടിനകത്ത് അറ്റകുറ്റപ്പണികള് നടക്കുന്നത് കൊണ്ട് താല്ക്കാലികമായി മാറ്റിവെച്ചതാണെന്ന് പലരും ആദ്യം കരുതിയെങ്കിലും, ഇത് താല്ക്കാലികമല്ലെന്നും ബാല്ക്കണിയില് സ്ഥിരമായി ഉപയോഗിക്കാന് വേണ്ടി തന്നെ നിര്മ്മിച്ചതാണെന്നുമാണ് പുറത്തുവരുന്ന വിവരങ്ങള്.
വീഡിയോ വൈറലായതോടെ സോഷ്യല് മീഡിയയില് പരിഹാസങ്ങളുടെയും ട്രോളുകളുടെയും പൂരം തന്നെയുണ്ടായി. വീടിന്റെ സ്വകാര്യതയെയും ബെംഗളൂരുവിലെ കുതിച്ചുയരുന്ന ഭൂമിവിലയെയും പരിഹസിച്ചാണ് ഭൂരിഭാഗം കമന്റുകളും വരുന്നത്. 'പ്രകൃതിയുടെ മനോഹരമായ ഭംഗി ആസ്വദിച്ചുകൊണ്ട് പ്രകൃതിവിളിക്ക് ഉത്തരം നല്കാന് പറ്റിയ മികച്ച ഐഡിയ' എന്നാണ് ഒരു ഉപയോക്താവ് കുറിച്ചത്. ബെംഗളൂരുവില് ഓരോ ചതുരശ്ര അടിക്കും വന് വിലയായതുകൊണ്ട് ആളുകള് ഇപ്പോള് ബാല്ക്കണിയെ വരെ ബാത്ത്റൂമാക്കി മാറ്റുകയാണെന്ന് മറ്റൊരാള് പരിഹസിച്ചു. ഈ ടോയ്ലറ്റ് ഉപയോഗിക്കാന് പ്രത്യേക 'വ്യൂ ചാര്ജ്' വല്ലതും നല്കേണ്ടതുണ്ടോ എന്ന് ചോദിച്ചവരും കുറവല്ല.
റിസോര്ട്ടുകളിലും വനപ്രദേശങ്ങളിലുമൊക്കെ ഇത്തരം ഓപ്പണ്എയര് ടോയ്ലറ്റുകള് കാണാറുണ്ടെങ്കിലും തിരക്കേറിയ ഒരു നഗരത്തിന് നടുവില് ഇങ്ങനെയൊന്ന് ആരും പ്രതീക്ഷിച്ചതല്ല. എന്തുകൊണ്ടാണ് ഇത്തരമൊരു വിചിത്രമായ ഡിസൈന് തിരഞ്ഞെടുത്തത് എന്നതിനെക്കുറിച്ച് വീട്ടുകാര് ഇതുവരെ വ്യക്തത വരുത്തിയിട്ടില്ല. സ്ഥലം ലാഭിക്കാന് വേണ്ടിയുള്ള സൂത്രപ്പണിയാണോ അതോ വല്ല പുതിയ ആര്ക്കിടെക്ചര് പരീക്ഷണമാണോ ഇതെന്ന് വ്യക്തമല്ലെങ്കിലും, ഈ 'ബാല്ക്കണി ടോയ്ലറ്റ്' ഇപ്പോള് ബെംഗളൂരുവിലെ ഏറ്റവും പുതിയ ചര്ച്ചാവിഷയമായി മാറിയിരിക്കുകയാണ്.
House in Bangalore goes viral for its unique design 👀😜 pic.twitter.com/eIpzVkvGRv
— SriSathya (@sathyashrii) June 20, 2026
